Jehovah’s Witnesses—Organized to Share the Good News
Laka hake he taʻu ʻe 100, kuo fokotuʻutuʻu maau ai ʻa e Kau Fakamoʻoni ʻa Sihová ke vahevahe atu ʻa e ongoongo leleí. ʻI he meʻa kuo hoko ko e feingangāue lahi taha ia kuo faifai ange pea ʻilo ki ai ʻa e māmaní, ʻoku tau leaʻaki a e pōpoaki ko eni ʻi he lea ʻe laui ngeau pea ʻi he fonua laka hake he 230. (Mt. 24:14) Ko e hā ʻoku fiemaʻu ai ʻa e ngāue ko ení? ʻOku fēfē hono fakahoko eni ʻi ha tuʻunga fakaemāmanilahí. Ko e foʻi vitiō Jehovah’s Witnesses—Organized to Share the Good News ʻoku tali ai ʻa e ongo fehuʻi ko iá ʻaki hono ʻomai ʻa e vakai fakaikiiki ki he ngaahi tafaʻaki lahi ʻetau ngaahi ngāue fakavahaʻapuleʻangá. Hili e mamata he foʻi vitioó, fai ha fakakaukau lelei ki he ngaahi fehuʻi ko ení.
Kuo fēfē hono fakatupulekina ʻe he foʻi vitiō ko ení hoʻo houngaʻia (1) ʻi he feinga ʻoku fai ʻe he kautaha ʻa Sihová ke vahevahe atu ʻa e ongoongo leleí? (2 Tim. 4:2) (2) ʻi he ngaahi fāmili Pēteli takatakai he māmaní? (3) ʻi he ako ʻoku tokonaki maʻá e kau misinalé mo e kau ʻovasiá? (2 Tim. 2:2) (4) ʻi he mahuʻinga hono kamata e ʻaho taki taha ʻi he lāulea ki ha konga Tohi Tapu pea teuteu ʻi he uike taki taha ki he ngaahi fakataha ʻa e fakatahaʻangá? (Ng. 17:11) (5) ʻi he ngaahi ʻaonga ʻo e maʻu ʻetau ngaahi fakatahataha faka-Kalisitiané? (Hep. 10:24, 25) (6) ʻi he ngaahi tāpuaki te ke maʻu ʻi he taimi ʻe toe fakafoki mai ai e palataisí ki he māmaní? (Ai. 11:9) (7) ʻi he monū ʻokú ke maʻu ke kau ʻi he ngāue utu-taʻu ʻoku lolotonga faí?—Sione 4:35.
Ko e foʻi vitiō ko ení kuo fakamoʻoniʻi ko ha meʻangāue lelei ʻaupito ia ke maheni ai ʻa e kakai mahuʻingaʻiá mo e ngāue ʻi māmani lahi ʻoku fai ʻe he Kau Fakamoʻoni ʻa Sihová. (8) Ko fē taimi ʻe lelei ke hulu ai ʻa e foʻi vitioó ki heʻetau kau ako Tohi Tapú, ngaahi kāingá, mo e niʻihi kehé? (9) Ko e hā e ngaahi tali papau kuó ke sio ai ʻi he taimi naʻe hulu iá?
ʻI heʻetau fakakaukau ki he meʻa ʻoku fakahoko ʻe Sihová, ʻoku ueʻi ai kitautolu ke fakaongo atu e ngaahi ongoʻi ʻa e tokotaha-tohi-sāmé: “E Jihova ko hoku Otua, oku lahi hoo gaahi gaue fakaofo aia kuo ke fai, mo ho finagalo lelei kiate kimautolu: e ikai faa lau fakaholo ia kiate koe.” (Sāme 40:5, PM) ʻOfa ke tau ngāueleleiʻaki e foʻi vitiō ko ení ke tokoniʻi e niʻihi kehé ke fakatupulekina ha houngaʻia kia Sihova mo ʻene kautahá!