Vitiō Foʻou Ke Kamata ha Ako Tohi Tapu
Ko e foʻi vitiō nounou ʻoku fakakaveinga Ko e Hā ke Ako Ai ʻa e Tohi Tapu? ʻoku aʻu ia ki he kakai tokolahi ʻo fakafou ʻi he jw.org. ʻOku faʻu ʻa e foʻi vitiō ko ení ke ne ueʻi ʻa e kakai mahuʻingaʻiá ke tali ʻetau tuʻuaki ʻa e ako Tohi Tapu taʻetotongi. ʻE lava ke ke hū ki ai he ʻInitanetí ʻaki ʻa e ʻalu ki he “Kole ha Ako Tohi Tapu” ʻi lalo ʻi he peesi tefitó pe ko hono sikeni ʻa e kouti ʻoku pulusi ʻi he peesi fakaʻosi ʻo ʻetau ngaahi tuleki foʻoú. Ko e ngaahi founga eni ʻe niʻihi ʻe lava ke tau ngāueleleiʻaki ʻa e foʻi vitioó.
ʻI hono fai ha toe ʻaʻahi, leaʻaki eni ki he tokotaha-ʻapí: “ʻE sai pē ke u fakahaaʻi atu ha kiʻi vitiō nounou ʻoku fakamatalaʻi ai ʻa e founga ʻe lava ke ke maʻu ʻa e ngaahi tali ki hoʻo ngaahi fehuʻi Fakatohitapú?” Kapau ʻokú ne loto ki ai, fakahaaʻi kiate ia ʻa e foʻi vitioó ʻi hoʻo telefoni mōpailá pe ʻi heʻene komipiutá tonu.
Kapau ʻoku tau tuku atu ʻa e ngaahi tuleki foʻoú lolotonga ʻa e faifakamoʻoni ʻi he founga ʻikai anga-mahení pe faifakamoʻoni ʻi he feituʻu kakaí, fakahaaʻi ki he kakaí ʻa e koutí pea fakalototoʻaʻi ʻa e tokotaha ko iá ke sikeni ʻa e koutí ʻaki ʻene telefoni mōpailá. ʻI he ngaahi lea lahi ʻoku ʻave hangatonu koe ʻe he koutí ki he foʻi vitiō ʻi heʻetau Uepisaití, ko ia aiʻe malava nai ke tau hanga ʻo huluʻi ʻa e foʻi vitioó ʻi he taimi pē ko iá ʻo ngāueʻaki hoʻo telefoni mōpailá.
Fakamatala ki hoʻo kaungāngāué, kaungāakó, kāingá mo e ngaahi mahení fekauʻaki mo e vitioó, pea tala ange ʻe lava ke ke fakahāhā ia kiate kinautolu. Pe ʻīmeili kia kinautolu ʻa e peesi ʻi he Uepisaití ʻa ia ʻe maʻu ai ʻa e foʻi vitioó pea fakaafeʻi ke nau sio ai.
ʻI hono ngāueʻaki ʻa e tokonaki foʻou ko ení, ʻoku malava leva ai ke tau kamata ha ngaahi ako Tohi Tapu lahi ange, ʻi hono tokoniʻi fakalaumālie ʻa e faʻahinga ʻoku “hehema totonu ki he moʻui taʻengatá.”—Ngā. 13:48.