Fakataha-Lahi Fakavahe “Kau Fai ki he Folofola ʻa e ʻOtuá” 2000 ʻa e Kau Fakamoʻoni ʻa Sihová
1 “Kau fakafetaʻi atu ʻi he fakataha lahi: te u fakamālō ki he ʻAfiona ʻi he lotolotonga ʻo ha fuʻu kakai.” (Sāme 35:18) Fakaʻuta atu ki he fiefia naʻe mei maʻu ʻe Tēvita ʻi he ʻahó ni he sio ki he fuʻu laui afe lahi ʻoku nau fakatahataha fakataha ʻi he melino ke nau maʻu ʻa e fakahinohino fakaʻotua ʻi heʻetau ngaahi fakataha-lahí! Naʻá ke kau ʻi he lotolotonga ʻo e toko 1,826 ʻo e faʻahinga naʻa nau maʻu ʻa e taha ʻo e ngaahi Fakataha-Lahi Fakavahe “Folofola Fakaekikite ʻa e ʻOtuá”? ʻI ʻAokosi mo Sepitema 1999, ko e ngaahi fakataha-lahi ʻe fā naʻe fai ʻi he ngaahi fonua ʻe tolu ʻi he feituʻu Vaʻa ʻi Haʻamoá. Ko ʻetau ngaahi fakataha-lahi fakavahe ʻi he 2000 te ne tokonaki mai maʻatautolu ʻa e ngaahi faingamālie foʻou ke fakatahataha ai mo e kaungā fakahīkihikiʻi ʻo Sihová, ʻa ia ʻoku “masiva honau laumalie” pea fiefia mo vēkeveke ke “fakafanongo ki he meʻa ʻoku folofolaʻaki ʻe he Laumalie ki he ngaahi siasi.”—Mt. 5:3; Fkh. 2:29.
2 ʻI he taʻú ni, kuo fokotuʻutuʻu ʻa e ngaahi fakataha-lahi fakaevahaʻamotu ʻi he ongo fonua ʻe ua ʻi he malumalu ʻo hotau vaʻá. Ko e ngaahi feituʻú mo e ngaahi ʻahó leva ʻeni: Tonga: Fale Fakatahaʻanga, Taufaʻahau Road, ʻAtele, ʻAokosi 4-6, 2000 (faka-Tonga mo e faka-Pilitānia). Haʻamoa: Maota mo Tupulaga, Sogi, Apia, Samoa, ʻAokosi 25-27, 2000 (faka-Haʻamoa mo e faka-Pilitānia). Ko e fanga tokoua mo e fanga tuofāfine mei Haʻamoa ʻAmelika, Haʻamoa mo Tonga te nau kau taki taha ki he ongo fakataha-lahi ko ʻení, ʻo ʻoatu ai ha faingamālie lelei ki ha fefakalototoʻaʻaki.
3 Ko Hono Fai ʻa Hoʻo Ngaahi Fokotuʻutuʻu ki Ho Nofoʻangá: Ko e fanga tokoua mo e fanga tuofāfine ʻi Haʻamoa mo Tonga ʻoku nau kau ki he fakataha-lahi ʻi honau fonuá te nau malava pē ke nofo ʻi ʻapi pe fai ʻenau ngaahi fokotuʻutuʻu pē ʻanautolu tonu ki he nofoʻangá. ʻE fai ʻe he niʻihi mei Haʻamoa ʻAmelika ʻenau ngaahi fokotuʻutuʻu pē ʻanautolu tonu ke nofo ʻi ha ngaahi ʻapi tāutaha mo ha fāmili pe ngaahi kaungāmeʻa, ʻe ngāueʻaki ʻe he tokolahi ʻa e nofoʻanga he hōtelé pe mōtelé. Kapau ko ia, kātaki ʻo manatuʻi ange ʻa e ngaahi fakahinohino ʻoku hoko haké:
(a) Kātaki ʻo ʻoua ʻe fai ha ngaahi taʻofi nofoʻanga ʻi ha hōtele ʻa ia ʻoku ʻikai te ke taumuʻa ke ngāueʻaki pe ko ha hōtele lahi hake ʻi he tahá ʻi he fakakaukau ko hono ʻuluaki vakaiʻi taki taha kinaua pea toki fili ʻa e taha ʻoku lelei tahá, kae kaniseli ʻa e niʻihi kehé. (Mt. 5:37) Ko e taʻeʻofa ʻeni, pea ʻoku taʻofi ai ʻa e ngaahi hōtelé mei hono maʻu ʻenau pisinisi naʻa nau mei malava ke maʻú. ʻOku toe toʻo ai mei he kau malanga kehé ʻa hono ngāueʻaki ʻo e ngaahi loki ko ʻení, ʻa ia ʻoku faʻa mātuʻaki fiemaʻú.
