Fakataha-Lahi Fakavahe ʻa e Kau Fakamoʻoni ʻa Sihová 2009
1. (a) Ko e hā ʻa e ngaahi tāpuaki te tau maʻu ʻi hono maʻu ʻa e ʻaho kotoa ʻe tolu ʻo e fakataha-lahi fakavahé? (e) Ko e hā ʻa e ngaahi palani ʻoku totonu ke tau fai he taimi ní?
1 Ko kitautolu kotoa ʻoku tau fakatuʻotuʻa atu ki he fakataha-lahi fakavahe 2009 pea ko e toe faingamālie ia ke fakatahataha ai mo e kaungā fakahīkihikiʻi ʻo Sihova, ʻa ia ʻoku nau “ʻiloʻi ʻa ʻenau fiemaʻu fakalaumālié.” (Mt. 5:3, NW) ʻI he tuʻunuku mai ʻa e ʻaho ʻo Sihová, ʻoku tau fakaʻaiʻai ʻa e tokotaha taki taha ke ne maʻu ʻa e ʻaho kotoa ʻe tolú koeʻuhi ke maʻu ʻaonga kakato ai mei he feohi māfana faka-Kalisitiané pea pehē ki he fakalototoʻa fakalaumālie ke tuʻu maʻu ʻi he tuí. (Sef. 1:14) ʻAi ke ʻiloʻi ʻe he kau faiakó mo e kau pule ngāué ko e fakataha-lahí ko ha konga tefito ia ʻo hoʻo lotú. Fai ki muʻa ʻi he loto-toʻa ʻa hoʻo ngaahi palaní pea kumi ki he tāpuaki ʻa Sihová; ʻe lava ke ke fakapapauʻi ai ʻa ʻene tokoní.—Ai. 50:10.
2. Ko e hā ʻa e ongoʻi meimei tatau mo ia ʻi he fakataha-lahi fakavahaʻapuleʻangá te tau fakatuʻotuʻa nai ki ai ʻo tatau ai pē kapau naʻe ʻikai fakaafeʻi kitautolu ke tau maʻu ha fakataha-lahi fakavahaʻapuleʻangá?
2 Ngaahi Fakataha-Lahi Fakavahaʻapuleʻanga: Koeʻuhi ko e ngaahi fakataha-lahí ni ʻe fai ia ʻi ha ngaahi fonua mo e ngaahi kolo lalahi fakangatangata, ko e faʻahinga pē kuo filí ʻoku totonu ke nau maʻu iá. Ko ʻetau ngāue fāitaha mo e fokotuʻutuʻu ko ení ʻe ʻikai ai ke fuʻu feʻefiʻefihi. (1 Kol. 14:40; Hep. 13:17) Kae kehe, ʻe ʻi ai ha ongoʻi meimei tatau ʻi he ngaahi fakataha-lahi fakavahé mo ia ʻoku hoko ʻi ha fakataha-lahi fakavahaʻapuleʻanga, koeʻuhi ʻe maʻu ʻe he kau misinale tokolahi, ko e kau Pēteli ʻoku ngāue he feituʻu mulí mo e kau sevāniti fakavahaʻapuleʻangá ha fakataha-lahi ʻi honau fonuá.
3. ʻE lava fēfē ke tau fakahāhā ʻa e ʻofa faka-Kalisitiané ki he niʻihi ʻi heʻetau fakatahaʻangá?
3 Tokoniʻi ʻa e Niʻihi Kehé Ke Nau Maʻu Ia: ʻOku fiemaʻu ʻe ha niʻihi ʻi hoʻo fakatahaʻangá ha tokoni ke maʻu ʻa e fakataha-lahí? ʻI hoʻo tokoniʻi ʻa e niʻihi kehé ke nau maʻu iá, ʻoku ʻikai ai ke “taki taha tokanga ki heʻene meʻa aʻana pe, ka ki he meʻa ʻa e kakai kehe foki.”—Fili. 2:4.
4, 5. Kapau ʻe fiemaʻu ʻi ha meʻa naʻe hoko, ke ke maʻu ai ha fakataha-lahi kehe mei he fakataha ko ia ʻoku vaheʻi ki ai hoʻo fakatahaʻangá, ko e hā ʻoku totonu ke ke faí?
