Fakataha-Lahi Fakavahe 2007 “Muimui ʻia Kalaisi!” ʻa e Kau Fakamoʻoni ʻa Sihová
1, 2. (a) Naʻe anga-fēfē hono fakalototoʻaʻi ʻe Mōsese ʻa e kau ʻIsilelí ke nau maʻu ʻaonga mei he fakatahataha fakatahá? (e) Ko e hā ʻa e ngaahi teuteu ʻoku fiemaʻu ke tau kamata fai he taimi ní?
1 Naʻe ʻoange ʻe Mōsese ʻa e fakahinohino ki he kau ʻIsileli mo e kau muli kotoa ke nau fakatahataha fakataha ʻi he taʻu hono fitu kotoa pē ke lau kia kinautolu ʻa e Laó. Ko e hā ʻa e taumuʻá? “Koeʻuhi ke nau fanongoa, pea koeʻuhi ke nau maʻu akonaki.” (Teu. 31:10-12) Naʻe ʻafioʻi ʻe Sihova ʻa e fiemaʻu ke fakatahataha ʻa hono kakaí ʻi he ngaahi kulupu lalahi. ʻOku vavé ni ke toe fakatahataha ʻa e kakai ʻa Sihová ki he ngaahi Fakataha-Lahi Fakavahe ʻaho ʻe tolu “Muimui ʻia Kalaisi!”
2 Kuo kamata ʻa hoʻo ngaahi teuteú? ʻE fiemaʻu ke ke kole ha taimi ʻatā mei hoʻo pule ngāué? ʻE lava ke ke tokoni ki hoʻo kau ako Tohi Tapú pe ko e ngaahi mēmipa taʻetui ʻi he fāmilí ke mou maʻu ʻa e fakataha-lahí? ʻOku ʻi ai ha niʻihi ʻi he fakatahaʻangá ʻoku fiemaʻu tokoni ke maʻu ʻa e fakataha-lahí? ʻOkú ke fokotuʻutuʻu ke maʻu ha fakataha-lahi kehe mei he fakataha-lahi ʻoku vaheʻi ki ai ʻa hoʻo fakatahaʻangá? Te ke fiemaʻu ke nofo ʻi ha mōtele? Ko e fakamatala ko ʻení ʻe tokoni ia ki hoʻo teuteú.
3. (a) Ko e hā hono fakahoko ʻi he ʻahó ni ʻo e Aisea 25:6? (e) Ko e hā kuo fakatokangaʻi fekauʻaki mo e maʻu fakataha-lahi he Falaité, pea ko e hā ʻoku totonu ke tau fai fakafoʻituituí?
3 Maʻu ʻa e ʻAho Kotoa ʻe Tolú: ʻOku tokonaki ʻe Sihova ha meʻakai fakalaumālie lahi maʻa hono kakaí. (Ai. 25:6) ʻOku kau heni ʻa e kātoanga kai fakalaumālie ʻoku teuteu ʻi heʻetau ngaahi fakataha-lahi fakataʻú. Kuo fakatokangaʻi ko e kau maʻu fakataha he Falaité ʻoku fuʻu tokosiʻi ange ʻi he Tokonakí mo e Sāpaté. ʻAi ko hoʻo taumuʻá ia ke ke maʻu ʻa e ʻaho kotoa ʻe tolu ʻo e fakataha-lahi fakaivifoʻou kuo teuteu maʻa kitautolu ʻe he kautaha ʻa Sihová! Kapau ʻoku fiemaʻu ke ke kole ha taimi ʻatā mei hoʻo ngāue fakamatelié, fai ha lotu fekauʻaki mo ia. Pea ʻai ke ke ‘loto-toʻa’ ke talanoa mo hoʻo pule ngāué ʻi hano fanongonongo atu pē ʻa e ʻaho ki he fakataha-lahí. (1 Tes. 2:2, NW; Nehe. 2:4, 5) ʻE tokoni nai kapau te ke fakamatalaʻi kiate ia ko e fakataha-lahi fakataʻú ko e konga ia ʻo hoʻo lotú. Ko hono fai tōmuʻa ʻení ʻe faingofua ange ai ki hoʻo pule ngāué ke fai ha feʻunuʻaki kae tali ʻa hoʻo kolé.
4. ʻE lava fēfē ke tau teuʻi ʻa ʻetau kau ako Tohi Tapú mo e ngaahi mēmipa taʻetui ʻo e fāmilí ki he fakataha-lahí?
