“ʻOku Ou Tuʻumaʻu! ʻOku Ou Tuʻumaʻu! ʻOku Ou Tuʻumaʻu!”
1 Ko e lea ko eni ʻa ha Kalisitiane loto-tōnunga naʻá ne hao moʻui mai ʻi he Tāmate Fakatokolahí ʻokú ne fakaeʻa mai ʻa e fakapapau ʻa e laui afe ʻo e Kau Fakamoʻoni—moʻui mo mate—ʻa ia naʻa nau tuʻumaʻu ʻi heʻenau tuí neongo ʻa e anga-fakamamahi ʻa e kau Nasí. (Ef. 6:11, 13) Ko e talanoa fakafiefia ʻo ʻenau loto-toʻá mo e ikuná ʻoku fakahaaʻi mai ia ʻi he foʻi vitiō fakaueʻiloto ko e Jehovah’s Witnesses Stand Firm Against Nazi Assault. ʻOku fakaʻaiʻai atu ʻa e tokotaha kotoa ʻi he fakatahaʻangá ke sio ʻi he foʻi vitioó pea fevahevaheʻaki hoʻomou ngaahi fakakaukaú mo e ongoʻí.
2 ʻAi ke ueʻi hoʻo fakakaukaú ʻe he ngaahi fehuʻi ko ʻení: (1) Ko e hā ʻa e ngaahi ʻuhinga naʻe fakafepakiʻi loto-toʻa ai ʻe he Kau Fakamoʻoni ʻa Sihová ʻa e kau Nasí? (2a) Ko e hā ha fakakaukau fakafepaki naʻe ʻi ai fekauʻaki mo ha talamonū, pea ko e hā hono ʻuhingá? (2e) Naʻe anga-fēfē hono uesia heni ʻa e ngaahi fāmili Fakamoʻoní? (3) Ko e Kau Fakamoʻoni ʻe toko fiha naʻe ʻave ki he ngaahi kemi fakamamahí, naʻe anga-fēfē hono fakaʻilongaʻi ai kinautolú, pea naʻe anga-fēfē ʻa e fakafeangai ʻa e kau Kesitapó kiate kinautolú? (4) Ko e hā ʻa e totongi naʻe ʻikai ke loto ʻa hotau fanga tokouá ke totongiʻaki ʻa e tauʻatāiná? (5a) Naʻe anga-fēfē pea ʻi he taimi fē naʻe fakafepakiʻi loto-toʻa ai ʻe he Kau Fakamoʻoni ʻa Sihová ʻa e ngaahi founga pule anga-fakamamahi ʻa Hitilaá? (5e) Naʻe anga-fēfē ʻa e tali ʻa Hitilaá? (6) Naʻe anga-fēfē hono fakamoʻoniʻi ʻa e fakahaofi moʻui ʻa e uouangataha ʻa e kakai ʻa Sihová kiate kinautolu pea ki he niʻihi kehé, ʻi he tafaʻaki fakasinó mo e fakalaumālié? (7) Ko e hā ʻa e hiva ʻo e Puleʻangá naʻe hiki ʻi ha kemi fakamamahi? (8) Ko e hā ʻa e ngaahi faʻifaʻitakiʻanga ʻo e kau tangata, kau fefine mo e kau talavou loto-tōnunga ʻokú ne ueʻi koe ke ke hanganaki anga-tonu ai kia Sihová, ʻo tatau ai pē pe ko e hā ʻa e meʻa ʻe hokó? (Sio ki he 1999 Yearbook, peesi 144-147.) (9) ʻI he tuʻunga ko e taha ʻo e Kau Fakamoʻoni ʻa Sihová, ʻoku anga-fēfē hono ʻai koe ʻe he foʻi vitiō ko ʻení ke ke ongoʻi ʻo fekauʻaki mo e ʻikai hoko ko e konga ʻo e māmaní?
3 Ko e faʻifaʻitakiʻanga fakalototoʻa ʻa e Kau Fakamoʻoni ʻa Sihová ʻa ia ʻoku fakahāhā ʻi he foʻi vitiō ko e Stand Firm ʻe lava ke tokoni ia ki he kau talavoú, naʻa mo e faʻahinga ʻoku ʻikai ko e Kau Fakamoʻoní, ke nau fehangahangai mo ha ngaahi ʻīsiu mahuʻinga hangē ko e taʻemalava ke kātakí, tenge mei he toʻumeʻá mo e konisēnisí. Kapau ko ha talavou koe ʻokú ke kei ʻi he ako lotolotó pe ngaahi kalasi māʻolunga angé, ʻe lava ke ke ʻoange ki hoʻo kau faiakó ha faingamālie ke ngāueʻaki ai ʻa e fakamatala ko ʻení ʻi he kalasí? Mahalo pē ʻe lava ke ke tuʻuaki ange kiate kinautolu ha tatau ʻo e foʻi vitioó pea fakamatalaʻi ia ko ha konga ʻo e fakamatala fakahisitōlia ʻoku siʻi hono ʻiloʻí pe ko ha fakamatala moʻoni ki ha lēsoni fekauʻaki mo e ʻulungāngá.
4 Ko e foʻi vitiō Stand Firm ko ha meʻangāue lelei ʻaupito ia ke fakahaaʻi ai ʻa e founga ʻoku ʻomai ai ʻe he ako fakaʻotuá kiate kitautolu ʻa e mālohi fakalaumālie ke fakahōifuaʻi ʻa e ʻOtuá ʻaki ʻa e tuʻu maʻu ʻi he meʻa ʻoku totonú. (1 Kol. 16:13) Sio ai mo kinautolu kotoa pē ʻoku mahuʻingaʻia ʻi he moʻoní.