Fakataha-Lahi Fakavahe 2005 “Talangofua Fakaʻotua” ʻa e Kau Fakamoʻoni ʻa Sihová
1 ʻI hono tuʻunga ko ʻetau Faiako Maʻongoʻongá, ʻoku fokotuʻutuʻu ʻe Sihova ke tau fakatahataha ke fakahinohinoʻi ki heʻene ngaahi foungá. (Ai. 30:20, 21; 54:13) ʻOkú ne fai ʻeni fakafou ʻi he kalasi tamaioʻeiki anga-tonu mo potó, ʻa ia ʻokú ne fokotuʻutuʻu ʻa e ngaahi fakataha pehē hangē ko ʻetau ngaahi fakataha-lahi fakavahe fakataʻú. (Mt. 24:45-47, PM) Ko ʻetau ngaahi fakakaukaú ʻoku hangē ko ia naʻe maʻu ʻe he tokotaha-tohi-saame ko Tēvitá, ʻa ia naʻá ne hiva: “I he gaahi fakataha oe kakai teu fakafetai kia Jihova.” (Sāme 26:12, PM) Naʻe mahinoʻi māʻalaʻala ʻe Tēvita ʻa e mahuʻinga ʻo hono akoʻi ia ʻe Sihová pea naʻá ne fakapapauʻi ke ne ʻi he haʻohaʻonga ʻo ʻEne kakaí ʻi ha taimi pē naʻa nau fakatahataha ai.
2 Te ke ʻi he haʻohaʻonga ʻo e “gaahi fakataha oe kakai” ʻa ia te nau maʻu ʻa e Fakataha-Lahi Fakavahe “Talangofua Fakaʻotua” ʻo e taʻu ní? Kapau ko ia, ko e ngaahi fakamatala hoko haké ʻe fakamoʻoniʻi ʻene ʻaongá ʻi hoʻo fai ko ia ʻa e ngaahi teuteu ke kau atu ki aí.
3 Palani ʻi he Taimí Ni ke Kau ki Ai he ʻAho Kotoa Pē: “Ko e ngaahi tuʻutuʻuni [pe palani] ʻa e faʻa ngaue ʻoku iku pe ki he maʻu ha meʻa.” (Pal. 21:5) ʻIkai nai ʻoku fakamamafaʻi ʻe he ngaahi lea ko iá ʻa e mahuʻinga ʻo hono fai ʻo e ngaahi palani ʻo ʻikai toe toloi ke kau ki he fakataha-lahí? Ke fakapapauʻi heʻikai te ke tō ʻi ha taha ʻo e polokalama fakaivifoʻou fakalaumālié, kamata fakapotopoto he taimí ni ke fai ha faʻahinga fokotuʻutuʻu pē ʻe fiemaʻu kiate koe ke ke maʻu kotoa ai ʻa e ʻaho ʻe tolú. Kapau ʻoku fiemaʻu ke ke kole ki hoʻo pule ngāué ki ha taimi ʻatā, fai leva ia. Kapau ʻoku fiemaʻu ke ke fetalanoaʻaki ki hoʻo ngaahi palaní mo ho hoa taʻetuí, ʻoua ʻe tatali ki he mōmeniti fakaʻosí. Ko e hā pē ha ngaahi faingataʻa ʻokú ke fetaulaki mo ia, lotu kia Sihova ʻo fekauʻaki mo ia, ʻo falala “ʻe fakaai hoʻo ngaahi fakakaukau [pe palaní]” ʻaki ʻene tokoní. (Pal. 16:3) Tānaki atu ki ai, ʻe lelei ke ke tokoniʻi hoʻo kau ako Tohi Tapú ʻi heʻenau ngaahi teuteu ke nau ʻi ai ʻi he ʻū kongá kotoa.
4 Nofoʻanga: Ko e tokolahi taha ʻo e kau malangá ʻoku nau tokanga ki he fakahinohino mahino ʻa ia naʻe ʻomai ʻi he ngaahi taʻu siʻi kuo maliu atú ʻi he ngaahi fakalahi ki he fakataha-lahí ʻi he ʻEtau Ngāue Fakafaifekau ʻo e Puleʻanga ʻo Meé, pea ʻoku hokosia ai ʻa e ngaahi ola lelei lahi. Kae kehe, ʻoku kei fiemaʻu pē ke kole atu ki he tokotaha kotoa pē ke KĀTAKI ʻO NGĀUEʻAKI ʻA E FAKAHINOHINO HOKÓ KI HONO MAʻU ʻA E NGAAHI NOFOʻANGA MŌTELÉ:
(a) Kātaki ʻoua ʻe taʻofi ha mōtele ʻoku ʻikai te ke fakataumuʻa ke ngāueʻaki pe ko ha mōtele lahi ange he tahá ʻi he fakakaukau ki hano ʻuluaki vakaiʻi ʻa e mōtele taki taha pea toki filiʻi leva ʻa e mōtele ʻoku lelei tahá, kae kaniseli ʻa e ʻū mōtele kehé. (Mt. 5:37) Ko e taʻeʻofa eni, pea ʻoku taʻofi ai ʻa e ʻū mōtelé mei hono maʻu ʻa e pisinisi naʻe mei malava ke nau maʻú. ʻOku toe toʻo ai foki mei he kau malanga kehé ʻa hono ngāueʻaki ʻa e ngaahi loki ko iá, ʻa ia ʻoku faʻa mātuʻaki fiemaʻú.
