Polokalama ʻAho ʻAsemipilī Makehe ki he 2010
1. (a) Ko e hā ʻa e ngaahi kaveinga Fakatohitapu ʻo e ʻaho ʻasemipilī makehé kuo ngāueʻaki ʻi he ngaahi taʻu ki mui ní? (e) Naʻe ʻi ai ha ngaahi meʻa mahuʻinga pau mei he ngaahi ʻaho ʻasemipilī makehe ki muʻá naʻe tokoniʻi ai koe ʻi hoʻo ngāue fakafaifekaú?
1 “Sivi ʻo ʻIlo ʻa e Ngaahi Meʻa ʻOku Lelei Lahi,” “Tuʻu Maʻu ko e Tākanga Pē Taha,” “Hanganaki Fakamoʻoni ki he Moʻoni,” mo e “Ko Kitautolu ko e ʻUmea—Ko Sihova Hotau Tufunga ʻUmeá.” (Fili. 1:9, 10, 27; Sione 18:37; Ai. 64:8) Ko e niʻihi ʻeni ʻo e ngaahi kaveinga lahi naʻe fakamatalaʻi ʻi he ngaahi ʻaho ʻasemipilī makehe ʻi he kuohilí. ʻOkú ke vēkeveke ke maʻu ʻa e ʻaho ʻasemipilī makehe ki he taʻu fakangāue 2010? ʻE ʻomai ai ʻa e kaveinga: “Kuo Fakanounou ʻa e Kuonga,” ʻa ia ko e toʻo mei he 1 Kolinito 7:29.
2. ʻE lava fēfē nai ke fakatupulekina ʻa e loto-māfana ki he ʻasemipilī ko ʻení?
2 Kamata fetalanoaʻaki loto-māfana leva ki he ʻaho ʻasemipilī makehé ʻi hono fanongonongo pē ʻa e ʻahó ʻi hoʻo fakatahaʻangá. ʻOku tokoniʻi ʻe he ngaahi mātuʻa ʻe niʻihi ʻenau fānaú ke fakatuʻotuʻa atu ki he ʻasemipilií ʻaki hono fakaʻilongaʻi ʻa e ʻahó ʻi he tohimāhina ʻa e fāmilí, fakataha mo ha lisi ʻo e ngaahi meʻa ʻoku fiemaʻú, pea ʻoku nau lau leva mei ai ʻa e ngaahi ʻaho ʻoku toé. Lolotonga hoʻomou efiafi Lotu Fakafāmilí, te mou loto nai ai ke fakamanatu ʻa e nouti mei he ngaahi ʻaho ʻasemipilī makehe ki muʻá. ʻE lava foki ke teuteuʻi homou lotó ki he meʻa ko eni ʻe hokó ʻaki ʻa e vakai ki he Maʻu ʻAonga mei he Ako Fakafaifekau Fakateokalatí, peesi 13-16, ke tokoniʻi koe mo ho fāmilí ke “mou tokanga ki he anga ʻo hoʻomou fanongo.”—Luke 8:18.
3. ʻE lava fēfē ke tau maʻu ʻaonga kakato mei he meʻa ʻe ʻomaí?
3 Ngāueʻaki ʻa e Meʻa ʻOkú Ke Akó: ʻOku faʻa fanongoa ʻa e lea he hili ha ʻasemipilī ʻo pehē: “He polokalama lelei moʻoni ia!” ʻOku moʻoni maʻu pē ia, he ko e taha eni ʻo e ngaahi tokonaki lelei lahi meia Sihová. (Pal. 10:22) Ke maʻu ha fua ʻi he fakamatalá, kuo pau ke ke fakalaulauloto ki ai pea tauhi maʻu ia. (Luke 8:15) Vaheʻi ha taimi ʻi hoʻo foki ki ʻapi hili ʻa e ʻasemipilií ke lāulea fakafāmili ai ki he polokalamá pe lāulea ki ai mo e faʻahinga ʻoku heka ʻi hoʻo kaá. Fetalanoaʻaki ki he ngaahi taumuʻa mo e ngaahi poini ʻe tokoniʻi ai kimoutolu ʻi hoʻomou ngāue fakafaifekaú. Ko e fai peheé ʻe tokoni ia ki hoʻomou maʻu ʻaonga mei he fakamatalá ʻi ha taimi fuoloa hili ʻa e ʻasemipilií.—Sem. 1:25.
4. Ko e hā ʻe makehe ai kia kitautolu ʻa e ʻasemipilī ko ʻení?
4 ʻOku tau ongoʻi makehe maʻu pē ʻi heʻetau maʻu ha meʻaʻofa ʻaonga ʻa ia ko e meʻa tofu pē ia ʻoku tau fiemaʻú. ʻIkai ʻoku tau fakatuʻotuʻa vēkeveke atu ki he meʻa kuo tuku tauhi mai ʻe Sihova maʻatautolu ʻi heʻetau ʻaho ʻasemipilī makehe ka hokó? ʻE lava ke tau fakapapauʻi ʻe ʻaonga ia ʻi he founga kotoa pē. ʻE lava ke tau ʻamanekina ke maʻu mei heʻetau Tamai fakahēvaní, ʻa Sihova, ʻa e meʻaʻofa tofu pē ko iá fakafou ʻi he fakalototoʻa mo e ako ki hono fakahoko ʻo e ngāue kuó ne vaheʻi mai ke tau faí.—2 Tim. 4:2; Sem. 1:17.