Polokalama ʻAho ʻAsemipilī Makehe Foʻou

ʻI hono fakaivia ʻe he laumālie māʻoniʻoní, naʻe ngāue mālohi ai ʻa e muʻaki kau Kalisitiané ʻi hono talaki ʻa e ongoongo leleí ki he mamaʻo taha naʻe ala lavá. (Ng. 1:8; Kol. 1:23) Ko e polokalama ʻaho ʻasemipilī makehe ki he taʻu fakangāue 2007 ko e “Mātuʻaki Femoʻuekina ʻi he Folofolá,” ʻe tokoniʻi ai kitautolu ke tau faʻifaʻitaki ki heʻenau faʻifaʻitakiʻanga leleí.—Ng. 18:​5, NW.

ʻI heʻene lave ki he folofola ʻa e ʻOtuá, naʻe pehē ʻe Tuʻi Tēvita: “Ko e fakamoʻoni [pe fakamanatu] ʻa Sihova ʻoku pau, ʻoku fakapoto ai siʻi taʻe fie vale.” (Sāme 19:7) Ko e polokalama kuo teuteuʻi lelei ki he ʻaho ʻasemipilī makehe 2007 ʻe fakamamafaʻi ai ʻa e mahuʻinga ʻo e Tohi Tapú “ki he fakatonutonu” pea ʻe fakalototoʻaʻi ai kitautolu ke tau ngāueʻaki ʻa e Folofola ʻa e ʻOtuá ke malanga mo faiako fakataha mo e ongoʻi ʻo e fakavavevave. (2 Tim. 3:​16, 17) ʻE fakahaaʻi ʻe he polokalama foʻoú ʻa e founga ʻe lava ke tau fakaʻehiʻehi ai mei he ngaahi tōʻangá pea maʻu ʻaonga mei hono ngāueʻaki ʻa e ngaahi tefitoʻi moʻoni ʻa e Tohi Tapú ʻi he moʻui fakaʻahó. ʻE toe tokoniʻi ai kitautolu ke tau ngāueʻaki ʻa e Folofola ʻa e ʻOtuá ke tokoniʻi ʻa e kau talavoú pea mo e faʻahinga foʻoú ke nau laka ki muʻa fakalaumālie.

Fakapapauʻi ke ʻi ai ʻi he kamata ʻa e polokalamá, pea tokanga lelei. Hiki ha nouti ʻo e ngaahi poini te ke lava ke ngāueʻaki fakafoʻituituí. Fakahaaʻi hoʻo houngaʻia ki he fakahinohino mo e ngaahi fakamanatu ʻoku maʻú, pea fakakaukau ki he founga te ke ngāueʻaki ai ʻa e meʻa kuó ke akó.

Ko e polokalama ʻaho ʻasemipilī makehé te ne fakatupulekina ʻetau houngaʻia ki he Folofola ʻa e ʻOtuá, pea fakamanatu mai kia kitautolu ke tau tuʻumaʻu ʻi hono malangaʻi faivelenga ʻa e ongoongo lelei ʻo e Puleʻangá, pea fakahaaʻi mai ʻa e founga ke tau tokoniʻi ai ʻa e niʻihi kehé ke nau fai pehē. Ko ia, fakapapauʻi ke ʻoua te ke liʻaki ha faʻahinga tataki mo e fakahinohino fakalaumālie pē ʻoku tokonaki mai ʻe Sihova ʻi he founga ko ʻení!—Ai. 30:20e, 21.