“Meʻakai ʻi Hono Taimi Totonu”
1 ʻI he hili hono maʻu ʻetau ʻaho ʻasemipilī makehé, ʻoku tau faʻa pehē, “Ko e meʻa tofu pē eni naʻa tau fiemaʻú!” Naʻe līpooti ʻe ha ʻovasia sēketi ʻe taha ʻo pehē ʻi he hili e fanongo ki he polokalama ki mui ní, naʻe fakahāhā ʻe he niʻihi ʻi heʻene sēketí ʻa e holi ke kau lahi ange ʻi he ngāue fakafaifekaú. Naʻe pehē ʻe ha ʻovasia fefonongaʻaki ʻe taha: “Naʻe tokoni ia kia kimautolu ke fakakaukau lelei pe ko e hā e tuʻunga ʻoku mau ʻi aí ʻi he faai mai ʻa e taimí ʻi heʻemau sivisiviʻi ʻemau ngaahi fili ʻi he moʻuí.” Naʻe pehē ʻe ha toe tokotaha, “Ko e tokolahi ʻo e kau malangá naʻa nau fakahāhā ʻa e fakakaukau ko ha fakamanatu lelei eni kia kinautolu ke fakapapauʻi ʻoku nau tokangataha ki he meʻa ʻoku mahuʻinga tahá, ko e ngāue fakafaifekaú.” Naʻe anga-fēfē ʻa e tokoni ʻa e ʻaho ʻasemipilī makehé kiate koé?
2 Ko e polokalama ki he taʻu fakangāue hoko maí ʻe toe hoko foki ia ko e meʻa tofu pē ʻoku tau fiemaʻú. Ko e kaveingá “Hūfanga kia Sihova,” ko e toʻo ia mei he Sāme 118:8, 9. Ko e niʻihi eni ʻo e ngaahi kaveinga ʻe lāulea ki aí: “Founga ʻo e Hoko ʻa Sihova ko e Hūfanga ʻi he Ngaahi Taimi Faingataʻá,” “Tokoniʻi ʻa e Niʻihi Kehé Ke Nau Maʻu ʻa e Hūfangaʻanga ʻi he Kapakau ʻo Sihová,” “Faʻifaʻitaki kia Sihova ʻi Hono Tokonaki ʻa e Hūfangaʻangá,” “Toʻutupu, ʻAi ʻa Sihova ko Ho Falalaʻanga!” mo e “Ko Hotau Palataisi Fakalaumālié—Tokonaki ʻa Sihova ki he Hūfangaʻangá.”
3 Ke Maʻu ʻAongá: Ko hono fanongonongo mai pē ʻa e ʻahó, fai ha ngaahi palani papau ke maʻu ia, pea fakaafeʻi ʻa hoʻo kau ako Tohi Tapú ke nau kau fakataha mo koe. Koeʻuhi ke tau ‘fua heʻetau kitakí,’ kuo pau ke tau puke maʻu ʻa e meʻa ʻoku tau fanongo ki aí. (Luke 8:15) Ko ia fanongo lelei ki he polokalamá, pea hiki ha nouti nounou ʻo e ngaahi poini tefitó pea pehē ki he fakahinohino ʻokú ke palani ke ngāueʻaki ʻi hoʻo moʻuí mo e ngāue fakafaifekaú. Vaheʻi ha taimi hili ʻa e ʻasemipilií ke fetalanoaʻaki fakafāmili ai ʻi he polokalamá, pea fakakaukau ki ha ngaahi founga pau ʻe lava ke ke ngāueʻaki ai mo ho fāmilí ʻa e fakahinohinó.
4 ʻI he hangē ko ha meʻakai ifo mo fakatupu iví, ko e ʻaho ʻasemipilī makehe ʻo e taʻu ní kuo teuteu ia fakataha mo e ʻofa lahi mo e fakakaukau ki muʻa. ʻOfa ke tāpuakiʻi ʻe Sihova hoʻo ngaahi feinga ke maʻu ia pea ke maʻu ʻaonga mei he “meʻakai ʻi hono taimi totonu” ke fafangaʻi fakalaumālie ʻa e kau faifekau Kalisitiané.—Mt. 24:45.
[Fehuʻi ki he Ako]
1. Naʻe anga-fēfē hono tokoniʻi koe mo e niʻihi kehé ʻe he polokalama ʻaho ʻasemipilī makehe ki mui ní?
2. Ko e hā ʻe lāulea ki ai ʻi he polokalama lolotonga ʻa e taʻu fakangāue hoko maí?
3. ʻE lava fēfē ke tau maʻu ʻaonga kakato mei hono maʻu ʻa e ʻasemipilií?
4. Ko e hā ʻoku totonu ai ke tau fakatuʻotuʻa atu ki heʻetau ʻaho ʻasemipilī makehe ka hoko maí?