Ngaahi Naunau ʻOku Nau Akoʻi, Ueʻi, mo Fakaivimālohí

¹ ʻOku nau mālohi ki hono akoʻi ʻa e kakaí fekauʻaki mo e Tohitapú pea mo e Kau Fakamoʻoni ʻa Sihová. Kuo nau ueʻi ʻa e tokolahi ke nau tuʻumaʻu maʻá e moʻoní. Kuo nau fakaivimālohiʻi ʻa e tuí pea mo e houngaʻia ʻa e kakai fakatapui ʻa e ʻOtuá. Ko e hā kinautolu? Ko e ngaahi foʻi vitiō naʻe faʻu ʻe he kautaha ʻa Sihová. Kuó ke sio kotoa ʻi he foʻi vitiō ʻe hongofulu ʻo kinautolú? Ko e hā ʻa e taimi fakamuimuí? ʻOkú ke ngāueʻaki kinautolu ʻi hoʻo ngāue fakafaifekaú? Ko hono tukuange mai ʻo e foʻi vitiō hono 11, ko e Our Whole Association of Brothers, naʻe fanongonongo mai ia ʻi he fakataha-lahi fakavahé. Kuó ke ʻota ia? ʻE anga-fēfē haʻo maʻu ha ʻaonga lahi ange mei he ngaahi naunau fakaofo ko ʻení?

² Ko e kupu ʻi he Taua Leʻo ʻo Siulai 1, 1999, ko e “Ako Tuʻumaʻu ʻa e Folofola ʻa e ʻOtuá ʻi he Tuʻunga ko ha Fāmili” naʻá ne fai ʻa e fakaongoongolelei ke vaheʻi “ha konga ʻo homou taimi akó ke sio ai ʻi ha konga ʻo e taha ʻo e ngaahi foʻi vitiō fakamaama ʻa e Sōsaietí . . . pea fetalanoaʻaki leva ai.” ʻI he fehoanaki mo e akonaki lelei ko iá, ko ha foʻi vitiō kehe ʻe fakaeʻa ʻi he Fakataha Ngāué ʻi he māhina kehe kotoa pē. ʻOku fakalototoʻaʻi atu ʻa e tokotaha kotoa pē ʻi he fakatahaʻangá ke ne sio ʻi he foʻi vitioó ʻi ʻapi ki muʻa ia ʻi he taimi ʻe fakamatalaʻi ai ia ʻi he Fakataha Ngāué.

³ ʻI he māhina ko ʻení te tau kamata ʻaki ai ʻa e ʻuluaki foʻi vitiō ʻa ia naʻa tau faʻu, ko e Jehovah’s Witnesses​—The Organization Behind the Name. Sio mo fanongo ki he ngaahi tali ʻo e ngaahi fehuʻi ko ʻení:

◼ Ko e hā ʻoku ʻiloa lahi taha ai ʻa e Kau Fakamoʻoni ʻa Sihová?

◼ Ko e meʻa kotoa pē ʻoku fai ʻi he Pētelí ʻoku fekauʻaki ia mo e konga Tohitapu fē?

◼ Ko e hā ʻa e konga faka-Tohitapu naʻá ke sio ai ʻi hono fakatātaaʻi, faitaaʻi, pea tā valivaliʻi ke ngāueʻaki ʻi he ngaahi tohí?

◼ Ko e hā ʻoku maongo kiate koe fekauʻaki mo e founga ʻoku teuteuʻi ai ʻetau ngaahi tohí?

◼ Mei he 1920 ki he 1990, ko e hā e lahi ʻo e ngaahi tohi kuo pulusi ʻe he Sōsaietí?

◼ Ko hai tautefito ʻi he lotolotonga ʻo e kakai ʻa e ʻOtuá ʻoku totonu ke ne kakapa atu ke hoko ʻo taau ki he ngāue ʻi Pētelí?—Pal. 20:29.

◼ ʻI he ngaahi founga fē ʻoku fokotuʻu ai ʻe he fāmili Pētelí ha faʻifaʻitakiʻanga lelei ki he kotoa ʻo e Kau Fakamoʻoni ʻa Sihová?

◼ Ko e hā ʻoku maongo kiate koe fekauʻaki mo e ngāue ʻoku lolotonga fai ʻi he Pētelí ke aʻu ai ki he kakai tokolahi tahá mo e ongoongo leleí?

◼ ʻOku anga-fēfē hono fakapaʻanga ʻa e ngāue ʻi māmani lahí?

◼ Ko e hā ʻa e ngāue ʻoku malava ke tau poupou faivelenga ki aí, pea ʻaki ʻa e laumālie fē?—Sione 4:35; Ng. 1:8.

◼ ʻOku anga-fēfē hoʻo ongoʻi fekauʻaki mo e kautaha ʻoku tau tauhingoa ki aí?

◼ ʻE lava fēfē ke ke ngāueʻaki ʻa e foʻi vitiō ko ʻení ʻi he ngāue fakafaifekaú?

ʻI Tīsema te tau toe vakai ai ki he foʻi vitiō ko e The Bible​—Accurate History, Reliable Prophecy.