Kuo Pau ke Tau Toutou ʻAʻahi
1 Naʻá ke tali loto-lelei ʻa e ʻuluaki taimi naʻe talanoa atu ai kiate koe ha taha ʻo fekauʻaki mo e ongoongo leleí? Kapau naʻe ʻikai, kuo pau naʻá ke houngaʻia ʻi he toutou ʻaʻahi atu ʻa e Kau Fakamoʻoni ʻa Sihová kae ʻoua kuo faifai peá ke tali ʻa e tuʻuaki ki ha ako Tohitapú. ʻOku lelei ke fakakaukau ki ai ʻi hoʻo toutou ngāue ʻi ho feituʻu kuo vaheʻi atú.
2 ʻOku hokohoko feliliuaki ʻa e moʻui ʻa e kakaí. ʻOku nau fehangahangai mo e ngaahi palopalema mo e tuʻunga foʻou, fanongo ki he ngaahi meʻa fakahohaʻa ʻoku hoko ʻi he feituʻú pe ko e māmaní, faingataʻaʻia he ngaahi tōlalo fakaʻikonōmiká, pe hokosia ʻa e mahamahaki pe ko e mate ʻi he fāmilí. ʻE fakatupunga nai ʻe he ngaahi meʻa peheé ke nau fie ako ki he ʻuhinga ʻo e ngaahi meʻa fakalotomamahi ko ení. Kuo pau ke tau ʻiloʻilo ki he ngaahi tefitoʻi meʻa ʻoku nofo ʻi he fakakaukau ʻa e kakaí pea toki tali ʻaki leva ha pōpoaki fakafiemālie.
3 Ko ha Ngāue Fakahaofi-Moʻui Eni: Fakakaukau atu ki ha kau ngāue fakahaofi-moʻui ʻi ha fakatamaki naʻe hoko. Neongo ʻoku kumi nai ʻa e niʻihi ʻi ha feituʻu ʻoku maʻu ai ha tokosiʻi pē ʻo e kau haó, ʻoku ʻikai te nau māmālie ai pea tuku koeʻuhi ko hono maʻu ʻi ha feituʻu kehe ʻe honau kaungāngāué ha kau hao tokolahi ange. Kuo teʻeki ai ke ngata ʻetau ngāue fakahaofi-moʻuí. ʻI he taʻu taki taha, ʻoku maʻu mai ai ʻa e laui kilu ʻoku nau loto ke hao ʻi he “mamahi lahi.”—Fkh. 7:9, 14.
4 “ʻIlonga ʻa ia ʻe tautapa ki he huafa ʻo e ʻEiki ʻe fakamoʻui.” (Loma 10:13-15) ʻOku totonu ke ʻai ʻe he ngaahi leá ni ke maongo kiate kitautolu taki taha ʻa e fiemaʻu ke kīvoi ʻi he malangá. Talu mei he ʻuluaki kamata ke ngāueʻi hotau feituʻú, mo e tupu hake ʻa e fānaú pea kuo nau lalahi feʻunga eni ke fakakaukau fakamātoato maʻanautolu fekauʻaki mo honau kahaʻú pea mo e taumuʻa ʻo e moʻuí. ʻOku ʻikai lava ke tau ʻiloʻi pe ko hai ʻe faifai pea fanongó. (Koh. 11:6) Kuo tokolahi ʻa e kau fakafepaki ki muʻa kuo nau tali ʻa e moʻoní. Ko ʻetau ngāué ʻoku ʻikai ko hono fakamāuʻi ʻa e kakaí, ka ke hanganaki tuku kiate kinautolu ha faingamālie ke fanongo pea ke fakahaofi mai ai mei he māmani motuʻa ko ení. Hangē ko ia naʻe fai ʻe he muʻaki kau ākonga ʻa Sīsuú, kuo pau ke tau “hokohoko ō” ki he kakaí pea feinga ke langaʻi hake ʻenau mahuʻingaʻia ʻi he pōpoaki ʻo e Puleʻangá.—Mt. 10:6, 7.
5 Ko e moʻoniʻi meʻa ko ia ʻo e kei ʻi ai ʻa e faingamālie kiate kitautolu ke malangá ko ha fakahāhā ia ʻo e meesi ʻa Sihová. (2 Pita 3:9) ʻI heʻetau fakaʻatā ʻa e niʻihi kehé ke toutou fanongo ki he pōpoakí, ʻoku tau fakaeʻa ai ʻa e ʻofa ʻa e ʻOtuá, pea ʻi he foungá ni ʻoku tau fakahīkihikiʻi ai ia.