(e) ʻOua ʻe taʻofi ha ngaahi loki mōtele maʻau pe ki ha niʻihi kehe ʻo ʻikai ke fakahā ʻa e ngaahi hingoá mo ʻave leva ʻa e ngaahi tipōsiti ki he loki taki taha. ʻI he ʻikai ha tipōsití, ʻoku ʻi ai leva ʻa e totonu ʻa e mōtelé ke ʻave ho lokí ki ha taha kehe.
(f) ʻOua ʻe ʻai ha kakai tokolahi ange ke nau nofo ʻi he lokí ʻo tokolahi ia mei he meʻa ʻoku fakaʻatā ʻe he laó mo e fokotuʻutuʻú, ʻa ia ʻoku faʻa anga-maheniʻaki ke ʻoua ʻe toe laka hake he toko fā pe ko e toko nima, ʻo kau ai ʻa e fānaú. Manatuʻi, ʻokú ke totongi ʻa e mahuʻingá ʻo fakatatau ki he lahi ʻo e faʻahinga naʻá ke ALEA ke ʻi he lokí.
(h) ʻOua ʻe lēsisita ki muʻa ʻi he 1:00 hoʻataá pe ko e hā pē ʻa e founga ngāue ʻa e mōtelé. Te ke lēsisita nai hili ʻa e polokalama ʻo e ʻaho ko iá, koeʻuhi he ʻoku maluʻi ʻe hoʻo tipōsití ho lokí.
(i) ʻOua ʻe feimeʻakai pe fakamafana meʻakai ʻi he lokí tuku kehe ka ʻoku ʻi ai hano peito ki he taumuʻa ko iá, pea ke tokanga ke ʻoua ʻe ʻuliʻi ha meʻa pē ʻi he lokí ʻaki ʻa e meʻakaí.
5 Ngaahi Fiemaʻu Makehe: Naʻe fakamatalaʻi ʻe he ʻapositolo ko Paulá ha fanga tokoua pau “ko ha tokoni fakaivimālohi” kiate ia. (Kol. 4:7-11, NW) Ko e taha ʻo e ngaahi founga naʻa nau tokoni aí ko ʻenau fai ʻa e ngaahi ngāue fakafoʻituitui maʻa Paula. ʻE lava fēfē ke ke hoko “ko ha tokoni fakaivimālohi” ki he niʻihi kehé ʻi he fekauʻaki mo e fakataha-lahí? Ko e kau malanga taʻumotuʻá, ko e kau vaivaí, ko e faʻahinga ʻi he ngāue taimi-kakató mo e niʻihi kehé te nau fiemaʻu nai ha tokoni ʻaonga ʻi he meʻalelé pe ngaahi nofoʻangá. ʻOku maʻu ʻe he ngaahi kāingá ʻa e fatongia tefito ke tokanga ki he faʻahinga ko iá. (1 Tim 5:4) Kae kehe, kapau ʻe ʻikai lava ke nau fai ia, ʻe malava nai ke tokoni ʻa e ngaahi kaungātuí. (Sem. 1:27) Ko e kau ʻovasia ako tohí ʻoku totonu ke nau vakaiʻi ʻa e faʻahinga ko ia ʻi heʻenau kulupú ʻoku ʻi ai ʻenau ngaahi fiemaʻu makehé ke fakapapauʻi ʻoku fokotuʻutuʻu lelei ʻenau ngaahi palaní ʻi ha taimi lelei ki muʻa he fakataha-lahí.
6 Ko e ʻū foomu Special Needs Room Request ʻoku ala maʻu ia ki he kau malanga pē ʻoku ʻikai lava ke tokangaʻi ʻenau ngaahi fiemaʻu nofoʻangá ʻe he ngaahi mēmipa ʻo e fāmilí pe ko ʻenau fakatahaʻangá. ʻOku totonu ke fakakaukau ʻa e Kōmiti Ngāue ʻa e Fakatahaʻangá ki he ngaahi tuʻunga taau ʻo e tokotaha malangá, ʻo ngāueʻaki ʻa e ngaahi fakahinohino ʻi he fōmú pea pehē ki he tohi naʻe fai ʻi he ʻaho 30 ʻo Nōvema, 2004, naʻe fakatuʻasila ki he kulupu kotoa ʻo e kau mātuʻá. Ko e tokonakí ni ʻoku maʻá e kau malanga pē ʻoku ʻi he tuʻunga leleí, fakataha mo ʻenau fānau ʻulungāanga leleí.
