Fokotuʻutuʻu Foʻou ki Hono Fakamanatu ʻo e Ngaahi Polokalama ʻAsemipilií
ʻI he hokohoko atu ʻa e māmani ʻo Sētané mei he kovi ki he kovi angé, ʻoku fakaivia kitautolu ʻe Sihova “ke jiaki ae aga taefaka-Otua moe gaahi holi fakamama, ka tau moui aga fakabotoboto, mo maonioni, mo aga faka-Otua, i he mamani.” (Tai. 2:12, PM) ʻOku ʻi he lotolotonga ʻo e ngaahi tokonaki ʻokú ne fai fakafou ʻi he “tamaioeiki agatonu mo boto” ʻa e ngaahi polokalama ʻasemipilī fakasēketi fakataʻú mo e ʻaho ʻasemipilī makehé. (Mt. 24:45, PM) He ʻiloʻi moʻoni ē ʻe kitautolu ʻa e fakaivimālohi ʻo e ngaahi fakatahataha fakalaumālie ko ení!
Ke tokoniʻi kitautolu ke tauhi maʻu pea ngāueʻaki ʻa e fakahinohino ʻoku ʻomaí, ʻe ngāueʻaki ai ha fokotuʻutuʻu foʻou ki hono fakamanatu ʻo e ngaahi polokalama ʻasemipilī ko ení lolotonga ʻa e taʻu fakangāue 2005. Ko e peesi 5-6 ʻo e fakalahi ko ení ʻoku ʻi ai ʻa e ngaahi kupu ʻoku ʻomai ai hano tomuʻa fakahāhā ʻo e meʻa ʻe ʻomaí pea pehē ki he ngaahi fehuʻi fakamanatu ki he polokalama ʻasemipilī taki taha. ʻE lāulea ʻa e ngaahi fakatahaʻangá ki he fakamatala ko ení ʻi he Fakataha Ngāué ʻi he taimi nounou ki muʻa pea ʻi he taimi nounou he hili ʻenau maʻu ʻenau ngaahi ʻasemipilií. ʻE anga-fēfē hono fokotuʻutuʻu ení?
ʻI he uike ʻe taha pe ua ki muʻa ke maʻu ʻe he fakatahaʻangá ʻa e ʻasemipilī fakasēketí, ʻe fakahoko ai ʻi he Fakataha Ngāué ha malanga miniti ʻe hongofulu ʻi he kupu ko e “Polokalama ʻAsemipilī Fakasēketi Foʻou” ke langaʻi ai ʻa e fakatuʻotuʻa ki he polokalamá. ʻE toe tohoakiʻi ʻe he tokotaha malangá ʻa e tokangá ki he ngaahi fehuʻi fakamanatú pea fakaʻaiʻai ʻa e tokotaha kotoa ke nau hiki nouti ʻi he teuteu ki he fakamanatú ʻa ia ʻe hoko ʻi ha ngaahi uike siʻi hili ʻa e ʻasemipilií.
ʻI loto ʻi he ngaahi uike siʻi hili ʻa e ʻasemipilií, ko ha fakamanatu miniti ʻe 15 ʻo e ʻuluaki ʻaho ʻo e polokalama ʻasemipilií ʻe fakakau ia ʻi he Fakataha Ngāué. ʻI he uike hoko maí, ʻe vaheʻi ai ʻa e miniti ʻe 15 ki hono fakamanatu ʻo e polokalama ʻi he ʻaho hono uá. Ko e ngaahi fehuʻi fakamanatu ʻe ʻomai ʻi he fakalahi ko ení ʻe hoko ia ko e makatuʻunga ki he ngaahi lāulea ko iá. ʻOku totonu ke fakahangataha ʻa e fakamanatú ki he ʻaonga mahuʻinga ʻo e fakamatalá. ʻE fokotuʻutuʻu nai ʻe he kau mātuʻá ke fakanounou, fakangata, pe toe fakataimitēpileʻi ʻa e ngaahi konga Fakataha Ngāue kehé ke fakahū ai ʻa e ngaahi konga fakamanatu ko ení.
ʻE muimui ʻi he fokotuʻutuʻu tatau ʻi he fekauʻaki mo e polokalama ʻaho ʻasemipilī makehé tuku kehe ʻa e konga miniti ʻe 15 ke fakamanatu ai ʻa e polokalamá fakakātoa. Ko kitautolu kotoa te tau loto ke tauhi ʻa e fakalahi ko ení pea ngāueʻaki ia ke maʻu ʻaonga kakato mei he fakahinohino lelei ʻoku tokonaki mai ʻe Sihová.—Ai. 48:17, 18.