Ko e Folofola ʻa e ʻOtuá ko e Koto Mālohi
1. Ko e hā ʻa e kaveinga ʻo e ʻaho ʻasemipilī makehe ki he taʻu fakangāue 2014?
1 ʻI he ʻikai ke hangē ko ha meʻa pē ʻoku tupu mo e faʻahinga taʻehaohaoa ʻo e tangatá, ʻoku maʻu ʻe he Tohi Tapú ʻa e mālohi ke liliu kitautolu, ʻai ʻetau fakakaukaú mo ʻetau ngaahi foungá ke fehoanaki mo e finangalo ʻo Sihová. Ka ʻoku mālohi fēfē ʻa e Folofola ʻa e ʻOtuá? ʻOku lava fēfē ke tau ngāueʻaki kakato hono mālohí ʻi heʻetau moʻuí? ʻOku lava fēfē ke tau ngāue ola lelei ʻaki ia ke tokoniʻi ʻa e niʻihi kehé? ʻOku mau falala-pau ʻe langa hake fakalaumālie kimoutolu kotoa ʻe he ngaahi poini ko eni ʻe lāulea ki ai lolotonga ʻa e polokalama ʻaho ʻasemipilī makehé ʻa ia ʻoku teuteu ki he taʻu fakangāue 2014. Ko hono kaveingá “Ko e Folofola ʻa e ʻOtuá ko e Koto Mālohi,” ʻoku toʻo mei he Hepelū 4:12.
2. Ko e hā ʻa e ngaahi fehuʻi ʻoku totonu ke tau fanongo ki hono ngaahi talí?
2 Kumi ʻa e Tali ki he Ngaahi Fehuʻi ko Ení: ʻI hoʻo fanongo ki he polokalamá, hiki ha nouti ʻo e ngaahi tali ki he ngaahi fehuʻi ʻoku fakahokohoko ko ení.
• Ko e hā ʻoku totonu ai ke tau maʻu ʻa e falala-pau ki he Folofola ʻa Sihová? (Saame 29:4)
• ʻOku lava fēfē ke tau aʻusia ʻa e mālohi ʻo e Folofola ʻa e ʻOtuá ʻi heʻetau moʻuí tonu? (Saame 34:8)
• ʻOku lava fēfē ke ke ʻoatu ʻa e mālohi ʻo e Folofola ʻa e ʻOtuá ʻi hoʻo ngāue fakafaifekaú? (2 Tīm. 3:16, 17)
• ʻOku lava fēfē ke tau fakaʻehiʻehi mei he tō ki he tauhele ʻo e mālohi kākā ʻa e māmani ʻo Sētané? (1 Sio. 5:19)
• ʻOku lava fēfē ʻi ho tuʻunga ko ha toʻutupu ke aʻusia ʻa e lavameʻa fakalaumālié? (Sel. 17:7)
• ʻOku lava fēfē ke tau hoko ʻo mālohi neongo ʻetau vaivaí? (2 Kol. 12:10)
• Ko e hā ʻa e kī ki hono fai ha liliu hokohoko ʻi heʻetau moʻuí neongo ʻa e ngaahi tōʻonga mo e ngaahi fakakaukau koví? (ʻEf. 4:23)
3. Tuku kehe ʻa e fanongo ki he polokalamá, ko e hā mo ha toe meʻa ʻoku lava ke tau maʻu ʻaonga ai mei he ʻaho ʻasemipilī makehé?
3 He maʻu ʻaonga ē ko kitautolu ʻi he fanongo ki he fakamatala mahuʻinga ko ení! Tānaki atu ki ai, ko e ʻaho ʻasemipilī makehé, hangē ko e ʻasemipilī fakasēketí mo e fakataha-lahi fakavahé, ʻe ʻomai ai ʻa e ngaahi faingamālie kiate kitautolu ke fano atu pea ke fiefia fakataha mo hotau fanga tokoua mo e tuofāfine mei he ngaahi fakatahaʻanga kehé. (Saame 133:1-3; 2 Kol. 6:11-13) Ko ia tuku ha taimi ke feohi ai mo e ngaahi kaumeʻa motuʻa pea ke ʻai ha ngaahi kaumeʻa foʻou. Kapau ʻe vaheʻi ha tokotaha malanga hangē ko e ʻovasia fakavahé pe ko ha tokoua mei Pēteli ki hoʻo ʻaho ʻasemipilī makehé, ko e hā ʻoku ʻikai ke ʻai ai ia ko ha faingamālie ke talitali lelei ai ia mo hono uaifí? Ko ia ai, ʻoku tau maʻu ha ngaahi ʻuhinga lelei ke tau ʻamanaki atu ki he ʻaho ʻasemipilī makehé!