Failelei pea ʻe Fakahīkihikiʻi!
1 “ʻOku nau maʻu ʻa e nonga ʻa ia kuo ʻikai ʻaupito te u sio ai ʻi ha faʻahinga kakai kehe.” “Ko ha meʻa fakafiefia ē ke maʻu ʻa e kulupu ko ʻení.” Ko ha fakatātā ʻeni ʻo e ngaahi fakamatala lelei lahi naʻe maʻu mei he kau mamatá hili ʻa e ngaahi fakataha-lahi fakavahe ʻo e taʻu kuo ʻosí, ʻo fakamamafaʻi ai ʻa e ongoongo lelei ʻoku tau maʻu ʻi he tuʻunga ko ha kautahá. (Pal. 27:2; 1 Kol. 4:9) Ko hono tefitó, ʻoku ʻalu ʻa e fakahīkihiki peheé kia Sihova. (Mt. 5:16) Ko ha toe faingamālie lelei ʻe taha ke fakahīkihikiʻi ai ʻa e ʻOtuá ʻoku ʻi muʻa ia he taimí ni ʻiate kitautolu ʻi he Fakataha-Lahi Fakavahe “Kau Faiako ʻo e Folofola ʻa e ʻOtuá” ʻo e taʻu ní.
2 ʻOku tau maʻu ʻi he taʻu taki taha ha fakamanatu anga-ʻofa fekauʻaki mo e ʻulungaanga taau ʻi he fakataha-lahí. Ko e hā hono ʻuhingá? Koeʻuhi ʻi he hokohoko hōloa ʻa e tuʻunga fakaeʻulungaanga, vala, mo e tōʻonga ʻa e māmaní, ʻoku tau fakafisi ai ke faʻifaʻitaki ki ai. ʻOku ʻikai te tau fiemaʻu ke fakameleʻi hotau ongoongo leleí. (Ef. 2:2; 4:17) ʻAi ke tau hanganaki manatuʻi ʻa e ngaahi fakatokanga ko ʻení.
3 Failelei—ʻI he Nofo mo e Ngaahi Kāingá: Kapau ʻokú ke nofo mo ha kāinga ʻoku ʻikai ke ʻi he moʻoní, te ke malava nai ke fakaafeʻi kinautolu ke nau ʻalu fakataha mo koe ki he fakataha-lahí. ʻI he hili ʻa e fakataha-lahí ʻi he ʻaho taki taha, tala ange kiate kinautolu ʻa e meʻa naʻá ke fai ʻi he fakataha-lahí, founga naʻe fokotuʻutuʻu aí pea mo e niʻihi ʻo e faʻahinga naʻá ke fetaulaki mo ia aí. ʻI he ʻikai ke fai ha malangá, vahevahe ʻa e niʻihi ʻo e ngaahi poini naʻá ke ako ʻi he ʻaho ko iá. Kapau naʻe ʻi ai ha tohi naʻe tukuange mai, te ke saiʻia nai ke ʻoange ha tatau maʻa hoʻo tokotaha talitalí.
4 Koeʻuhi ko hoʻo nofo ai mo ho fāmilí ʻe kau ia ki he toe fakamole mo ha ngāue ki hoʻo tokotaha talitalí, ʻoku lelei ke fai ha tokoni ʻi he meʻá ni ki he lahi taha ʻe malavá. ʻOku faʻa feʻungamālie ke ʻomai ha meʻaʻofa ko ha meʻakai ʻi hoʻomou haʻú. ʻI he lolotonga hoʻomou ʻaʻahí, fai ha tokoni ki hono teuteu, tufa mo fakamaau ʻo e kaí, pe ko ha ngaahi ngāue kehe ʻi he ʻapí. Kapau ʻoku tokonaki ʻe hoʻo tokotaha talitalí hono feʻaveʻaki koé, fai ha tokoni ki he totongi ʻo e penisiní.
5 Failelei—ʻI he Nofo mo e Fanga Tokouá: ʻI he hili ʻa e fakataha-lahí ʻi he ʻaho taki taha, vaheʻi ha taimi ke fetalanoaʻaki fakataha ai ʻi he ngaahi meʻa lalahi ʻo e polokalamá. ʻI he taimi ʻoku feinga ai ʻa e tokotaha kotoa pē ke ʻomai ʻenau ngaahi fakakaukaú, ko ha “fefakalototoʻaʻaki” moʻoni ʻeni. (Loma 1:12, NW) ʻIkai ko ia pē, ʻe lava ke ke tokoni ki he ngāue ʻoku fai takatakai ʻi he ʻapí ʻi he pongipongi taki taha koeʻuhi ke ʻoua ʻe fuesia pē ʻe ha niʻihi? ʻI he founga ko ʻení, ʻe lava ke aʻu tōmuʻa ai ʻa e tokotaha kotoa pē ki he fakataha-lahí pea ʻe ʻikai ha taha ʻe fuʻu helaʻia ke fanongo tokanga. Tokangaʻi lelei ʻa e koloa ʻa hoʻo tokotaha talitalí. Tokangaʻi hoʻo fānaú koeʻuhi ke ʻoua te nau fakameleʻi pe maumauʻi ha meʻa. Fai ha tokoni ki he ngaahi fakamole ʻi he lolotonga ʻo hoʻomou nofó. Fakahaaʻi ʻa hoʻo houngaʻia ki he anga-talitali kakai ʻoku ʻomaí.