4 Teuteu Hoʻo Kau Ako Tohi Tapú mo e Fāmilí: Ko ha meʻa fakafiefia ia ke ke kau fakataha mo hoʻo kau ako Tohi Tapú ʻi hono maʻu ʻa e fakataha-lahí, ʻo aʻusia tonu ʻa e māfana ʻo ʻetau fetokouaʻaki faka-Kalisitiane “ʻi he fakataha lahi”! (Sāme 22:25) Fakahā tokamuʻa ʻaupito ia kia kinautolu kae lava ke nau maʻu ha taimi ke kau ki ai. Fakahā kia kinautolu ʻa e ngaahi ʻuhinga ʻokú ke fiefia ai ʻi hono maʻu ʻa e ngaahi fakataha-lahí. ʻE lava ke ke teuʻi ʻa e kau akó ki he meʻa ke nau ʻamanekiná ʻaki hono huluʻi ʻa ʻetau ngaahi foʻi vitiō ʻoku ʻasi ai ʻa e ngaahi konga fekauʻaki mo e ngaahi fakataha-lahi ki muʻá, kae tautefito ki he foʻi vitiō United by Divine Teaching. ʻAi ke toe ʻilo ʻe he ngaahi mēmipa taʻetui ʻi he fāmilí ʻa hoʻo ngaahi fokotuʻutuʻú. Mahalo ʻe lava ke nau fokotuʻutuʻu ke sio ʻi he tulamá pe maʻu ha ʻaho pē nai ʻe taha ʻo e fakataha-lahí.
5, 6. (a) ʻE lava fēfē ke tau fakahāhā ʻa e laumālie nima-homo naʻe lave ki ai ʻi he 1 Timote 6:18? (e) Ko e hā ʻa e tokonaki ʻoku fai ke tokoni ki ha niʻihi ʻoku nau fiemaʻu nai ha nofoʻanga?
5 Tokoniʻi Ho Fanga Tokouá mo e Tuofāfiné: Naʻe naʻinaʻi ʻa e ʻapositolo ko Paulá ki he kau Kalisitiane ko ia naʻa nau koloaʻia fakamatelié “ke nau ngāue ʻaonga, ke nau koloaʻia ʻi he ngāue lelei, ke nau nimahomo ʻo [angafietokoni].” (1 Tim. 6:17, 18) Te tau lava ke fakahāhā ʻa e laumālie nima-homo naʻe poupouʻi ʻe Paulá kapau te tau fakakaukau ki he kau taʻumotuʻá mo e mahamahakí, faʻahinga ʻi he ngāue taimi-kakató, ngaahi fāmili mātuʻa pē ʻe tahá, pea mo ha niʻihi nai ʻi he fakatahaʻangá te nau fiemaʻu ha tokoni ke maʻu ʻa e fakataha-lahí. Ko hono fakahoko ʻa e ngaahi fiemaʻu ʻa e faʻahinga peheé ko e ʻuluaki fatongia ia ʻo e ngaahi kāinga ʻi he moʻoní, ka ʻi he ʻiloʻilo ʻa e kau mātuʻá mo e niʻihi kehé ʻe lava ke fai ha tokoni anga-ʻofa ʻoku fiemaʻú.—Kal. 6:10; 1 Tim. 5:4.
6 Kapau ʻoku fiemaʻu ʻe ha taha ʻi he fakatahaʻangá ha nofoʻanga, ʻoku totonu ke fakapapauʻi ʻe he Kōmiti Ngāue ʻa e Fakatahaʻangá pe ʻoku taau ʻa e tokotaha malangá ke ne ʻoatu ha foomu Special Needs Room Request.
7. Ko e hā ʻa e ngaahi fakahinohino ʻoku ʻomai kapau ʻoku tau fiemaʻu ke maʻu ha fakataha-lahi kehe mei he fakataha-lahi ʻoku vaheʻi ki ai ʻetau fakatahaʻangá?
7 Maʻu ha Fakataha-Lahi Kehe: Ko e Taua Leʻo ʻo Maʻasi 1, 2007 ʻe ʻi ai ha lisi ʻo e fakataha-lahi kotoa ʻi he malumalu ʻo e vaʻa ʻo Nuʻu Silá. Kapau ʻokú ke fiemaʻu ha toe fakamatala fekauʻaki mo ha fakataha-lahi kehe mei he fakataha-lahi ʻoku vaheʻi ki ai ʻa hoʻo fakatahaʻangá, te ke tohi nai ki he faʻahinga ʻoku nau fokotuʻutuʻu ʻa e fakataha-lahi ko iá, ʻo ngāueʻaki ʻa e tuʻasila ko ia ʻe maʻu ʻe he sekelitali ʻa e fakatahaʻangá ʻi mui ʻi he tuʻa foomu fakamuimui ʻo e Special Needs Room Request. Koeʻuhí ke fai mai ʻe he faʻahinga ʻoku nau fokotuʻutuʻu ʻa e fakataha-lahi ko iá ha tali kiate koe, fakapapauʻi ke faʻo fakataha mo hoʻo tohí ha sila kuo ʻosi fakasitapa mo fakatuʻasila.
