Fakataha-Lahi Fakavahe ʻa e Kau Fakamoʻoni ʻa Sihová ki he 2008
1. (a) Ko e hā ʻoku fakavavevave makehe ai he ʻahó ni ʻa e akonaki ʻa Paula ki he kau Kalisitiane Hepeluú? (Lau ʻa e Hepelu 10:24, 25.) (e) Ko e hā ʻa e faingamālie te tau maʻu ke ngāueʻaki ai ʻa e akonaki ʻa Paulá?
1 Naʻe naʻinaʻi ʻa e ʻapositolo ko Paulá ki he kau Kalisitiane Hepeluú ke nau fakatahataha fakataha pea fefakalototoʻaʻaki “pea ʻasili” ʻi heʻenau sio ki he fakaofiofi mai ʻa e ʻahó. (Hep. 10:24, 25) ʻOku ʻi ai ʻa e fakamoʻoni lahi ko e “ʻaho” ko ia naʻe lea ki ai ʻa Paulá ʻoku fuʻu ofi ʻaupito! Ko ia ai, ʻoku tau fakatuʻotuʻa atu ki he ngaahi faingamālie ke fakatahataha ai mo hotau fanga tokouá mo e fanga tuofāfiné ki he fakahinohino fakalaumālie ʻe lava ke ne tataki kitautolu ʻi he “kuonga fakamui” fakatuʻutāmaki fakautuutu ko ʻení. (2 Tim. 3:1) Ko ha faingamālie pehē ʻe ala maʻu ia ʻi he ngaahi fakataha-lahi fakavahe ki he 2008.
2. (a) Ko e hā ʻoku mātuʻaki mahuʻinga ai ke maʻu ʻa e ʻaho kotoa ʻe tolu ʻo e fakataha-lahí? (e) ʻOku totonu ke anga-fēfē ʻetau kamata teuteu ke maʻu ʻa e fakataha-lahí?
2 Maʻu ʻa e ʻAho Kotoa ʻe Tolú: ʻOku mau fakalototoʻaʻi koe ke ke maʻu ʻa e ʻaho kotoa ʻe tolú. ʻI he ʻikai “liʻaki ʻetau ngaahi fakataha,” ʻe ʻikai te tau tō ai mei ha meʻakai fakalaumālie mātuʻaki mahuʻinga. (Hep. 10:25) Kamata teuteu leva ki ai ʻi he vave tahá. ʻE fiemaʻu ke ke fakahā ia ki muʻa ki hoʻo pule ngāué koeʻuhi ke ne lava ʻo fai ha fokotuʻutuʻu ʻo ka fiemaʻu. Kapau ʻe kei ako hoʻo fānaú lolotonga ʻa e taimi ʻo e fakataha-lahí, fakahā hoʻo ngaahi palaní ki heʻenau kau faiakó. ʻAi ke nau ʻilo ko e fakataha-lahí ko ha konga tuʻumaʻu ia ʻo hoʻo lotú. Te ke lava ke fakapapauʻi ai ʻa e tāpuaki ʻa Sihova ki hoʻo ngaahi feinga ke fakamuʻomuʻa ʻa e ngaahi meʻa ʻo e Puleʻangá.—Mt. 6:33.
3. ʻI he ngaahi founga fē te tau fakahāhā nai ai ʻa e tokanga ki he niʻihi kehé?
3 Tokoniʻi ha Niʻihi ke Maʻu Ia: Naʻe toe kole ʻe Paula ki hono fanga tokouá ke ‘nau fetokangaʻaki.’ (Hep. 10:24) ʻOku fiemaʻu ʻe he fanga tokoua mo e fanga tuofāfine ʻi hoʻo Kulupu Ako Tohi ʻa e Fakatahaʻangá ha tokoni ke maʻu ʻa e fakataha-lahí? ʻE lava ke ke tokoniʻi hoʻo kau ako Tohi Tapú ke nau maʻu ʻa e fakataha-lahí fakataha mo koe, naʻa mo ʻenau maʻu ha ʻaho pē ʻe taha? ʻI hoʻo fakahā ki he ngaahi mēmipa ho fāmilí ʻoku ʻikai ko ha Kau Fakamoʻoní ʻa hoʻo ngaahi palani ki he fakataha-lahí, fakaafeʻi kinautolu ke nau ō fakataha mo koe. Ko hoʻo ngaahi feinga anga-ʻofá te ke maʻu nai ai ha ngaahi tāpuaki taʻeʻamanekina.
4. ʻE lava fēfē ke tau maʻu ha fakamatala fekauʻaki mo e ngaahi ʻaho mo e ngaahi feituʻu ʻo e ngaahi fakataha-lahi fakavahé?
4 Maʻu Fakamatala: ʻOku maʻu ʻe he ʻōfisi vaʻá ʻa e ngaahi telefoni lahi ʻi he taʻu taki taha ʻo ʻeke ʻa e taimi mo e feituʻu ʻe fai ai ʻa e ngaahi fakataha-lahí. Meimei ko e ngaahi telefoni ko ʻení mei he fanga tokoua mo e fanga tuofāfine kuo nau ʻosi maʻu ʻa e fakamatala ko ʻení. Ki muʻa ke fai ha telefoni ki he ʻōfisi vaʻá, ʻoku mau fokotuʻu atu ke ke ʻuluaki sio ki he Taua Leʻo ʻo ʻEpeleli-Sune 2008.
5. Ko e hā ʻoku totonu ke tau faí kapau ʻoku tau fiemaʻu ha fakamatala fekauʻaki mo e nofoʻangá ki ha fakataha-lahi ʻoku ʻikai vaheʻi ki ai ʻetau fakatahaʻangá?