4 Maʻu Fakamatala: Ke fakasiʻisiʻi ʻa e telefoni ki he ʻōfisi vaʻá ʻo fekauʻaki mo e ngaahi ʻaho mo e feituʻu ʻo e fakataha-lahí, kātaki ʻo tomuʻa sio ki he ʻīsiu ʻo e Taua Leʻo ʻo Maʻasi 1, 2009, pe ko e sekelitali ʻi hoʻo fakatahaʻangá ki ha fakamatala ʻokú ke fiemaʻu.
5 Kapau te ke maʻu ha fakataha-lahi kehe mei he fakataha ko ia ʻoku vaheʻi ki ai ʻa hoʻo fakatahaʻangá, te ke maʻu nai ʻa e fakamatala ki he nofoʻangá ʻi he tohi ki he tuʻasila fekauʻaki mo e nofoʻangá, ʻoku tuʻu ʻi mui ʻi he foomu Special Needs Room Request lolotongá. Ko e ngaahi foomu ko ení ʻe ʻoatu ki he kau sekelitali ʻi he ngaahi fakatahaʻangá. Ke maʻu ha talí, fakapapauʻi ke faʻo ʻi hoʻo tohí ha sila kuo ʻosi fakasitapa mo fakatuʻasila.
6. Ko e hā ʻa e founga ke muimui ai ʻi he taimi ʻe kole tokoni ai ha tokotaha malanga ʻoku ʻi ai ʻene fiemaʻu makehe ʻo fekauʻaki mo e nofoʻangá?
6 Ngaahi Fiemaʻu Makehe: ʻI he taimi ʻe kole ai ʻe ha tokotaha malanga ha tokoni fekauʻaki mo hono maʻu ha nofoʻanga, ʻoku totonu ke fakapapauʻi ʻe he Kōmiti Ngāue ʻa e Fakatahaʻangá pe ʻoku taau ʻa e tokotaha malangá ke maʻu ha foomu Special Needs Room Request. ʻOku totonu ke nau vakaiʻi ʻa e ngaahi fakahinohino ʻi he fōmú pea mo e tohi ʻi Nōvema 16, 2008, naʻe fakatuʻasila ki he kulupu kotoa ʻo e kau mātuʻá ki muʻa ke ʻave ʻe he sekelitali ʻo e fakatahaʻangá ʻa e fōmú ki he Potungāue Nofoʻangá.
7. Ko e hā ʻoku totonu ke tau tokanga muʻomuʻa ki ai ʻi heʻetau teuteu ke kau mo maʻu ʻa e Fakataha-Lahi Fakavahe 2009?
7 Ngāue ʻOku Fakalāngilangiʻi Ai ʻa e ʻOtuá: ʻI he taimi ʻoku tau fakahāhā ai ʻa e fua o e laumālié ʻi he ngaahi meʻa kotoa ʻoku tau faí, fai ha tokanga tefito ki heʻetau leá mo e ʻulungāangá ʻi he fetuʻutaki mo e kau ngāue ʻi he mōtelé pea mo e niʻihi kehe ʻi he kolo ʻoku fai ai ʻa e fakataha-lahí, ʻoku tau ʻai ke toe lahi ange ai ʻa e ongoongo lelei ʻo e kakai ʻa Sihová pea fakaʻehiʻehi ai mei hono fakatūkiaʻi ʻo e niʻihi kehé. (1 Kol. 10:31; 2 Kol. 6:3, 4) ʻOfa ke hanga ʻe hoʻo maʻu iá pea mo ho ʻulungāangá ʻo fakalāngilangiʻi ʻa e ʻOtuá ʻi he ngaahi founga ko iá ʻi he fakataha-lahi fakavahe 2009!—1 Pita 2:12.
[Puha ʻi he peesi 6]
Taimi ʻo e Polokalamá:
Tuʻapulelulu (Fakataha-Lahi Fakavahaʻapuleʻangá Pē)
1:20 efiafi - 4:55 efiafi
Falaite mo e Tokonaki
9:20 pongipongi - 4:55 efiafi
Sāpate
9:20 pongipongi - 4:00 efiafi