Fakataha-Lahi Fakavahe 2003 “ʻAve ki he ʻOtuá ʻa e Lāngilangí” ʻa e Kau Fakamoʻoni ʻa Sihová
1 Fakafou ʻi heʻene palōfita loto-tōnunga ko ʻAiseá, naʻe fekau ʻe Sihova: “Fanongo kiate au, ʻa hoku kakai; pea fokotuʻu telinga mai, ʻa e faʻahi aʻaku.” (Ai. 51:4) ʻI he taimi faingataʻa fakautuutu ko eni ʻo e ngataʻangá, ʻikai ʻoku tau loto-tatau ko e fanongo ki he ngaahi fekau ʻa Sihová ʻoku mahuʻinga lahi ange ia ʻi ha toe taimi ki muʻa? Ko e taha ʻo e ngaahi founga ʻoku tau “fokotuʻu telinga” ai kia Sihová ko e talangofua ki heʻene fekau ke fakatahataha ki he lotú. He fakatuʻotuʻa moʻoni ē ko kitautolu ki he faingamālie makehe ʻoku lava ke ʻomai ʻe heʻetau ngaahi fakataha-lahi fakavahe fakataʻú! Ko e Kulupu Pule ʻa e Kau Fakamoʻoni ʻa Sihová kuó ne toe fokotuʻutuʻu ha ngaahi fakataha-lahi fakavahe ke fai ʻi he feituʻu ʻo e vaʻa ʻi Nuʻu Silá ʻi he 2003.
2 Hangē ko ia naʻe fakahaaʻi ʻi he ʻīsiu ʻo e Taua Leʻo ʻo Siulai 1, 2002, ʻe toe fai mo e ngaahi fakataha-lahi fakavahaʻapuleʻanga ʻi ha ngaahi kolo lalahi kuo fili, ʻo kau ki ai ʻa e kau fakafofonga mei he māmaní takatakai. Koeʻuhi ko ha lahi fakangatangata pē ʻo e ngaahi kolo lalahí te nau talitali ʻa e ngaahi fakataha-lahi fakavahaʻapuleʻangá, ko e ngaahi fakatahaʻanga pē kuo vaheʻi ki he ngaahi fakataha-lahi ko iá ʻe malava ke nau kau ki aí. Ka ko e ʻatimosifia fakavahaʻapuleʻangá ʻe aʻusia ia ʻi he ngaahi fakataha-lahi fakavahe kotoa pē. ʻE ʻi ai ʻa e kau misinale ʻi he fakataha-lahí ʻi he ngaahi feituʻu lahi, pea ʻe ʻi ai ha faingamālie ke fanongo ai ki he niʻihi ʻo e ngaahi meʻa naʻa nau hokosiá. Ko e hā ʻe lava ke tau fai ke maʻu ʻaonga kakato ai mei he ngaahi fokotuʻutuʻu ʻoku fai he taimí ni ki heʻetau ngaahi fakataha-lahí?