(e) ʻOua ʻe taʻofi ha ngaahi loki kiate koe pe ki he niʻihi kehé ʻo ʻikai ke ʻoatu ʻa e ngaahi hingoá pea mo hono ʻoatu vave ʻa e ngaahi tipōsiti ki he loki taki taha. ʻI he ʻikai ha tipōsití, ʻoku maʻu ʻe he hōtelé ʻa e totonu ke ʻave ʻa ho lokí ki ha tokotaha kehe.
(f) ʻOua naʻa nofo ha kakai tokolahi ange ia ʻi he lokí mei he tokolahi ko ia ʻoku fakaʻatā ʻe he tuʻutuʻuní, kau ai ha fānau. Manatuʻi, ʻokú ke totongi ha totongi ʻo makatuʻunga ʻi he tokolahi ʻo e faʻahinga naʻá ke ALEAʻI ke ʻi he lokí.
(h) ʻOua ʻe feimeʻatokoni pe fakamafana ha meʻakai ʻi he lokí tuku kehe ka ʻoku ʻi ai ha ngaahi naunau feimeʻatokoni ki he taumuʻa ko iá, pea tokanga ke ʻoua ʻe ʻuliʻi ha meʻa pē ʻi he lokí ʻaki ha meʻakai.
4 Ko e muimui ʻi he fakahinohino ko ʻení ʻokú ne ʻomai ai kiate kitautolu ʻa e faingamālie ke fakahāhaaʻi ʻetau ʻofa ki hotau fanga tokoua Kalisitiané. (1 Kol. 10:24; 1 Tim. 6:8) Kae kehe, ko hono maumauʻi ʻa e ngaahi tafaʻaki ko ʻení ʻoku ʻomai ai ʻa e luma ki he huafa ʻo Sihová pea mo e kautahá.—Sāme 119:168.
5 Ko Hono Fai ha Tokanga ki he Faʻahinga ʻOku ʻI Ai ʻa e Ngaahi Fiemaʻu Makehé: Ngaahi kāinga, ko e kau mātuʻá, pea mo e niʻihi kehe ʻi he fakatahaʻangá ʻa ia ʻoku nau fakatokangaʻi ʻa e ngaahi tuʻunga makehe ʻo e kau sevāniti taimi-kakato ʻoku taʻumotuʻa, mo ngāvaivaí, pe ko ha niʻihi kehe ʻoku ʻi ai ha ngaahi fiemaʻu makehe ki aí ʻe lava ke nau fakahāhā ʻenau tokanga anga-ʻofa mo e tokangá ʻaki hono tokoniʻi ʻa e faʻahinga ko ʻení ke nau maʻu ʻa e fakataha-lahí. ʻOku moʻoni ʻeni tautefito ki he faʻahinga mei Haʻamoa ʻAmeliká. (Fakafehoanaki mo 1 Timote 5:4.) Ko e foomu Society’s Special Needs Room Request ʻoku fakamatala ai ki he ngaahi tuʻunga taau ki hono ʻoatu ʻa e foomu ko ʻení. Ko e tokonaki ko ʻení ʻoku maʻá e kau malanga pē ʻoku nau ʻi he tuʻunga leleí, kau ai mo e faʻahinga ʻoku ʻi ai ʻenau fānau ʻoku ʻulungaanga lelei, ʻa ia kuo tali lelei ʻe he Kōmiti Ngāue ʻa e Fakatahaʻangá. ʻOku totonu ke ʻoatu ʻa e ngaahi kole ko ʻení ki he Potungāue Nofoʻangá ʻi he vave taha ʻe ala lavá, ʻo ngāueʻaki ʻa e tuʻasila ʻo e fakataha-lahí ʻa ia ʻoku hā ʻi he tafaʻaki ʻe taha ʻo e fōmú.