7 Maʻu ha Toe Fakataha-Lahi ʻe Taha: Ke fakapapauʻi ʻoku feʻunga ʻa e tangutuʻangá, ʻū tohí, ngaahi nofoʻangá pea mo e hā fua, ʻoku fakalototoʻaʻi ʻa e kau malangá ke nau maʻu ʻa e fakataha-lahi ʻa ia ʻoku vaheʻi ki ai ʻenau fakatahaʻangá. Kapau ʻe fiemaʻu ʻi he ngaahi tuʻungá ke ke maʻu ha fakataha-lahi kehe, kātaki ʻo sio ki hoʻo sekelitali fakaefakatahaʻangá ʻo fekauʻaki mo e tuʻasila meili ʻo e fakataha-lahi te ke maʻú, ʻa ia ʻoku paaki ʻi he tafaʻaki ʻi mui ʻo e foomu Special Needs Room Request. Fakapapauʻi ke fakakau ai ha sila ʻosi fakasitapa ʻoku ʻi ai ho tuʻasilá fakataha mo hoʻo kole ki he Lisi ʻo e Nofoʻanga Leleí pe ko ha toe fakamatala lahi ange. Kapau ʻoku laka hake he tahá ʻa e fakataha-lahi ʻe fakahoko ʻi he koló, fakahaaʻi ʻa e ngaahi ʻaho ʻo e fakataha-lahi te ke kau ki aí.
8 Fiemaʻu ha Kau Ngāue Pole: Naʻe fokotuʻu ʻe Sīsū ha faʻifaʻitakiʻanga haohaoa ʻi he tokanga anga-fakatōkilalo ki he ngaahi fiemaʻu ʻa e niʻihi kehé. (Luke 9:12-17; Sione 13:5, 14-16) Ko e faʻahinga ʻoku nau pole ke ngāue ʻi he ngaahi fakataha-lahí ʻoku nau tapua atu ai ha laumālie tatau. Ke fakalato e ngaahi fiemaʻu ʻa e ngaahi potungāue ʻi he fakataha-lahí, ʻe vavé ni ke fakaafeʻi ha niʻihi kehe ʻe he ʻū Kōmiti Fakataha-Lahi fakalotofonuá ke nau ngāue fakataha mo kinautolu. ʻOku tautefito ʻa e ʻi ai ha fiemaʻu ki ha kau mātuʻa ke nau pole pea ke tali ʻa e ngaahi fatongiá. Ko ʻenau laumālie loto-leleí ʻoku ʻomai ai ha faʻifaʻitakiʻanga lelei ki he faʻahinga kotoa ʻi he fakatahaʻangá.—1 Pita 5:2, 3.
9 Meʻa ʻOku Mamata ki Ai ʻa e Niʻihi Kehé: Naʻe pehē ʻe ha pule ʻo ha hōtele: “Ko e kakai ko kimoutolú ʻa e kulupu ʻoku mau leleiʻia taha aí. ʻOku mou mātuʻaki ʻulungāanga lelei ʻi he fakafehoanaki ki ha toe kulupu kehe pē. Naʻe fakamatala ʻa e kau tauhi ʻapí ki heʻenau fakafeangai anga-ʻofa ange kiate kinautolú. Ko hono moʻoní, ʻoku fie ngāue ʻa e tokotaha kotoa ʻi he fakaʻosinga uike ko ia ʻoku mou ʻi heni aí!” Naʻe fakamatala ha fakafofonga hōtele ʻe taha: “Ko e Kau Fakamoʻoni ʻa Sihová ʻa e kulupu faingofua taha ke ngāue mo iá.” Mahalo ko ho ʻulungāanga ala faʻifaʻitakiʻangá ʻoku ʻomai ai ʻa e ngaahi fakamatalá ni. Fakakaukau atu ki he fiefia kuo pau ʻoku ongoʻi ʻe Sihova ʻi heʻene ʻafioʻi kitautolu ʻoku tau ngāue ʻi ha founga ʻoku ʻomai ai ha fakahīkihiki peheé!—1 Pita 2:12.
10 Fakafou ʻi he “setuata anga-tonú,” kuo fokotuʻutuʻu ai ʻe he ʻOtua ko Sihová maʻa hono kakaí ke nau fakatahataha ki ha fakahinohino fakalaumālie ʻi he konga ki mui ʻo e taʻu ní. (Luke 12:42, NW) ʻI he fai ha ngaahi teuteu ke maʻu ʻa e ʻaho kotoa ʻe tolú ʻe fiemaʻu ki ai ha feinga ka ʻe tuha lelei mo ia. Ko e Fakataha-Lahi “Talangofua Fakaʻotua” ʻo e taʻu ní te ne fakaivimālohiʻi moʻoni ʻetau fakapapau ke tauhi kia Sihova ʻi he taimí ni pea hokohoko atu ki ʻitāniti. ʻOfa ke tau fakapapauʻi ke muimui ʻi he ekinaki ʻa e tokotaha-tohi-sāmé: “Fakafetai ki he Otua i he gaahi fakataha.”—Sāme 68:26, PM.
[Puha ʻi he peesi 3]
Taimi ʻo e Polokalamá
Falaite mo e Tokonaki
9:30 pongipongi - 5:05 efiafi
Sāpate
9:30 pongipongi - 4:10 efiafi