3 Maʻu Ia ʻi he ʻAho Kotoa Pē: Ke maʻu ʻaonga kakato mei he fakahinohino ʻoku tokonaki mai fakafou ʻi he kalasi tamaioʻeiki anga-tonu mo potó, ʻoku tau loto ke fakapapauʻi ʻoku tau ʻi ai ʻi he polokalamá kotoa. (Mt. 24:45, PM) ʻOku fiemaʻu ke ke kole ki ho pule ngāué ha taimi ʻatā ke maʻu ʻa e ʻaho kotoa pē ʻo e fakataha-lahí? Ki muʻa ke kole ʻa Nehemaia kia Tuʻi ʻAtasease ki ha ngofua ke ʻalu ki Selusalema ke toe langa ʻa e ngaahi ʻaá, naʻá ne “lotu ki he ʻOtua ʻo Langi.” (Nehe. 2:4) ʻOku pehē pē ʻa e totonu ke ke lotu kia Sihova ki ha loto-toʻa ke kole ai ki ho pule ngāué ha taimi ʻatā ke maʻu ʻa e ʻaho kotoa ʻe tolu ʻo e fakataha-lahí. Fēfē kapau ʻoku toumoua ho pule ngāué ke tuku atu hao taimi ʻatā? Mahalo pē ko hono fakamatalaʻi ange ko e fakahinohino ʻoku tau maʻu ʻi heʻetau ngaahi fakataha-lahí ʻoku tokoniʻi ai kitautolu ke tau hoko ko e kau ngāue faitotonu, tōtōivi, mo falalaʻangá ʻe tokoni ia ki ai ke ne tali lelei. Tānaki atu ki ai, kapau ʻoku ʻi ai ha ngaahi mēmipa taʻetui ʻi hotau fāmilí, ʻe hoko ko ha anga-ʻofa ia ke fakahā kia kinautolu ʻa ʻetau ngaahi palani ki heʻetau fakataha-lahí ʻi he vave taha ʻe ala lavá.
4 Ko Hono Fai Hoʻo Ngaahi Fokotuʻutuʻu ki he Nofoʻangá: Ko e tokolahi taha ʻo e kau malangá ʻoku nau tokanga ki he fakahinohino mahino kuo fai ʻi he ngaahi taʻu siʻi kuo maliu atú ʻi he fakalahi ki he fakataha-lahí ʻi he ʻEtau Ngāue Fakafaifekau ʻo e Puleʻanga ʻo Meé, pea ʻoku hokosia ai ʻa e ngaahi ola lelei lahi. Kae kehe, ʻoku kei fiemaʻu pē ke kole ki he tokotaha kotoa ke KĀTAKI ʻO NGĀUEʻAKI ʻA E FAKAHINOHINO KO ENÍ KI HONO MAʻU ʻA E NGAAHI NOFOʻANGA MŌTELÉ:
(a) Kātaki ʻo ʻoua ʻe taʻofi ha mōtele ʻa ia ʻoku ʻikai te ke fakataumuʻa ke ngāueʻaki pe ko ha mōtele lahi ange he tahá ʻi he fakakaukau ki hono ʻuluaki vakaiʻi ʻa e mōtele taki taha pea toki filiʻi leva ʻa e mōtele ʻoku lelei tahá, kae kaniseli ʻa e ʻū mōtele kehé. (Mt. 5:37) Ko e taʻeʻofa ʻeni, pea ʻoku taʻofi ai ʻa e ʻū mōtelé mei he maʻu ʻa e pisinisi naʻe mei malava ke nau maʻú. ʻOku toe taʻofi foki ai mei he kau malanga kehé ʻa hono ngāueʻaki ʻa e ngaahi loki ko iá, ʻa ia ʻoku faʻa mātuʻaki fiemaʻú.
(e) ʻOua ʻe taʻofi ha ngaahi loki mōtele maʻau pe ki ha niʻihi kehe ʻo ʻikai ke fakahā ʻa e ngaahi hingoá mo ʻave leva ʻa e ngaahi tipōsiti ki he loki taki taha. ʻI he ʻikai ha tipōsití, ʻoku ʻi ai leva ʻa e totonu ʻa e mōtelé ke ʻoange ho lokí ki ha taha kehe.
(f) ʻOua ʻe ʻai ha kakai tokolahi ange ke nau nofo ʻi he lokí ʻo tokolahi ia mei he lao pea mo e meʻa ʻoku fakaʻatā ʻe he fokotuʻutuʻú, ʻa ia ʻoku faʻa angamaheniʻaki ke ʻoua ʻe toe laka hake he toko fā pē pe ko e toko nima, ʻo kau ai ʻa e fānaú. Manatuʻi, ʻokú ke totongi ha mahuʻinga ʻoku fakatatau ki he lahi ʻo e faʻahinga naʻá ke LOTO ke ʻi he lokí.
