Ngāue Lelei Taha ʻAki Ho Taimí ʻi he Ngāue Fakafaifekaú
Naʻe fakamoleki ʻe he Kau Fakamoʻoni ʻa Sihová ʻa e houa ʻe 1,945,487,604 ʻi he ngāue fakafaifekaú lolotonga ʻa e taʻu fakangāue 2014—ʻoku hā mahino ai ʻetau fakapapauʻi ke nofoʻaki femoʻuekina ʻi he ngāue ʻa Sihová! (Saame 110:3; 1 Kol. 15:58) Koeʻuhi “ko e taimi ʻoku toé ʻoku tātāiʻi,” ʻe malava nai ke tau ngāueʻaki ʻetau ngaahi houa mahuʻinga ʻi he ngāue fakafaifekaú ke fetuʻutaki ai mo ha kakai tokolahi ange?—1 Kol. 7:29.
Ko hono ngāue lelei taha ʻaki hotau taimí ʻi he ngāue fakafaifekaú ʻoku fiemaʻu ki ai ʻa e ngaofengofua. Ko e fakatātaá, kapau ʻokú ke fakamoleki maʻu pē ha houa ʻe taha pe lahi ange ʻi ha tafaʻaki pau ʻo e ngāue fakafaifekaú ʻo ʻikai lea ki ha taha, ʻe lava ke ke fai ha feʻunuʻaki kae lava ke ke maʻu ha kakai tokolahi ange ke talanoa ki ai? ʻOku kehekehe pē ʻa e ngaahi tuʻungá ʻi he feituʻu taki taha. Kae kehe, ko e ngaahi fokotuʻu ko ení ʻe lava ke ne tokoniʻi koe ke ngāue lelei taha ʻaki hoʻo taimí koeʻuhi ke ke fakaʻehiʻehi ai mei he “tuki ki he ʻeá.”—1 Kol. 9:26.
Faifakamoʻoni Fale-ki-he-Fale: ʻI he ngaahi taʻu lahi, ʻoku angamaheniʻaki ʻe he kau malangá ʻa e kamataʻaki ʻenau ngāue fakafaifekaú ʻa e malanga fale-ki-he-falé. Kae kehe, koeʻuhi ko e faʻahinga tokolahi ʻoku nau ngāue ʻi he lolotonga ʻa e ʻahó, fēfē ke ke ʻahiʻahiʻi ʻa e malanga fale-ki-he-falé ʻi he taimi efiafí pe efiafi poʻulí, ʻi he taimi ʻoku tokolahi ange ai ʻa e kakai ʻoku nau mālōlō mai ki honau ʻapí? Lolotonga ʻa e ʻahó, ʻe ola lelei ange nai ʻa e faifakamoʻoni ʻi he halá pe feituʻu pisinisí.
Faifakamoʻoni ʻi he Feituʻu Kakaí: Ko e ngaahi tēpilé mo e meʻa tuʻuaki tohi fakavaʻé ʻoku totonu ke fokotuʻu ia ʻi he ngaahi feituʻu ʻoku lahi ai ʻa e feʻaluʻaki ʻa e kakaí ʻi he feituʻu ngāue pē ʻo e fakatahaʻangá. (Sio ki he Ko ʻEtau Ngāue Fakafaifekau ʻo Siulai 2013, p. 5.) Kapau ʻoku ʻalu ke tokosiʻi ange ʻa e feʻaluʻaki ʻa e kakaí ʻi he feituʻu naʻe vaheʻi ki he faifakamoʻoni ʻi he feituʻu kakaí, ʻe fili nai ʻe he Kōmiti Ngāue ʻa e Fakatahaʻangá ke hiki ʻa e meʻa tuʻuaki tohi fakavaʻé pe tēpilé ki ha feituʻu ʻoku tokolahi ange ai ʻa e kakaí.
Toe ʻAʻahi mo e Ako Tohi Tapu: ʻE lava ke fakataimitēpileʻi hoʻo ngaahi toe ʻaʻahí mo e ako Tohi Tapú ke fai ʻi he taimi ʻoku ʻikai fuʻu ola lelei ai ʻa e ngaahi tafaʻaki kehe ʻo e ngāue fakafaifekaú? Hangē ko ení, kapau ʻoku ola lelei ʻa e ngāue fakafaifekau fale-ki-he-falé ʻi he pongipongi Tokonakí, ʻe lava ke fai hoʻo ako Tohi Tapú ʻi he hoʻataá pe efiafí? ʻI hono fai ʻa e ngaahi toe ʻaʻahí, ʻe lava ke vahevahe ʻa e kau malangá ki ha kulupu tokosiʻi ange ke lava ʻo fakahoko ha meʻa lahi ange ʻi he ngāue fakafaifekaú?
Ko e moʻoni ʻoku lava ke lau ʻetau taimí ʻi ha taimi pē ʻoku tau kau ai ʻi he ngāue fakafaifekaú, ka te tau fiefia lahi ange ʻi he taimi ʻoku ola lelei ai ʻetau ngāué. Kapau ʻokú ke fakatokangaʻi ʻoku ʻikai ola lelei ha tafaʻaki ʻo e ngāue fakafaifekaú ʻi ha taimi pau, ʻahiʻahiʻi ha tafaʻaki ʻe taha. Lotu ʻo kole ʻa e tataki ʻa Sihová, ko e “ʻEiki ʻo e utu-taʻú,” koeʻuhi ke ke lava ʻo ngāue lelei taha ʻaki ho taimí ʻi he ngāue fakafaifekaú!—Māt. 9:38.