Fakataha-Lahi Fakavahe 2006 “ʻOku Ofi ʻa e Fakahaofí” ʻa e Kau Fakamoʻoni ʻa Sihová
1. Naʻe anga-fēfē ʻa hono fakahāhaaʻi ʻe he kakai ʻa e ʻOtuá ʻa ʻenau houngaʻia ki he lotu moʻoní ʻi he kuonga muʻá, pea ko e hā ʻa e faingamālie meimei tatau ʻoku tau maʻu he ʻaho ní?
1 Naʻe ngāueʻaki ʻe Tuʻi Hesekaia ʻo Siuta ʻo e kuonga muʻá ha kau talafekau ke nau ʻave hangatonu ʻa e ngaahi tohi ʻa ia naʻe fekauʻi ai ʻa e kakaí ke nau fakatahataha fakataha ʻi Selusalema. (2 Kal. 30:6, 13) Ko e tali ʻa e kakaí naʻe fakahaaʻi ai ʻa ʻenau vakai ki he lotu moʻoní. (2 Kal. 30:10-12) ʻI he ngaahi māhina ka hoko maí, ʻe maʻu ʻe he kau sevāniti ʻa Sihova he ʻaho ní ha faingamālie meimei tatau ke fakahāhaaʻi ai ʻa ʻenau houngaʻia loto-moʻoni ki he monū ʻo e fakatahataha fakataha ke lotu kia Sihová. Kuo ʻosi ʻoatu ha tohi ki hoʻomou fakatahaʻangá ʻo fakaafeʻi kimoutolu ke mou maʻu ʻa e Fakataha-Lahi Fakavahe “ʻOku Ofi ʻa e Fakahaofí.” ʻE fēfē haʻo tali ki he fakaafe ko iá?
2. Ko e hā ʻe lava ke tau fai he taimí ni koeʻuhi ke tau maʻu ʻaonga kakato ai mei he fakataha-lahí?
2 Fai ha Fokotuʻutuʻu he Taimí Ni: Ke maʻu ʻaonga kakato mei he polokalama fakalaumālie kuo teuteu anga-ʻofa maí, ʻoku fiemaʻu ke tau ʻi ai ʻi he kotoa ʻo e polokalamá. Kamata fakapotopoto he taimí ni ke fai ha ngaahi fokotuʻutuʻu pē ʻa ia ʻoku fiemaʻu kiate koe mo ho fāmilí ke mou maʻu kotoa ai ʻa e ʻaho ʻe tolú. (Pal. 21:5) Ko e ngaahi teuteu peheé ʻe kau nai ai ʻa hoʻo kole ki ho pule ngāué ki ha taimi mālōlō, lāulea ki hoʻo ngaahi palaní mo ha hoa ʻikai Fakamoʻoni, taʻofi ha nofoʻanga ʻi ha mōtele, pea mo tokoni ki he kau ako Tohi Tapú ke nau maʻu ʻa e ʻaho taki taha. ʻOua ʻe tautoloi ʻa e ngaahi meʻa mahuʻinga ko ení ki he mōmeniti fakaʻosí. ʻI hono kehé, tuku ʻa e meʻá ni kia Sihova ʻi he lotu, ʻo falala “te ne fai ʻe ia.”—Sāme 37:5.
3, 4. Ko e hā ʻa e ngaahi poini mahuʻinga ʻoku totonu ke tau tauhi maʻu ʻi hotau ʻatamaí ʻi he taimi ʻoku tau taʻofi ai ha ngaahi nofoʻanga ʻi he mōtelé, pea ko e hā hono ʻuhingá?
3 Taʻofi Nofoʻanga ʻi he Mōtelé: ʻOku mahuʻinga ke taʻofi pē ʻa e loki te ke ngāueʻaki moʻoni ʻi he mōtelé lolotonga ʻa e fakataha-lahí. Tuku kehe kapau kuo mou felotoi ke fai tōmuʻa ia pea ʻoatu ʻa e ngaahi hingoa pau, kātaki ʻoua ʻe taʻofi ha ngaahi loki he mōtelé maʻá e kau fakafofonga kehé. ʻE fakalahiʻi hala heni ʻa e fika ʻo e ngaahi loki kuo taʻofi ki he fakataha-lahí pea ʻe ʻai ʻo toe faingataʻa ange ai ki he kau fakafofonga kehé ke nau taʻofi ha nofoʻanga. Ko e loki taki taha ʻi he mōtelé ʻoku totonu ke taʻofi ia ʻi he hingoa ʻo e toko taha mei he faʻahinga te nau nofo aí.
4 Ke fakapapauʻi ho nofoʻangá, kuo pau ke ke fai ha tipōsiti ki he mōtelé ki he loki taki taha ʻoku taʻofí. He ka ʻikai, ʻe lava ke foaki ʻe he mōtelé ia ho lokí ki ha tokotaha kehe.
5, 6. ʻE lava fēfē ʻo tokangaʻi ʻa e faʻahinga ʻoku ʻi ai ʻenau ngaahi fiemaʻu makehé?