6 Ko Hono Maʻu ha Fakataha-Lahi Kehe: ʻI he taʻú ni ʻoku fokotuʻutuʻu ʻe he Sōsaietí ke tali ʻa e kau maʻu fakataha mei Haʻamoa ʻAmelika mo Haʻamoa ke nau maʻu ʻa e fakataha-lahi ʻi Tongá, pea tali mo e kau maʻu fakataha mei Tonga ke maʻu ʻa e fakataha-lahi ʻi Haʻamoá. ʻE fakamatalaʻi ʻe ha ngaahi tohi mei he Sōsaietí ʻa e ngaahi founga ki hono tali ke hoko ko ha tokotaha maʻu fakataha, pea ʻe fai hano faleʻi ʻo e faʻahinga ʻe talí. ʻE fai ʻa e ngaahi fokotuʻutuʻu ki ha folau fakakulupu kapau ʻe malava. Ko e fanga tokoua mo e fanga tuofāfine ʻi he ngaahi kolo lalahi ʻo e faiʻanga fakataha-lahí te nau saiʻia nai ke ʻoange ha nofoʻanga ki he niʻihi ʻo e kau fakafofonga mei mulí. Ko hono ʻai ke nofo mo kinautolú ʻe tānaki atu ia ki he fakalototoʻa ʻe maʻu mei he fakataha-lahí.
7 Fokotuʻutuʻu ke Maʻu ʻa e Ngaahi ʻAho Kotoa ʻe Tolú: Kuo feinga ʻa Sētane ke fakahohaʻasi koe mei hono fai ha tokanga ki he ngaahi meʻa fakalaumālié? ʻOku fakamamahí, ʻoku tokolahi ʻa e fanga tokoua mo e fanga tuofāfine pea mo honau ngaahi fāmilí ʻoku nau liʻaki ʻa e meʻakai fakalaumālie mātuʻaki mahuʻingá. ʻO anga-fēfē? ʻAki ʻa e ʻikai ke maʻu ʻa e ngaahi konga ʻo e fakataha-lahi fakavahe ʻi he Falaité. ʻI he ngaahi tuʻunga ʻe niʻihi kuo fakatokangaʻi ko ha peseti lahi ʻo hotau fanga tokouá ʻoku nau tō mei hono maʻu ʻa e fakahinohino fakalaumālie mo e feohi ʻoku tokonaki mai ʻe he ngaahi konga ko ia ʻi he Falaité.
8 ʻOku toumoua ʻa e fanga tokoua ʻe niʻihi ke lea ki honau kau pule ngāué ke kole ha taimi mālōlō ke maʻu ʻa e fakataha-lahí. Ko ho tuʻungá ʻeni? Ko e hā ʻoku ʻikai ke lotu ai kia Sihova fekauʻaki mo e meʻá pea fakatupulekina ha loto-toʻa ke fakamatalaʻi ho tuʻungá ki hoʻo pule ngāué? Manatuʻi ʻa e ola lelei kia Nehemaiá, ʻa ia naʻá ne ʻi ha tuʻunga meimei tatau. (Nehe. 2:1-6) Tui ki he loto-lelei ʻa ʻetau Tamai fakahēvaní ke tokoniʻi koé, ʻo ʻiloʻi kapau te ke fakamuʻomuʻa ʻa e ngaahi meʻa mahuʻinga ʻo e Puleʻangá, te ne tokonaki mai ʻa e ngaahi meʻa ʻoku fiemaʻu ki hoʻo moʻuí.—Mt. 6:32e, 33.
