Ngāueleleiʻaki Ho Taimí
1 ʻOku maʻu ʻe he tokotaha kotoa pē ʻa e taimi lahi tatau ʻi heʻene ngāué ʻi he uike taki taha. Ko e konga ʻoku tau līʻoa atu ki hono fakamafola ʻa e ongoongo leleí ʻoku mahuʻinga tautefito ia koeʻuhí he ko e taimi ia ʻoku fakamoleki ʻi ha ngāue fakaefakahaofi moʻui. (Loma 1:16) ʻOku tau fakahā ʻetau houngaʻia ʻi he meʻá ni ʻaki ʻa e teuteu lelei ki he fokotuʻutuʻu fakamalangá, aʻu ki he ngaahi fakataha ki he ngāue fakamalangá ʻi he taimí, pea mātuku vave atu ki he feituʻu ngāué. Te tau malanga nai ʻi haʻatau tatali. Koeʻuhi kuo akoʻi kitautolu ʻe Sihova ko e “meʻa kotoa ʻoku ai hano taimi,” ʻoku fiemaʻu ke tau ngāueleleiʻaki moʻoni ʻa e taimi kuo tau vaheʻi ki he ngāue fakafaifekaú.—Koh. 3:1.
2 Ngāue Fakapotopoto ʻAki Ho Taimí: ʻOku tau maʻu ʻa e ngaahi tāpuaki lahi ʻi he taimi ʻoku tau puke maʻu ai ki ha taimi-tēpile ʻokú ne fakaʻatā ai ki ha kau tuʻumaʻu ʻi he ngāue fakamalangá. Ko e moʻoni, ko e ngaahi ola lelei ʻoku tau maʻu ʻi he ngāue fakafaifekaú ʻoku totonu ke fakahoatatau ia mo e lahi ʻo e taimi ʻoku fakamoleki ʻi he ngāue fakamalangá. ʻI ha fanga kiʻi feʻunuʻaki ʻi heʻetau founga tuʻumaʻú, ʻe lava ke tau līʻoa atu ʻa e taimi lahi ange ki he ngāue fakamalangá? Ko e fakatātaá, ʻi he hili ʻa e ngāue makasini ʻi he Tokonakí, ʻe lava ke tau vaheʻi ha toe taimi lahi ange ke fai ai ha toe ʻaʻahi ʻe niʻihi? Kapau ʻoku tau ʻi he ngāue fakamalanga ʻi ha vahaʻa taimi ʻi he Sāpaté, ʻe lava ke tau fakamoleki ha toe taimi ke fai ai ha ngaahi toe ʻaʻahi pe fai ha ako Tohitapu? ʻE malava ke tānaki atu ki heʻetau ngāue fale-ki-he-falé ha faifakamoʻoni he halá? ʻI he ngaahi meʻá ni pe ngaahi founga kehé, te tau malava nai ai ke fakaleleiʻi ʻetau ngāué.
3 ʻI he taimi ʻoku tau kau ai ki he ngāue fakafaifekaú, ʻe lava ke tau fakamoleki ha taimi mahuʻinga kapau ʻoku ʻikai ke tau tokanga. Ko e moʻoni, ʻi he taimi ʻoku vevela ai ʻa e tuʻunga ʻo e ʻeá, ko ha kiʻi mālōlō nounou ʻe fakatupuivifoʻou ia kiate kitautolu pea tokoniʻi kitautolu ke tau hokohoko atu. Kae kehe, ke ke mafamafatatau, koeʻuhí ko e ngaahi mālōlō peheé ʻoku ʻikai nai ke fiemaʻu maʻu pē ia.
4 ʻI he ngaahi taʻu ki muí ni maí, kuo hoko ai ʻo faingataʻa ange ke maʻu ha kakai ʻi ʻapi. Ke fekuki mo e tuʻunga ko ʻení, ʻoku fai ʻe he kau malanga tokolahi ʻenau fakamoʻoni fale-ki-he-falé ʻi ha taimi kehe ʻi he ʻahó. Ko e hā ʻoku ʻikai te ke faifakamoʻoni ai ʻi he hoʻatā efiafí pe ko e efiafí?
5 ʻOku lelei ange kapau ʻoku ʻikai te tau fetalanoaʻaki he lolotonga ʻo e kau ki he ngāue he halá. ʻI hono kehé, tuʻu mavahevahe pea fakaofiofi ki he kakaí koeʻuhi ke kamata ha ngaahi fetalanoaʻaki mo kinautolu. Ko ia, ʻe ngāueʻi ola lelei ange ai ʻa e taimí pea ʻe maʻu ai ʻa e fiefia lahi ange mei he ngāué.