(h) ʻOua ʻe lēsisita ki muʻa ʻi he 1:00 efiafi pe ko e hā pē ʻa e founga ngāue ʻa e mōtelé. Te ke lēsisita nai hili ʻa e polokalama ʻo e ʻaho ko iá, koeʻuhi he ʻoku maluʻi ʻe hoʻo tipōsití ho lokí.
(i) ʻOua ʻe feimeʻatokoni pe fakamafana meʻakai ʻi he lokí tuku kehe ka ʻoku ʻi ai hano peito ki he taumuʻa ko iá, pea ke tokanga ke ʻoua ʻe ʻuliʻi ha meʻa pē ʻi he lokí ʻaki ʻa e meʻakaí.
5 Tokoniʻi ʻa e Faʻahinga ʻOku ʻI Ai ʻEnau Ngaahi Fiemaʻu Makehé: ʻOku ʻi ai ha niʻihi ʻi hoʻo fakatahaʻangá ʻoku nau fiemaʻu nai ha tokoni ki hono maʻu ʻa e fakataha-lahí? Ko e ngaahi fiemaʻu makehe ʻa e kau taʻumotuʻá, ko e kau vaivaí, pe ko e faʻahinga ʻi he ngāue taimi-kakató ʻoku tokangaʻi lahi ia ʻe honau ngaahi kāinga Kalisitiané, ka ko e kau mātuʻá mo e niʻihi kehe ʻoku nau lāuʻilo fekauʻaki mo e ngaahi tuʻunga ʻo e faʻahinga peheé ʻe lava foki ke nau fai ha tokoni ʻofa.
6 Ko e Kōmiti Ngāue ʻa e Fakatahaʻangá te ne vakaiʻi ʻa e Ngaahi Kole Loki Makehe kotoa ʻoku ʻoatu ʻe he kau malangá. ʻI hono ngāueʻaki ʻa e fakahinohino ʻoku fakahaaʻi ʻi he fōmú, ʻoku totonu ke fakapapauʻi ʻe he kōmiti ngāué pe ko e kole taki taha ko ha fiemaʻu makehe ia ʻa ia ʻe ʻikai lava ke tokangaʻi fakalotofonua. Ko e tokonaki peheé ʻoku maʻá e kau malanga pē ʻoku ʻi he tuʻunga leleí, fakataha mo ʻenau fānau anga-maau. Ko e Potungāue Nofoʻangá te nau fetuʻutaki ki he sekelitali ʻa e fakatahaʻangá kapau ʻe ʻi ai haʻanau ngaahi fehuʻi fekauʻaki mo ha kole ki ha ngaahi fiemaʻu makehe.
7 Ko Kitautolú ko e Siofiaʻanga: ʻOku sio ʻa e kakaí ki he faikehekehe ʻi he vahaʻa ʻo e Kau Fakamoʻoni ʻa Sihová mo e faʻahinga ʻi he māmani ko ení? ʻAupito! Fakatokangaʻi ange ʻa e ngaahi fakamatala mei he kau pule hōtele ʻi he kolo lahi ʻe taha: “Kuo mau fengāueʻaki maʻu pē mo e ngaahi fakataha-lahi, ka ko e faʻahinga ngāue fāitaha mo anga-lelei tahá kimoutolu.” “ʻI he uike kuo ʻosí naʻe ʻi heni ai ha kulupu lotu ʻe taha. ʻOku hā mahino ʻa e faikehekehe ʻiate kimoutolu mo kinautolú.” “ʻOku mau ʻiloʻi ʻe lava ke mau falala maʻu pē ki hoʻomou tokoní mo e ngāue fāitahá.” ʻIkai ʻoku tokoniʻi kitautolu ʻe he ngaahi fakamatala peheé ke tau ʻiloʻi ʻa e anga ʻo e kaunga lelei ʻa e “poto ʻoku mei ʻolunga” ki hotau angaʻitangatá? (Sem. 3:17) Koeʻuhi ko kitautolú “koe jiofiaaga o mamani,” ʻofa ke tapua atu ʻi hotau ʻulungāngá ʻi he taimi kotoa pē ʻa e ngeia mo e lāngilangi ʻa hotau ʻOtua, ko Sihová.—1 Kol. 4:9, PM.
