Polokalama ʻAho ʻAsemipilī Makehe Foʻou
Ko e “Hoko ʻo Fakamotuʻatangata ʻi he Ngaahi Mafai ʻo e ʻIló” ʻa e kaveinga ʻo e polokalama ʻaho ʻasemipilī makehé ʻe kamata ʻi Sepitema 2000. (1 Kol. 14:20, NW) Ko e hā ʻe mahuʻinga ai kiate kitautolu ke tau maʻu iá? ʻOku tau moʻui ʻi ha māmani ʻa ia ʻoku fonu ʻi he koví. Ke talitekeʻi ʻení, kuo pau ke tau fakatupulekina hotau ngaahi mālohi ʻo e ʻilo fakalaumālié koeʻuhí ke tau malava ʻo ikunaʻi ʻa e koví ʻaki ʻa e leleí. Ko e meʻa ia ʻe tokoniʻi kitautolu ʻe he polokalama ʻaho ʻasemipilī makehé ke tau faí.
ʻI he konga ʻuluakí, ʻe fakamatalaʻi ai ʻe he ʻovasia fakafeituʻú ʻa e “Ngaahi Tokoni ki he Hoko ʻo Fakamotuʻatangata ʻi he ʻIlo Faka-Tohitapú.” Te ne fakahā mai kiate kitautolu ʻa e founga ke tau hoko ai ʻo tuʻumaʻu ʻi he tui faka-Kalisitiané. ʻE fakaeʻa ʻe he tokotaha malanga ʻaʻahí ʻa e founga ʻoku mātuʻaki mahuʻinga ai ʻa hono fakahoko moʻoni, pe ngāueʻaki, ʻo e ngaahi tefitoʻi moʻoni faka-Tohitapú ʻi hono fakatupulekina ʻa e tokanga fakamātoató, ʻi heʻene leaʻaki ʻa e kaveinga ko e “Maluʻi ʻa e Tuʻunga Fakalaumālié ʻAki ʻa Hono Akoʻi Hoʻomou Ngaahi Mafai Fakaefakakaukaú.”
Kuo pau foki ki he kau talavoú ke nau fakatupulekina ʻa e ngaahi mafai ʻo e ʻiló. ʻE fakamatalaʻi ʻeni ʻi he ongo konga ko e “ʻUhinga ke Hoko Ai ko e Kau Pēpē ʻi he Koví” mo e “Toʻutupu ʻOku Nau Maʻu ʻa e ʻIlo he Taimi Ní.” Fanongo ki he toʻutupu ʻoku nau tala mai ʻa e meʻa ʻoku nau fai ke fakaivimālohiʻi fakalaumālie ai kinautolu koeʻuhí ke nau malava ʻo mapuleʻi ai ha fieʻilo fekauʻaki mo e ngaahi ngāue fulikivanu ʻo e māmaní pea fakaʻehiʻehi mei he faingataʻá.
ʻOku anga-fēfē ʻetau maʻu ʻa e fiefia lahi taha ʻi he moʻuí? ʻE fakamatalaʻi ʻeni ʻe he tokotaha malanga ʻaʻahí ʻi he malanga fakaʻosí ko e “Maʻu ʻa e ʻAonga mei Hono Ngāueʻaki ʻa e Ngaahi Tefitoʻi Moʻoni Faka-Tohitapú ʻAki ʻa e ʻIlo.” Te ne ʻomai ai ha ngaahi faʻifaʻitakiʻanga ke fakahaaʻi ai ko hono ngāueʻaki ʻo e Folofola ʻa e ʻOtuá ʻokú ne tokoniʻi kitautolu ke tau fekuki mo e ngaahi palopalemá, fai ha ngaahi fili, pea maʻu ʻa e ʻaonga moʻoni mei he meʻa ʻoku akoʻi mai kiate kitautolu ʻe Sihová.
Ko e faʻahinga ko ia ʻoku nau loto ke fakahāhā ʻenau fakatapui ki he ʻOtuá ʻaki ʻa e papitaiso ʻi he vaí ʻi he ʻasemipilií ʻoku totonu ke nau fakahā ki he ʻovasia tauhí ʻi he vave taha ʻe malavá. Fakaʻilongaʻi ʻi hoʻo tohimāhiná ʻi he vave tahá ʻa e ʻaho ʻasemipilī makehé ʻi hono fanongonongó atu pē, pea fai ha ngaahi fokotuʻutuʻu pau ke maʻu ʻa e ʻaonga mei he polokalama mahuʻinga ko ʻení. ʻOua naʻá ke tō ʻi ha konga pē ʻo e ʻaho ʻasemipilī makehé! Te ne fakaivimālohiʻi koe ke ke kātakiʻi ai ʻa e fokotuʻutuʻu kovi ko ʻení pea anga-tonu maʻu ai pē kia Sihova.