Ko e Feingangāue Fakamalanga Lahi Taha Kuo ʻIloa ʻi he Māmaní!

Kuo fokotuʻutuʻu maau ʻa e Kau Fakamoʻoni ʻa Sihová ʻo laka hake ʻi he taʻu ʻe 100, ki hono fakamafola ʻo e ongoongo leleí. (1 Kol. 9:23) ʻI he ngāue ko ia kuo hoko ko e feingangāue fakamalanga lahi taha kuo ʻiloa ʻi he māmaní, ʻoku tau ʻoatu ai ʻa e pōpoakí ni ʻi he ngaahi lea ʻe laui ngeau. ʻOku tau talaki atu ia ʻi he fonua laka hake ʻi he 230. (Mt. 24:14) Ka ko e hā ʻoku fiemaʻu ai ʻa e ngāue ko ʻení? Pea ʻi he founga fē ʻoku fakahoko ai ia ʻi he kotoa ʻo e māmaní?

Ko e foʻi DVD Jehovah’s Witnesses—Organized to Share the Good News ʻoku tali ai ʻa e ngaahi fehuʻi ko iá ʻaki hono ʻomai ʻa e vakai fakaikiiki ki he tafaʻaki kehekehe ʻo ʻetau ngāue fakavahaʻapuleʻangá. ʻI hoʻo mamata aí, fakakaukau ki he ngaahi fehuʻi ko ʻení: (1) ʻOku anga-fēfē hono fokotuʻutuʻu mo tataki ʻetau ngāué? (2) ʻOku anga-fēfē ʻa e kaunga ʻa e Potungāue Faʻutohí, Liliu-Leá, Tā Fakatātaá pea mo e Potungāue Hiki Ongo mo e Vitioó ki hono talaki atu ʻa e ongoongo leleí? (3) Ko e hā ʻa e taumuʻa ʻo ʻetau ngāue lahi fakaepulusí mo e fakaheka tohí? (Sione 17:3) (4) Ko e ngaahi tohi ʻe fiha ʻoku pulusi ʻi he taʻu ʻe tahá? (5) Ko e hā kuo lavaʻi ʻe he ngaahi tohi makatuʻunga Fakatohitapú? (Hep. 4:12) (6) Ko e hā kuo fai ke ala maʻu ai ʻa e tokoni fakalaumālie ʻe he kau kuí mo e kau tulí? (7) ʻOku anga-fēfē hono fakapaʻanga ʻetau ngāué? (8) ʻOku anga-fēfē ʻetau maʻu ʻaonga mei he Ngaahi Ngāue Fakahinohino Fakafalemahakí, Potungāue Ngāué mo e Potungāue Fakataha-Lahí? (9) ʻI he tuʻunga ko e taha ʻo e Kau Fakamoʻoni ʻa Sihová, ʻoku anga-fēfē hono fakatupulekina ʻe he foʻi DVD ko ʻení hoʻo houngaʻia ki he (a) feinga ʻoku fai ʻe he kautaha ʻa Sihová ki hono malangaʻi ʻa e ongoongo leleí? (e) fāmili Pēteli laka hake he 100 takatakai ʻi he māmaní? (f) ako ʻoku tokonaki ki he kau ʻovasiá mo e kau misinalé? (h) mahuʻinga ʻo e kamataʻaki ʻa e ʻaho taki taha ʻa e lāulea ki he konga Tohi Tapú mo e teuteu ʻi he uike taki taha ki he ngaahi fakataha ʻa e fakatahaʻangá? (i) ngaahi ʻaonga ʻo hono maʻu ʻa ʻetau ngaahi fakatahataha faka-Kalisitiané? (k) ʻuhinga ʻo e Palataisi ʻi he māmaní? (Ai. 11:9) (l) kau fakafoʻituitui ki he ngāue utu-taʻu ʻoku lolotonga fakahokó?—Sione 4:35.

Ko e hā ʻa e tali lelei kuó ke maʻu ʻi hono huluʻi ʻa e foʻi DVD ko ʻení ki ho ngaahi kāingá, mahení, toe ʻaʻahí mo e kau ako Tohi Tapú? Fēfē ke ke sio mo ha taha ʻi he foʻi DVD pea ʻoatu ai ʻa e ongoongo leleí ʻi he vave tahá.—Mt. 28:19, 20.