8, 9. (a) Ko e hā ʻa e ngaahi teuteu kuo fai maʻatautolu ki muʻa ke tau aʻu ki he faiʻanga fakataha-lahí? (e) ʻE lava fēfē ke tau fakahā ʻa e houngaʻia ki he ngāue kotoa kuo fai maʻatautolú? (Lau ʻa e Hepelu 13:17.)
8 Ngāue Fāitaha mo e Fokotuʻutuʻú: ʻI heʻetau aʻu ki he faiʻanga fakataha-lahí, ʻoku hā mei ai ʻa e ngāue lahi naʻe fai ʻi hono teuteu ia ki heʻetau aʻu atú. ʻOku talitali lelei kitautolu ʻe he fanga tokoua fai fakanofonofó, ʻo ʻomai ʻa e ngaahi lauʻi polokalama pea tokoni mai ke maʻu haʻatau ngaahi nofoʻanga. Kuo fakamaʻa ʻe he fanga tokouá mo e fanga tuofāfiné ʻa e falé pea teuteuʻi fakaʻofoʻofa ʻa e siteisí. Naʻe toe fakahoko foki mo e ngāue mātuʻaki mahuʻinga ki hono teuteu ʻa e ngaahi konga ki he polokalamá pea tokangaʻi mo e ngaahi meʻa fakaikiiki kehe.
9 ʻI he fakataha-lahi taki taha, kuo ngāue ai ʻa e faʻahinga tāutaha tokolahi ʻi ha ngaahi māhina ke fai ʻa e ngaahi fokotuʻutuʻu ʻoku fiemaʻú, pea kuo toe tokoni foki mo honau ngaahi fāmilí ʻaki hono fakaʻataʻatā kinautolu ke tokangaʻi ai ʻa e ngaahi meʻa mahuʻinga ko iá. ʻIkai ʻoku tau houngaʻia ʻi he ngaahi feilaulau kuo fai ke tau maʻu ʻaonga fakafoʻituitui aí? ʻE lava ke tau fakahā ʻetau houngaʻiá ʻaki ʻa e fai ki he ngaahi fakahinohino ʻi he kupu ko ʻení pea pehē ki ha toe fakahinohino te tau maʻu nai ki muʻa ʻi heʻetau fakataha-lahí. (Hep. 13:17) Ko e fengāueʻaki loto-lelei ʻa e tokotaha kotoa pē ʻoku malava ai ʻa e meʻa kotoa pē “ke fai ke tāu mo māu.”—1 Kol. 14:40.
10. (a) Ko e hā ʻoku mātuʻaki mahuʻinga ai ʻi hotau taimí ʻa e ngaahi fakatahataha ʻa e kakai ʻa Sihová? (e) Ko e hā ʻe lava ke fai ʻe kitautolu taki taha he taimi ní?
10 ʻI heʻetau “sio ki he fakaofiofi mai ʻa e ʻaho,” ko e fakatahataha ʻa e kakai ʻa e ʻOtuá ʻoku toe mahuʻinga ange. (Hep. 10:25) ʻI heʻetau ngaahi fakataha-lahi faka-Kalisitiané, ʻoku tokonaki mai maʻatautolu ʻe he kalasi tamaioʻeiki anga-tonu mo potó ha fakamatala ke tokoniʻi kitautolu ke tau “tokaga ke fai ae gaahi lea kotoabe” ʻa ia ʻoku finangalo ʻa Sihova ke tau muimui aí. (Teu. 31:12, PM) Kamata leva he taimí ni ke fai ʻa e ngaahi fokotuʻutuʻu ke maʻu ʻa e ʻaho kotoa ʻe tolu ʻo e Fakataha-Lahi Fakavahe “Muimui ʻia Kalaisi!” pea maʻu ʻaonga ai mei he fakahinohino fakalaumālie kotoa pē pea mo e feohi fiefiá!
[Puha ʻi he peesi 3]
Taimi ʻo e Polokalamá
Falaite mo e Tokonaki
9:20 pongipongi - 5:05 efiafi
Sāpate
9:20 pongipongi - 4:10 efiafi