5 Kapau te ke maʻu ha fakataha-lahi ʻoku ʻikai ko e taha ko ia ʻoku vaheʻi ki ai hoʻo fakatahaʻangá, te ke maʻu nai ʻa e fakamatala ki he nofoʻangá ʻi hoʻo tohi ki he tuʻasila ʻo e fakataha-lahí ʻa ia ʻoku hā ʻi he tuʻa foomu Special Needs Room Request fakamuimuí. ʻE ʻoatu ʻa e ngaahi foomu ko ʻení ki he kau sekelitali ʻo e fakatahaʻangá. Ke maʻu ha talí, fakapapauʻi ke faʻo ʻi hoʻo tohí ha sila kuo ʻosi fakasitapa mo fakatuʻasila.
6. Ko e hā ha fakamanatu fekauʻaki mo e foomu Special Needs Room Request?
6 Ngaahi Fiemaʻu Makehe: Kapau ʻe kole ʻe ha tokotaha malanga ha tokoni fekauʻaki mo hono maʻu ha nofoʻanga, ʻoku totonu ke fakapapauʻi ʻe he Kōmiti Ngāue ʻa e Fakatahaʻangá pe ʻoku taau ʻa e tokotaha malangá ke maʻu ha foomu Special Needs Room Request.
7. (a) ʻI he ngaahi founga fē te tau fakalāngilangiʻi nai ai ʻa Sihova ʻi heʻetau maʻu ʻetau fakataha-lahí? (e) Koeʻuhi ko e ʻulungāanga lelei ʻa hotau fanga tokouá, ko e hā ʻa e fakamatala kuo fai ʻe ha kau ngāue hōtele?
7 Ngaahi Ngāue Lelei: Ko e talangofua ki he fekau ʻa Sihova ke fakatahataha fakataha ki he lotú ʻoku fakamafeia ai kitautolu ke tau ‘fai meʻa ʻaonga’ ai. Ko e meʻa mahuʻinga angé, ʻoku ʻomai ai ʻa e ngaahi faingamālie ke fakalāngilangiʻi ʻa e huafa ʻo Sihová. (Ai. 48:17) ʻOku ‘eʻa ʻetau ngaahi ngaue leleí’ ki he kakai tokolahi ʻi he ngaahi fakataha-lahi fakavahé, pea kuo ueʻi ai ʻa e niʻihi ke nau fakahaaʻi ʻenau ongoʻí. (1 Tim. 5:25) ʻI he kolo lahi ʻe taha ʻa ia naʻe fai ai ʻetau ngaahi fakataha-lahí ʻi he ngaahi taʻu lahi, naʻe fakahaaʻi ai ʻe ha pule hōtele: “ʻOku talanoa ʻa e kakai tokolahi ʻi he koló ni fekauʻaki mo e Kau Fakamoʻoni ʻa Sihová mo e kaunga kia kimautolu ʻa hoʻomou ngaahi fakataha-lahí. ʻOku mau lāuʻilo ki hono fakamaʻa ʻe hoʻomou kakaí ʻa e holo fakakoló, pea mo ʻemau siofi hoʻomou fakamaʻa ʻa e ngaahi tauʻanga meʻalelé. ʻOku fakafiefia kia kimautolu ʻa hoʻomou ʻi heni lolotonga ʻa e faʻahitaʻu māfaná. ʻOku mau fakaʻamu ʻe lava ke hokohoko atu ʻetau feohí ʻi he ngaahi taʻu ka hoko maí.” Hili ʻa e lave ki he ngaahi faingataʻa naʻe hoko ʻi he ngaahi kulupu kehe mo e kau sitā naʻe nofo aí, naʻe fakaongoongoleleiʻi ʻe ha pule hōtele ʻa e laumālie fengāueʻaki mo e kātaki naʻe fakahāhā ʻe hotau fanga tokouá he lolotonga ʻo ʻenau nofo hōtelé. Naʻá ne pehē, “Taumaiā naʻe hangē ʻemau kau ʻaʻahí kotoa ko e Kau Fakamoʻoni ʻa Sihová!” Ko e ʻulungāanga ʻo hotau fanga tokouá ʻa ia naʻe iku atu ai ki he meʻá ni mo ha ngaahi fakamatala meimei tatau mo iá kuo pau naʻe fakafiefiaʻi ai ʻa e loto ʻo hotau ʻOtua ko Sihová!
8. ʻOku anga-fēfē ʻa hono fakamamafaʻi ʻe he Mātiu 4:4 ʻa e mahuʻinga ʻo e tokangataha ki he konga taki taha ʻo e polokalamá?
8 Naʻe pehē ʻe Sīsū ko ʻetau moʻuí tonu ʻoku fakatuʻunga ia ʻi he fanongo ki he “ngāhi folofola kotoa pe ʻoku ʻalu atu mei he fofonga ʻo e ʻOtua.” (Mt. 4:4) ʻI heʻetau ngaahi fakataha-lahi fakataʻú, ʻoku tokonaki mai ai ʻe Sihova ʻa e “mea kai [fakalaumālié] i hono taimi totonu,” ʻa ia kuo teuteuʻi ʻe he “tamaioeiki agatonu mo boto.” (Mt. 24:45, PM) Kuo fai ʻa e ngāue lahi ki hono teuteu mo ʻoatu ʻa e fuʻu meʻakai fakalaumālié ni. ʻOfa ke tau fakahaaʻi ʻetau houngaʻia ki he tokanga ʻofa ʻa Sihová ʻaki ʻetau ʻi ai pea tokangataha ki he konga taki taha ʻo e polokalamá.
[Puha ʻi he peesi 3]
Taimi Polokalamá:
Falaite mo e Tokonaki
9:20 pongipongi - 4:55 efiafi
Sāpate
9:20 pongipongi - 4:00 efiafi