Polokalama ʻAho ʻAsemipilī Makehe Foʻou
Ko e kaveinga ʻo e polokalama ʻaho ʻasemipilī makehe ki he taʻu fakangāue foʻoú ʻokú ne maʻu ha makatuʻunga Fakatohitapu fefeka: “Mou Fakamoʻulaloa ki he ʻOtuá—Fakafepakiʻi ʻa e Tēvoló.” (Sem. 4:7, NW) Ko ha tataki lelei ʻeni ki he ngaahi taimi faingataʻá ni! Ko ʻetau talangofua ki he ngaahi fekau ʻa e ʻOtuá ʻoku ʻai ai kitautolu ke tau fehangahangai fakahangatonu mo Sētane. ʻE akoʻi kitautolu ʻe he polokalamá ki he founga ke tuʻumaʻu ai ʻo fakafepakiʻi ʻa e ngaahi faʻufaʻu fakaʻauha-tui mo kovi ʻa e Tēvoló. Ko e hā ʻa e niʻihi ʻo e ngaahi koloa fakalaumālie te tau maʻu ʻi he ʻasemipilī ko ʻení?
ʻE fakahā mai ʻe he ʻovasia fakasēketí ʻa e founga ʻoku fakaivimālohi ai ki he ngaahi fāmilí ʻa hono “Fakahā ʻa e Fakamoʻulaloa Fakaʻotuá ʻi he Tuʻunga ko e Ngaahi Mēmipa ʻi he Fāmilí” ki hono matuʻuaki ʻa e ngaahi tenge ʻa e māmaní. Ko e ʻuluaki malanga ʻi he ʻahó ʻa e tokotaha malanga ʻaʻahí, “ʻOku ʻUhinga ki he Hā ʻa e Fakafepakiʻi ʻo e Tēvoló,” ʻe fakamatala ai ki he ʻuhinga mo e founga ʻoku fiemaʻu ai ke tau fai ha ngāue mālohi ke talitekeʻi ʻa e ngaahi taumuʻa ʻa Sētane ke maumauʻi hotau tuʻunga fakalaumālié. Ko e konga ʻe ua ʻoku faʻu ia ke feʻungamālie tautefito ki he kau talavoú, ʻa ia kuo pau foki ke nau tokanga ki he ngaahi palani ʻa e Tēvoló. Ko e kau Kalisitiane tokolahi ʻoku nau hoko he taimí ni ko e kakai lalahí naʻa nau fakafisi ke ʻalu fakataha mo e ngaahi holi ʻa e māmaní ʻi he taimi naʻa nau kei siʻi aí. Te tau fiefia ke fanongo ki he niʻihi ʻo e ngaahi meʻa naʻa nau hokosia fakafoʻituituí.
Ko e fakamoʻulaloa ki he kau maʻu mafaí ʻoku fiemaʻu ia mei he faʻahinga kotoa ʻoku faʻuʻaki ʻa e sōsaieti ʻo e faʻahinga ʻo e tangatá. Ko ia, ko e malanga fakaʻosi ʻa e tokotaha ʻaʻahí ʻe fakamamafaʻi ai ʻa e tafaʻaki ʻe fā ʻa ia kuo pau ke fakahaaʻi ai ʻetau fakamoʻulaloa fakaʻotua: (1) ki he ngaahi puleʻangá, (2) ʻi he fakatahaʻangá, (3) ʻi he ngaahi ngāueʻanga fakamāmaní pea (4) ʻi he lotoʻi fāmilí. Ko ha polokalama ʻaonga moʻoni ē!
Ko e faʻahinga ʻoku nau loto ke papitaiso ʻi he ʻaho ʻasemipilī makehe ko ʻení ʻoku fiemaʻu ke nau fakahā ki he ʻovasia tauhí ʻi he vave taha ʻe malavá. ʻOku totonu kiate kitautolu kotoa ke fakaʻilongaʻi ʻa e ʻahó ʻi heʻetau tohimāhiná pea palani ke maʻu ʻa e polokalama ʻasemipilií kotoa. Ko e ngaahi tāpuaki te tau maʻú ʻe tuʻuloa ia ʻi heʻetau fakamoʻulaloa taʻengata kitautolu kia Sihová.