9 ʻOku Anga-Fēfē ʻa Hono Ueʻi Koe ʻe Heʻetau Ngaahi Fakataha-Lahí? Ko ha tuofefine mei he fakahahake ʻo e ʻIunaite Seteté naʻá ne tohi: “Fakamālō lahi ʻaupito atu ki he fakataha-lahi fakavahe 1999. Ko e feohi mo e fanga tokoua ko ia ʻoku ou sio tuʻo taha pē ki ai ʻi he taʻu taki tahá ʻokú ne ʻomai kiate au ʻa e fiefia lahi. Naʻá ku fetuʻutaki mo e moʻoní ʻi ha tuʻunga ko ha tokotaha taʻu hongofulu tupu naʻe feitama, pea ʻoku ou kei manatu ʻofa lahi ki he taimi naʻe ʻave ai au ʻe heʻeku faiako ako Tohitapú ki he ʻuluaki fakataha-lahi naʻá ku maʻú. Naʻá ku sio hake ki he ngaahi ʻaó ʻi ʻolunga ʻi hoku ʻulú ʻi he sitētiume taʻeʻató ʻi heʻemau hivaʻi ʻa e foʻi hiva ʻo e Puleʻangá ko e ‘Laui Mano ʻo e Fanga Tokouá,’ pea naʻá ku tangi. ‘ʻI he kotoa ʻo e kakai fakaʻofoʻofa takatakai kiate aú,’ naʻá ku ʻeke hifo kiate au, ‘ʻe lava fēfē ke fiemaʻu au ʻe Sihova?’ ʻI he ʻaho ko iá naʻá ku fili ai ke tauhi kakato ʻa Sihova.” Ko ha fakalotomāfana lahi ē! Ko ha fiefia moʻoni ia ke hoko ʻo feohi mo e kakai maʻa ʻa Sihová, ʻikai ko ia?
10 ʻI he lolotonga ʻo e konga fakaʻosi ʻo e ngaahi ʻaho fakaʻosí, ʻoku fiemaʻu kiate kitautolu ʻetau fakataha-lahi fakavahe fakataʻú ʻo lahi ange ia ʻi he toe taimi ki muʻa. Ko ha tokonaki ia meia Sihova ke tauhi maʻu ʻetau moʻui lelei mo e mafamafatatau fakalaumālié. Ko ia ai, fakapapauʻi ke maʻu ʻa e ngaahi ʻaho ʻe tolu kotoa ʻo e Fakataha-Lahi Fakavahe “Kau Fai ki he Folofola ʻa e ʻOtuá” ʻo e taʻu ní. ʻE lava fēfē ke ke tutui atu ke aʻu ki hoʻo fakapapaú? Kole ki hoʻo pule ngāué ki muʻa ha taimi mālōlō mei he ngāué ke maʻu ʻa e fakataha-lahí fakakātoa. Kapau ʻoku fakangatangata ʻa hoʻo ngaahi tuʻungá, kamata he taimí ni ke vaheʻi ha paʻanga ʻoku fiemaʻu ki hono maʻu iá. Kole kia Sihova ke ne tokoniʻi koe ke ke ikuʻi ha fakafaingataʻaʻiaʻanga pē. Pea ʻi hoʻo fai peheé, te ke fakatuʻotuʻa atu ke fiefia ʻi he feohi māfana mo ho fanga tokouá mo e fanga tuofāfiné pea ke fanongo ki he ngaahi lea ʻo e moʻui taʻengatá mei heʻetau Tamai fakahēvani anga-ʻofá, ʻa Sihova.—Fakafehoanaki mo Sione 6:68.
[Puha ʻi he peesi 3]
Ngaahi Taimi ʻo e Polokalamá
Falaite mo e Tokonaki
9:30 pongipongi–5:00 efiafi
Sāpate
9:30 pongipongi–4:00 efiafi