8 Koeʻuhi “kuo kamata liliu ʻa e anga ʻo e maama ko eni,” ʻoku tau fiemaʻu ʻetau ngaahi fakataha-lahi fakavahé ke tokoniʻi kitautolu ke tau nofoʻaki tokangataha fakalaumālie. (1 Kol. 7:31) Ko hono fai ʻa e ngaahi fokotuʻutuʻu ke maʻu ia ʻi he ʻaho kotoa peé ʻe fiemaʻu ki ai ʻa e feinga, ka ʻoku tuha lelei mo ia. Ko e Fakataha-Lahi Fakavahe “ʻAve ki he ʻOtuá ʻa e Lāngilangí” ʻo e taʻu ní kuo teuteu ia ke ne tokoniʻi kitautolu ke tau hanganaki tuʻumaʻu ʻi heʻetau tatali ki hono fakahoko ʻo e fakamaau ʻa Sihova ki he māmani ʻo Sētané. ʻOfa ke ʻoua te tau tuku ke taʻofi kitautolu ʻe ha meʻa mei hono maʻu ʻa e fakahinohino kuo teuteu ʻe Sihova maʻatautolú.—Ai. 51:4, 5.
[Puha ʻi he peesi 3]
Taimi ʻo e Polokalamá
Falaite mo e Tokonaki
9:30 pongipongi - 5:00 efiafi
Sāpate
9:30 pongipongi - 4:05 efiafi
[Puha ʻi he peesi 4]
FEITUʻU ʻAHO NGAAHI SĒKETI
TONGA Sep. 26-28, 2003 10 Konga (Tonga)
Nukuʻalofa
Holo Fakamanatu Kuini Sāloté
Mateialona Road
(Faka-Tonga, faka-Pilitānia ʻe niʻihi)
LEA FAKA-HAʻAMOA ʻOk. 3-5, 2003 11 (Auckland Samoan,Avondale
South Auckland Assembly Hall Samoan, Christchurch Samoan,
160 Clevedon Road,Papakura Manukau Samoan, Manurewa
Samoan, Porirua Samoan)
PALMERSTON NORTH—1 ʻOk. 10-12, 2003 3A, 3B, 3C
Manawatu Sports Stadium,
Pascal Street, Palmerston North
PALMERSTON NORTH—2 ʻOk. 17-19, 2003 4A, 4B, 5A Konga (North and
Manawatu Sports Stadium South Taupo, Turangi), 5C
Pascal Street, Palmerston North
CHRISTCHURCH ʻOk. 24-26, 2003 1A, 1B, 2A, 2B
Westpac Trust Centre
Whiteleigh Avenue, Addington
Christchurch
(Lea-fakaʻilonga foki)
HAMILTON—1 ʻOk. 31-Nōv. 2, 2003 5A Konga (Putaruru, Westbrook
Mystery Creek Events Centre Rotorua, North & South Tokoroa),
Mystery Creek Road, Hamilton 5B, 6A, 6B 7A, 7B, 7C,
10 Konga (Auckland Korean)
HAMILTON—2 Nōv. 7-9, 2003 8A, 8B, 9A, 9B, 10 Konga
Mystery Creek Events Centre (Auckland Chinese, Auckland
Mystery Creek Road, Hamilton Niuean, Auckland Rarotongan,
(Lea-fakaʻilonga foki) Auckland Tongan, Niue Island)
LALOTONGA Nōv. 21-23, 2003 10 Konga (ʻOtu Motu Kuki)
Assembly Hall, Vaimaanga,
Rarotonga, ʻOtu Motu Kuki