United by Divine Teaching​—Ko ha Vakai ki he Fāʻūtaha Fakatokoua Moʻoní

Naʻe kau ha ʻovasia sēketi ki ha ako Tohitapu naʻe fai mo ha fefine ʻa ia naʻe teʻeki ai ke ne kamata maʻu ʻa e ngaahi fakataha ʻa e fakatahaʻangá. Naʻá ne fakaʻaiʻai ia ke ne sio ʻi he foʻi vitiō United by Divine Teaching. ʻI he uike ko iá, naʻá ne maʻu ha fakataha pea naʻá ne pehē naʻá ne fuʻu fiefia ʻaupito ʻi heʻene ʻi aí. Ko e hā naʻe maʻu vave ai ʻe he foʻi vitioó ha ngaahi ola peheé? Naʻe maongo kiate ia ʻa ʻene sio ki hono fakahāhā ai ʻa ʻetau fāʻūtaha fakatokoua maʻongoʻonga ʻi he lotolotonga ʻo ha māmani fakamālohi mo fetāufehiʻaʻakí.—Sione 13:35.

Mamata ʻi he foʻi vitiō ko ʻení ke ke sio ai pea ongoʻi ʻa e melino mo e ʻofa ʻoku maʻu ʻi he lotolotonga ʻo e Kau Fakamoʻoni ʻa Sihova takatakai ʻi he māmaní. Fakalaulauloto leva ki he ngaahi fehuʻi ko ʻení:

(1) Ko e hā hono ʻuhinga naʻe hoko ai ʻa e “Akonaki Fakaʻotuá” ko ha kaveinga feʻungamālie ki he ngaahi fakataha-lahi ki he 1993-1994?—Mai. 4:2.

(2) Ko e hā hono ʻuhinga ʻo e moʻoni faka-Tohitapú ki he ngaahi fāmili ʻe niʻihi? Ko e hā ʻene ʻuhinga ki he fāmili ʻoʻoú?

(3) Ko e hā ʻoku mahuʻinga ai ke hoko ʻo akoʻi ʻe Sihová?—Sāme 143:10.

(4) Ko e hā ʻa e faʻahinga faingataʻa kuo pau ke ikuʻi ʻi he teuteu atu ki he ngaahi fakataha-lahi fakavahaʻapuleʻanga lalahí?

(5) Naʻe anga-fēfē hoʻo vakai ki hono fakamoʻoniʻi moʻoni ʻo e Sāme 133:1 mo e Mātiu 5:3 ʻi he ngaahi fakataha-lahi faka-Kalisitiane naʻá ke kau ki aí?

(6) Ko e hā ʻa e fakamoʻoni fakalūkufua ʻoku ʻi ai fekauʻaki mo e ngaahi ola mālohi ʻo e akonaki fakaʻotuá?—Fkh. 7:9.

(7) Ko e hā ʻa e fuʻu kau papitaiso tokolahi taha kuo ʻi ai ʻo e kau Kalisitiane moʻoní?

(8) Ko e hā ʻa e ngaahi lea ʻa Maika, Pita mo Sīsū ʻoku fakahoko ʻi he lotolotonga ʻo e Kau Fakamoʻoni ʻa Sihová?

(9) Ko e hā ʻokú ne fakamoʻoniʻi kiate koe ko ha fāmili fakaetangata fiefia mo fāʻūtahá ʻoku ʻikai ko ha misi pē?

(10) Ko hai te ke fakaʻaliʻali ki ai ʻa e foʻi vitiō ko ʻení, pea ko e hā hono ʻuhingá?

ʻI he hili ha sio ʻi he foʻi vitiō ko ʻení, naʻe fakanounou lelei ia ʻe ha tuofefine ʻe taha: “ʻE tokoniʻi lahi au ʻe he foʻi vitioó ke u manatuʻi ʻoku tokolahi fau ʻa e fanga tokoua mo e fanga tuofāfine Kalisitiane ʻi he kotoa ʻo e māmaní ʻoku nau ngāue mateaki ʻi he mōmeniti tofu pē ko ʻení kia Sihova. . . . He mahuʻinga ē ko ʻetau fāʻūtaha fakatokouá!”—Ef. 4:3.