5 Ngaahi Fiemaʻu Makehe: ʻOku pehē ʻe he Palovepi 3:27: “ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.” ʻE lava fēfē ke ke failelei ki he niʻihi kehé ʻi he felāveʻi mo e fakataha-lahí? ʻE fiemaʻu nai ʻe he kau malanga taʻumotuʻá, kau vaivaí, faʻahinga ʻoku nau ngāue taimi-kakató mo e niʻihi kehé ha tokoni ʻaonga ʻi he meʻalelé mo e nofoʻangá. ʻOku maʻu ʻe he ngaahi kāingá ʻa e fatongia tefito ke tokangaʻi ʻa e ngaahi fiemaʻu ʻa e faʻahinga peheé. (1 Tim. 5:4) Kapau ʻe ʻikai lava ke nau fai pehē, ʻe malava nai ʻa e ngaahi kaungātuí ʻo tokoni. (Kal. 6:10) ʻOku totonu ke vakaiʻi ʻe he kau ʻovasia ako tohí ʻa e faʻahinga ʻi heʻenau kulupú ʻoku ʻi ai ʻenau ngaahi fiemaʻu makehé ke fakapapauʻi ʻoku fokotuʻutuʻu lelei ʻenau ngaahi palaní ʻi ha taimi feʻunga ki muʻa he fakataha-lahí.
6 ʻOku ala maʻu ʻa e ngaahi foomu Special Needs Room Request maʻá e kau malanga pē ʻoku ʻikai lava ke tokangaʻi ʻenau fiemaʻu nofoʻangá ʻe he ngaahi mēmipa ʻo e fāmilí pe ʻe heʻenau fakatahaʻangá. ʻOku totonu ke fakakaukauʻi lelei ʻe he Kōmiti Ngāue ʻo e Fakatahaʻangá ʻa e ngaahi tuʻunga taau ʻo e tokotaha malangá, ʻo ngāueʻaki ʻa e ngaahi fakahinohino ʻi he fōmú pea pehē ki he tohi ʻi he ʻaho 30 ʻo Nōvema 2005, ʻa ia naʻe fakatuʻasila ki he ngaahi kulupu kotoa ʻo e kau mātuʻá. Ko e tokonaki eni maʻá e kau malanga pē ʻoku nau ʻi he tuʻunga lelei, fakataha mo ʻenau fānau ʻulungāanga lelei.
7. Ko e hā ʻoku totonu ai ke tau maʻu ʻa e fakataha-lahi kuo vaheʻi maí?
7 Ko Hono Maʻu e Fakataha-Lahi Kuo Vaheʻi Atú: Ke fakapapauʻi ʻe ʻi ai ha tangutuʻanga, ngaahi tohi, ngaahi loki nofoʻanga feʻunga, pea mo e hā fua, ʻoku fakalototoʻaʻi atu koe ke ke maʻu ʻa e fakataha-lahi ʻa ia kuo vaheʻi ki ai hoʻo fakatahaʻangá.
8. Ko e hā ʻa e founga ʻe taha ʻe lava ke tau tokoni ai ki he fiefia ʻa e fakataha-lahi ʻoku tuʻunuku maí?
8 Kau Pole Loto-Lelei: ʻOku ʻikai toe fehuʻia ʻa e fiefia lahi ʻe maʻu ʻe he faʻahinga kotoa te nau maʻu ʻa e fakataha-lahí pea maʻu ʻaonga mei he meʻakai fakalaumālié mo e ngaahi faingamālie ki ha feohi fakatupu langa hake. ʻE toe lahi ange ʻetau fiefiá kapau te tau pole ke tokoni ʻi he ngāue kuo pau ke fakahoko ke ʻai ai ʻa e fakataha-lahí ke lavameʻá. (Ng. 20:35) ʻE vavé ni ke fakaafeʻi ʻe he Ngaahi Kōmiti Fakataha-Lahi Fakalotofonuá ha niʻihi kehe ke nau tokoni ʻi he ngāué ni. ʻE lava ke ke fakafaingamālieʻi koe?—Sāme 110:3.
9. Ko e hā ʻokú ke ʻiloʻi fekauʻaki mo e fakataha-lahi fakavahe fakataʻú, pea ko e hā ʻoku totonu ke hoko ko hoʻo fakapapaú ia?
9 Lolotonga hono maʻu ha fakataha-lahi fakavahe, naʻe pehē ʻe ha kiʻi tamasiʻi taʻu nima: “Ko e fakataha-lahi fakavahé ko e konga ia ʻoku ou manako taha ai ʻi he lotu kia Sihová.” ʻOku tokoniʻi kotoa kitautolu ʻe he lea loto-moʻoni ko iá ke tau ʻiloʻi ʻa e fiefia lahi ʻoku tau maʻu ʻi he kau ki heʻetau fakataha-lahi fakavahe fakataʻú. ʻOku moʻoni ia ʻo hangē ko e hiva ʻa e tokotaha-tohi-sāmé: “Ko ha foʻi ʻaho ʻi ho lotoʻā ʻoku lelei hake ʻi ha afeʻi ʻaho ʻi ha potu ange.” (Sāme 84:10) Naʻe fakahaaʻi ʻe Tēvita ʻi ha hiva ʻa ʻene holi ‘ke ne nofo mau i he fale o Jihová i he aho kotoabe o ene mouí ke mamata [ʻi he houngaʻia] ki he fale tabu o Jihová.’ (Sāme 27:4, PM) Naʻe hōhōʻia lahi ʻa Tēvita ke ne ʻi he lotolotonga ʻo e kau lotu ʻa Sihová. ʻOfa ke tau faʻifaʻitaki ki heʻene houngaʻia ʻi he lotu moʻoní ʻaki ʻetau maʻu ʻa e kotoa ʻo e ʻaho ʻe tolu ʻo e Fakataha-Lahi Fakavahe “ʻOku Ofi ʻa e Fakahaofí.”
[Puha ʻi he peesi 3]
Taimi ʻo e Polokalamá
Falaite mo e Tokonaki
9:30 pongipongi - 5:05 efiafi
Sāpate
9:30 pongipongi - 4:10 efiafi