6 Failelei—ʻI he Feituʻu Faiʻanga Fakataha-Lahí: Kuo fakatokangaʻi ʻoku fakafisi ʻa e kau maʻu fakataha ʻe niʻihi ke ngāue fakataha mo e kau fakanofonofó, naʻa mo e lea kiate kinautolu ʻi ha anga taʻefakakalisitiane. Ko e moʻoni, ko e fakakaukau fakamuʻomuʻa-kitá ʻoku ʻikai ke fakaʻilongaʻi ai ha taha ko ha tokotaha failelei, pe ʻomai ai ha fakahīkihiki kia Sihova ko e ʻOtuá. Ko ia ai, ʻai ke tau anga-ʻofa, kātaki pea ngāue fakataha.—Kal. 5:22, 23, 25.
7 ʻI he ngaahi fakataha-lahi ʻe niʻihi ʻoku hehema ai ʻa e fānau īkí ke lele takai ʻi he ki muʻa pea mo e hili ʻa e ngaahi kongá, ʻa ia ʻe lava ke fakatuʻutāmaki. Ngaahi mātuʻa, kātaki ʻo mapuleʻi lelei hoʻomou fānaú, koeʻuhi he ʻe fakahohaʻasi ʻe he ʻikai ke mapuleʻí ʻa e kau maʻu fakataha-lahi kehé pea mo e ngaahi kaungāʻapí. Lolotonga ʻoku fokotuʻu atu ke tau ʻomai ha kai hoʻatā maʻamaʻa ke maʻu ʻi he hoʻataá, ʻoku ʻikai feʻunga ke fai ai ha fuʻu maʻu meʻatokoni lahi, ʻa ia ʻe fakahaaʻi atu nai ʻoku tau fai ha paati ʻo hangē ko ia ʻoku fai he taimi ʻe niʻihi ʻi he ngaahi vaʻinga sipotí.
8 Failelei—ʻI Hotau Valá mo e Teuteú: ʻI he hili ha taha ʻo e ngaahi fakataha-lahi fakavahe ʻo e taʻu kuo ʻosí, naʻe tohi ʻe he ʻētita ʻo ha nusipepa: “Laka hake ʻi ha toe meʻa kehe pē, ko e ʻulungaanga ʻo e Kau Fakamoʻoní naʻe fuʻu hā mahino ʻaupito. He fakaivifoʻou ē ke sio ki ha fuʻu kakai tokolahi ʻoku nau fakahā ʻa e fakaʻapaʻapa mo e tokaʻi. ʻI he tui honau vala lelei taha ki he Sāpaté, naʻe laui teau ʻa e ngaahi fāmili ʻi hono fakafofongaʻi ʻa e ngaahi ʻātakai fakamatakali mo fakakulupu kehekehé naʻa nau fakateholo fakalongolongo atu ki he malaʻé. Ko honau ʻulungāngá naʻe mātuʻaki kehe ʻaupito ia mei he tokolahi taha ʻo ha fuʻu kakai pē naʻa nau fakaʻotu atu ki he malaʻé.” ʻOfa ke ʻoua ʻaupito te tau fakaʻatā hotau valá mo e teuteú pe ko hotau ʻulungāngá ke ne fakasiʻisiʻi ʻi ha faʻahinga founga ʻa e ʻatimosifia fakalaumālie ʻo e fakataha-lahí.—Fili. 1:10; 1 Tim. 2:9, 10.
9 Failelei—ʻI he Papitaisó: ʻE fiemaʻu ʻe he kau teu papitaisó ke fakahoko ʻa e kātoanga ko ʻení ʻi he tuʻunga ngeia lahi tahá. Ko hono tui ha teunga kaukau fakanānaá ʻe fakahā ai ʻa e houngaʻia ki he toputapu ʻo e kātoangá. ʻE ʻaonga lahi ki he kau faiako ʻo e ako Tohitapú ke fakamanatu mo ʻenau kau akó ki muʻa ke maʻu ʻa e fakataha-lahí ʻa e “Ngaahi Fehuʻi mei he Kau Lautohí” ʻi he ʻīsiu ʻo e Watchtower ʻo ʻEpeleli 1, 1995.
10 Ko hotau fōtunga hāmai tāú mo e tōʻonga fakaʻotuá ko e fakamoʻoni ia ki heʻetau ngaahi tui faka-Kalisitiané pea ʻai ai ke faingofua ange ki he faʻahinga loto-totonú ke nau ʻiloʻi ʻa e moʻoní. Ko ia ai, ʻai ke tau “hanganaki failelei” pea hoko ʻo fakahīkihikiʻi he lolotonga ʻa hono maʻu ʻo e Fakataha-Lahi Fakavahe “Kau Faiako ʻo e Folofola ʻa e ʻOtuá.”—Loma 13:3, NW.