Polokalama ʻAho ʻAsemipilī Makehe Foʻou

Ko e tokonaki ʻo e ngaahi ʻaho ʻasemipilī makehé naʻe kamata ia ʻi he 1987. Ko e ngaahi fakatahataha ʻaho ʻe taha ko ʻení kuo fakamoʻoniʻi ai ʻoku fakatupu langa hake ki he kau sevāniti ʻa Sihová pea ki he faʻahinga mahuʻingaʻia ʻoku nau haʻu ki aí. Kamata ʻi Sepitema 1998, ʻe ʻoatu ai ha polokalama ʻaho ʻasemipilī makehe foʻou. Te ke maʻu ai ʻa e ngaahi malanga ʻe hiva mo e ngaahi fakaʻekeʻeke lahi pea mo e ngaahi meʻa naʻe hokosia ʻe ʻaonga fakalaumālie.

“Fakahā ʻa e Houngaʻia ki he Tēpile ʻa Sihová” ko e kaveinga ia ʻo e polokalama foʻoú. (Ai. 65:14; 1 Kol. 10:21) ʻE ʻai ai ke mālohi ʻetau fakapapau ko ʻetau lotu kia Sihová kuo pau ko e meʻa tuʻu-ki-muʻa ia ʻi heʻetau moʻuí. (Sāme 27:4) ʻE fekauʻaki ʻa e konga ʻa e ʻovasia fakafeituʻú mo e “Ko Hono Sivisiviʻi ʻa e Ngaahi Anga ʻo Hotau Lotó” fekauʻaki mo hono maʻu ʻa e fakatahá. ʻE fakahā mai kiate kitautolu ʻe he tokotaha malanga ʻaʻahí ʻa e founga ke “Tauhi Maʻu ʻa e Tuʻunga Fakalaumālié ʻAki ʻa e Kai ʻi he Tēpile ʻa Sihová.” ʻE toe ʻomai ai ʻa e fakalototoʻa ʻaonga ki he kau talavou ʻi he kautaha ʻa Sihová ke tauhi maʻu ʻa e tuʻu maʻumaʻuluta ʻi he tauhi ki he ʻOtuá. Ko e malanga tefito ʻa e tokotaha malanga ʻaʻahí, ʻoku fakakaveinga ko e “ʻAi ke Mālohi Fakalaumālie ke Fai ha Fakamoʻoni Loto-Toʻa,” ʻe fakahā mai ai ʻa e founga ʻoku fakafou mai ai ʻi he fakatahaʻangá ʻa e ngaahi tokonaki ke teuʻi ʻaki kitautolu ke faifakamoʻoni loto-toʻa fekauʻaki mo e Puleʻangá. Ko hai ia ʻe ʻikai ke taʻeloto ke maʻu ʻa e ʻaonga mei he polokalama ko ʻení?

Ko e faʻahinga fakatapui foʻou ʻoku nau loto ke papitaisó ʻoku totonu ke nau fakahā ki he ʻovasia tauhí ʻi he vave taha ʻe malavá. ʻOku tau falala pau ʻi he taimi ʻoku tau kamata ai ʻa e taʻu hono 12 ʻo e fokotuʻutuʻu ʻo e ʻaho ʻasemipilī makehé, ko e faʻahinga kotoa pē ʻe ʻi aí ʻe langa hake fakalaumālie ki he ngāue ʻoku hanga mai mei muʻá.