Polokalama ʻAho ʻAsemipilī Makehe Foʻou
1 “Hoko ko e Faʻahinga ʻOku Akoʻi ʻe Sihova” ko e kaveinga ia ki he polokalama ʻaho ʻasemipilī makehe foʻou ʻa ia ʻe kamata ia ʻi Sepitema. (Sione 6:45) Ko e ako fakaʻotua meia Sihová ʻokú ne tokoniʻi moʻoni kitautolu ke moʻui ʻi he moʻui fiemālie. ʻOkú ne fakatupulekina ʻiate kitautolu ha houngaʻia loloto ki hotau tofiʻa fakalaumālié. Ko ʻetau ngaahi feinga ke tokoniʻi ʻa e niʻihi kehé ke fanongo ki he ongoongo leleí ʻokú ne ʻai ai kitautolu ko e ngaahi mēmipa ʻaonga ʻi he sōsaietí. Ko e ʻaho ʻasemipilī makehe ko ʻení te ne fakaeʻa ʻa e ngaahi tāpuaki naʻe loto-fiefia ai ʻa e faʻahinga kuo akoʻi ʻe Sihová.
2 ʻE fakafaikehekeheʻi ʻe he polokalamá ʻa e ngaahi ʻaonga ʻo e ako fakaʻotuá mei he ngaahi fakatuʻutāmaki ʻo e ako fakamāmaní. ʻE māʻalaʻala ange ai ʻetau vakai ki he founga ʻoku tokonaki ai ʻe Sihova ʻa e faʻahinga ako māʻolunga tahá—ko e ako ʻoku makatuʻunga ʻi heʻene Folofolá, ko e Tohitapú. Ko e fakamamafá ʻe lave ki he tafaʻaki ʻe tolu ʻo e founga-lotu te tau hokosia ai ʻa e fiefia ʻi he hoko ʻo akoʻi ʻe he ʻOtuá. Tānaki atu ki ai, ko e kau talavoú te nau hoko ʻo loto-toʻa ke faʻifaʻitaki ki he ngaahi faʻifaʻitakiʻanga faka-Tohitapu tuʻu-ki-muʻa hangē ko Tēvita mo Tīmoté pea langa hake ʻenau moʻuí ʻi he ngaahi ngāue fakalaumālié. ʻE mālohi ange ai ʻetau tuí koeʻuhi ko e mateaki ʻa e faʻahinga taʻumotuʻá ʻe fakaeʻa foki ai. Ko e faʻahinga fakatapui foʻou ʻoku taaú te nau lava ʻo papitaiso. ʻI he ki muʻa ʻaupito he ʻaho ʻasemipilií, ʻoku totonu ke nau fakahā ki he ʻovasia tauhí ʻenau holí.
3 Ko e malanga tefito ʻo e ʻaho ʻasemipilī makehé ʻoku fakakaveinga ia ko e “Akoʻi ʻe Sihova ke Fai Hono Finangaló.” Te ne fakamamafaʻi ai ʻa e ngaahi ʻuhinga pe ko e hā ʻoku fiemaʻu kotoa ai kitautolu ke hanganaki akó, ke hoko ʻo tuʻumaʻu ʻi he tuí, pea ke hokohoko atu hono fai ha laka ki muʻa. ʻOku enginaki mai kiate kitautolu ke faʻifaʻitaki kia Sihova ʻaki hono akoʻi ʻa e niʻihi kehé ki he moʻoni ʻoku taki atu ki he moʻui taʻengatá. ʻE fakakau ai ʻa e ngaahi meʻa naʻe hokosia ʻoku fakatupu langa haké ke fakahā ai ʻa e founga naʻe tokoniʻi ai ʻe he ngaahi tohi ʻa e Sōsaietí ʻa e tokolahi ke hoko ʻo akoʻi ʻe Sihová. Ko e ngaahi lavameʻa ʻaonga ʻo e polokalama ako ʻi māmani lahi ʻa Sihová ʻe fakaeʻa ai.
4 Fai ha fokotuʻutuʻu pau ke kau ki ai. Fakalototoʻaʻi ʻa e faʻahinga mahuʻingaʻia kotoa pē ke ʻi ai. Fakatuʻotuʻa atu ke ako ha ngaahi meʻa lelei lahi mei hotau Tokotaha-Faiako Maʻongoʻongá.—ʻAi. 30:20.