Palani ki Muʻa!
1 ʻOku tokonaki mai ʻe he kautaha ʻa Sihová ha polokalama tuʻumaʻu ʻo e ngaahi ngāue fakateokalati kuo faʻu ke fakafiemālieʻiʻaki ʻetau ngaahi fiemaʻu fakalaumālié. ʻOku ueʻi kitautolu ʻe he houngaʻiá ke ngāueʻaki kakato ʻa e meʻa kotoa pē kuo fokotuʻutuʻú, hangē ko e ngaahi ʻaʻahi ʻa e ʻovasia fefonongaʻakí, ngaahi ʻasemipilií mo e ngaahi fakataha-lahí, pea mo e ngaahi ngāue makehe ʻe niʻihi kuo fokotuʻutuʻu fakalotofonuá. (Mt. 5:3) Kae kehe, ʻoku ʻikai ke maʻu ʻe he niʻihi ʻa e lahi ʻo e ngaahi tokonaki fakalaumālie ko ʻení koeʻuhí ko e ngaahi palani kehe kuo nau fai. Ko e hā ʻe malava ke fai ke taʻofi ai ʻa e meʻá ni? ʻOku lava fēfē ke tau fakakapapauʻi ko e ngaahi ngāue taʻefakateokalatí ʻoku ʻikai te ne fetongi ʻe ia ʻa e “ngaahi meʻa ʻoku lelei lahi”?—Fili. 1:10.
2 ʻOku Fiemaʻu ʻa e Palani Fakapotopoto: ʻOku akonaki mai ʻa e Palovepi 21:5: “Ko e ngaahi tuʻutuʻuni [“palani,” NW] ʻa e faʻa ngaue ʻoku iku pe ki he maʻu ha meʻa: ka ko e fakavave kovi ko hono o pe ko e masiva.” Ke “maʻu ha meʻa” fakalaumālié, ʻoku fiemaʻu ke tau faʻa palani fakapotopoto ki muʻa, ʻo manatuʻi ʻa e ngaahi ngāue fakateokalati kuo ʻosi fokotuʻutuʻú. ʻOku totonu ke tau fakataimi-tēpileʻi ʻetau ngaahi ngāue fakafoʻituituí ki ha taimi ʻe ʻikai ai ke ne uesia hotau faingamālie ko ia ke utu ʻa e ngaahi tāpuaki fakalaumālié. Kapau te tau fai fakavave ha palani ke fai ʻa e ngaahi meʻa ʻoku tau fiemaʻu fakafoʻituitui ke faí, ʻo ʻikai te tau fai ha fakakaukau ki he ngaahi meʻa fakateokalati ʻoku hoko maí, ʻoku hangehangē te tau tofanga ʻi ha “masiva” fakalaumālie.
3 ʻOua ʻe Tō Ai! Ko kitautolu kotoa ʻoku tau fai ha ngaahi palani ki he kahaʻú, ʻo kau ai ʻa e ngaahi taimi mālōlō, ngaahi folau fakapisinisi, ngaahi ʻaʻahi ki he ngaahi kāingá, pea mo e hā fua. Ki muʻa ke ke fakapapauʻi pe aofangatuku hoʻo ngaahi palaní, sio ki he taimi-tēpile ʻo e ngaahi ngāue fakalaumālie ʻe hoko maí. Kapau ʻokú ke ʻiloʻi ʻe haʻu ʻa e ʻovasia fakafeituʻú pe ʻoku fokotuʻutuʻu ha ʻasemipilī ki he taimi tatau ʻokú ke mamaʻo nai aí, fai ha feinga fakamātoato ke feʻunuʻaki hoʻo ngaahi meʻá koeʻuhi ke ke malava ʻo kau ki ai. ʻOku fakahā tōmuʻa ʻaupito mai kiate kitautolu ʻo fekauʻaki mo e ngaahi meʻa lalahi kuo fakataimi-tēpileʻi ki he kahaʻú. ʻE lava ke tala atu ʻe he kau mātuʻa ʻi hoʻo fakatahaʻangá kiate koe ʻa e meʻa kuo fokotuʻutuʻu fakalotofonuá.
4 ʻI hono fai ha sio ki he kahaʻú pea palani ki muʻa ki he ngaahi meʻa mahuʻinga lahi angé, te tau “fonu ngutungutu ʻi he fua . . . ke langilangiʻia mo fakamaloʻia ai ʻa e ʻOtua.”—Fili. 1:11.