6 Kumi ha Ngaahi Faingamālie ke Faifakamoʻoni: ʻI he taimi naʻe pehē mai ai ʻe he tokotaha-ʻapí ʻoku ʻikai te ne mahuʻingaʻiá, naʻe ʻeke atu ʻe ha Fakamoʻoni pe ʻoku ʻi ai ha tokotaha kehe ʻi he falé ʻe lava nai ke ne talanoa ki ai. Naʻe taki atu heni ki ha fetalanoaʻaki mo e tangata ʻoku ʻaʻana ʻa e falé, ʻa ia kuó ne puke ʻi he ngaahi taʻu lahi pea naʻá ne toka mohenga lahi. Ko e ʻamanaki ʻoku fokotuʻu mai ʻi he Folofola ʻa e ʻOtuá naʻá ne fakafoʻou ʻene mahuʻingaʻia ʻi he moʻuí. Naʻe vave leva ʻene tuʻu hake mei he mohengá, ʻo maʻu ʻa e ngaahi fakataha ʻi he Fale Fakatahaʻangá, pea vahevahe atu ʻene ʻamanaki naʻe maʻu foʻoú ki he niʻihi kehé!
7 Naʻe ngāueʻaki ʻe ha tuofefine taʻu hongofulu tupu ʻa e fokotuʻu ke kau ʻi he ngāue fakamalangá he lolotonga ʻa e houa ki muʻa ʻi he Ako Tohi ʻa e Fakatahaʻangá. ʻI heʻene fuofua matapaá pē, naʻá ne fetaulaki ai mo ha taʻahine taʻu 13 ʻa ia naʻá ne fanongo fakamātoato peá ne tuku mo e ngaahi tohi. ʻI he ʻaho hono hokó ʻi he ʻapiakó, naʻe sio ai ʻa e tuofefine finemuí ki he taʻahine tatau. ʻI he hili iá, naʻá ne tuʻuaki ange leva ke ako ʻa e Tohitapú mo ia, pea naʻe tali ʻe he taʻahiné.
8 ʻAi Ia ko e Taimi Mahuʻinga: Ko e kau tuʻumaʻu ki he ngāue fakamalangá ʻoku tokoniʻi ai kitautolu ke fakatupulekina ʻetau ngaahi pōtoʻi ʻi hono fakahoko atu ʻa e ongoongo leleí. ʻE lava ke ke fakaleleiʻi hoʻo malava ke kamata ha fetalanoaʻaki ʻi ha matapā ʻaki hono ngāueʻaki ha lea kamata ola lelei ange? ʻE lava ke ke hoko ko ha faiako pōtoʻi ange ʻi hono fai ʻo ha ako Tohitapu ʻi ʻapi? ʻI hono fai iá, te ke lava moʻoni ke ngāueleleiʻaki ho taimi ʻi he ngāue fakamalangá pea ʻai hoʻo ngāue fakafaifekaú ke fua lahi ange.—1 Tim. 4:16.
9 Koeʻuhi “kuo fakanounou ʻa e taimí” ʻoku totonu ke fakafonuʻaki ʻetau moʻuí ʻa e ngaahi ngāue faka-Kalisitiané. (1 Kol. 7:29, NW) Ko hono vaheʻi ʻa e taimi ki he ngāue fakamalangá ʻoku totonu ke hoko ia ʻo māʻolunga ʻi heʻetau fakahokohoko ʻo e ngaahi meʻa mahuʻinga tahá. ʻAi ke kau longomoʻui, mo faivelenga ʻi he ngāue fakafaifekaú. Ko e taimí ko ha koloa fakaofo ia kuo foaki mai ʻe Sihova maʻatautolu. Ngāue fakapotopotoʻaki maʻu pē ia mo ngāueleleiʻaki.
[Puha ʻi he peesi 4]
Fakakaukau ki he Ngaahi Fokotuʻu ko ʻEní:
◼ Aʻu ki he ngaahi fakataha ki he ngāue fakamalangá ʻi he taimí.
◼ ʻI he fakaʻatuʻi, tauhi ke tokosiʻi ʻa e ngaahi kulupu faifakamoʻoní.
◼ Fakaʻehiʻehi mei he aʻu tōmui ki he feituʻu ngāué.
◼ Ngāue ʻi he feituʻú he taimi ʻoku ʻi ʻapi ai ʻa e tokolahi taha ʻo e kakaí.
◼ Ngāue tokotaha ʻi ha ngaahi taimi kapau ʻoku malu ke fai pehē.
◼ Fai ʻa e ngaahi toe ʻaʻahi ofi taha ki he feituʻu ngāue matapā-ki-he-matapaá.
◼ Hanganaki femoʻuekina ʻi he ngāué ʻi he taimi ʻoku fuoloa ai ha niʻihi ʻi he kulupú ʻi ha matapā.
◼ Kapau ʻe malava, makatuʻunga ʻi he ngaahi tuʻungá, ngāue atu ke lōloa ange ʻi he houa ʻe tahá.