Ko ha Fefakalototoʻaʻaki Makehe
1 ʻI he ʻaho kotoa pē ʻoku fehangahangai ai ʻa e kakai ʻa Sihová mo e ngaahi ʻahiʻahi ʻo ʻenau tuí. ʻI hono ʻiloʻi ʻoku toe siʻi pē hono taimí, ʻoku fai ai ʻe he Tēvoló ha ʻoho mālohi fakaʻosi ke maumauʻi ʻetau anga-tonu kia Sihová. (Fkh. 12:12) ʻOku mātuʻaki mahuʻinga ke tau “malohi i he Eiki, bea i he lahi o ene mafimafi” koeʻuhí ke tau “faa tuu ai i he aho oe kovi, bea hili hono ikuʻi kotoabe, kae tuu be.”—Ef. 6:10, 13, PM.
2 Ko e fakatahataha mo e kaungātuí ko ha tokonaki ia meia Sihova ke tokoniʻi ai kitautolu ke maʻu ha mālohi. Naʻe mahino ki he ʻapositolo ko Paulá ʻa e mahuʻinga ʻo e meʻá ni. Naʻá ne holi ke feohi mo hono fanga tokoua Kalisitiané koeʻuhí ke nau lava ai ʻo “fefakalototoʻaʻaki fakataha” pea “hoko ai ʻo tuʻumaʻu.” (Loma 1;11, 12, NW, lalo.) Ke fakaivimālohiʻi kitautolu ʻi hono fai ʻa e finangalo ʻo e ʻOtuá, kuo fokotuʻutuʻu anga-ʻofa ai ʻe he Kulupu Pulé ke ʻomai kiate kitautolu ha faingamālie ke maʻu ʻaonga ai mei ha fefakalototoʻaʻaki ʻi he Fakataha-Lahi Fakavahe “Kau Fanongonongo Faivelenga ʻo e Puleʻangá” ka hoko maí.
3 Ke Tau ʻI Ai ke Maʻu ha ʻAonga: ʻAi ko hoʻo taumuʻá ia ke ke ʻi ai ʻi he kotoa ʻo e ʻaho ʻe tolú. Te tau ‘maʻu ha ʻaonga’ ʻaki ʻetau aʻu ki ai ʻi he ki muʻa he hiva ʻuluakí pea nofo ai pē ke aʻu ki haʻatau “ʻĒmeni” loto-moʻoni ʻi he lotu fakaʻosí. (Ai. 48:17, 18) ʻE fiemaʻu ki ha tokolahi ke fokotuʻutuʻu lelei ʻenau taimi-tēpile ngāué ki muʻa koeʻuhi kae ala maʻu hanau taimi ke maʻu kotoa ai ʻa e ʻaho ʻe tolú. Fakatatau ki ai, ʻe ʻikai nai ke faingofua ke ʻai hoʻo pule ngāué ke ne ʻoatu hao taimi ʻatā, ka ʻoku tau maʻu ʻa e fakapapau ʻa Sihová te ne tokoniʻi kitautolu ke fai hono finangaló. (1 Sione 5:14, 15) Kapau ʻoku teʻeki ai ke tau fai pehē, ko e taimi ʻeni ke fai ai ha ngaahi fokotuʻutuʻu pau ki ha meʻalele mo ha nofoʻanga, ʻo ʻoua ʻe tuku ke toki hokonoa mai pē. ʻOku lava ke tau tuipau ʻe tāpuakiʻi ʻe Sihova ʻetau ngaahi feinga ke maʻu kotoa ʻa e ʻaho ʻe tolú.—Pal. 10:22.
4 Fakatuʻamelie Atu ki ha Fakalototoʻa: Kuó ke mavahe mei ha fakataha-lahi fakavahe, peá ke pehē: “Ko e fakataha lelei taha ia kuo hokó!” Ko e hā nai ʻa e ʻuhinga kuó ke ongoʻi pehē aí? Ko e ʻuhingá pē koeʻuhi ʻi he tuʻunga ko e tangata taʻehaohaoá ʻoku lava ke faifai pē pea tau hoko ʻo ongosia, ʻo ʻiloʻi ai ʻoku tau fiemaʻu ha fakalototoʻa fakalaumālie. (Ai. 40:30) Naʻe fakamatala ha tuofefine ʻe taha: “ʻOku fakaongosiaʻi au ʻe he fokotuʻutuʻu ko ʻení, pea ko e ngaahi fakataha-lahí ʻoku tokoni ia kiate au ke u toe tokangataha ai ki heʻeku vakai fakalaumālié, ʻo ʻomai ai kiate au ʻa e fakalototoʻa fakalaumālie ʻoku ou fiemaʻú. ʻOku hā ngali hangē ia ʻoku haʻu ʻa e fakalototoʻá ʻi he taimi tofu pē ko ia ʻoku ou fiemaʻu lahi taha aí.” Ngalingali kuó ke hokosia ha ngaahi ongoʻi meimei tatau.
5 ʻOku tau maʻu ʻa e fakalototoʻa ʻoku fiemaʻú ʻo ʻikai ngata pē ʻi he founga ʻo e fetalanoaʻakí mo e ngaahi fakaʻekeʻeké kae toe pehē foki ki he fakafou ʻi he ngaahi tafaʻaki fakalaumālie lelei kehe ʻo ʻetau ngaahi fakataha-lahí. Naʻe pehē ʻe he tokoua ʻe taha: “ʻOku hā mahino, ko hono ngāue ʻaonga ʻaki ʻa e ngaahi tefitoʻi moʻoni faka-Tohitapú ʻa e meʻa ʻoku ou fiefia moʻoni aí. Ko e moʻoni, ʻoku mahuʻinga taʻehanotatau ʻa e ngaahi tulamá ʻi hono fakahaaʻi ʻa e founga ʻe lava ai ke tau maʻu ʻaonga mei he ngaahi faʻifaʻitakiʻanga ʻi he kuohilí, fakatouʻosi ʻa e leleí mo e koví. Ko e ngaahi tohi foʻoú ʻa e meʻa ʻoku ou fakatuʻotuʻa maʻu pē ki aí, pea ʻoku ou fiefia ʻiate kinautolu ʻi ha taimi fuoloa ʻi heʻeku foki ki ʻapí.”
6 Ko e ngaahi fakataha-lahí ko ha tokonaki mātuʻaki mahuʻinga ia meia Sihova he lolotonga ʻo e “ngaahi taimi faingataʻa.” (2 Tim. 3:1) ʻOku nau tokoniʻi kitautolu ke tau tokanga ki he akonaki fakamānavaʻí: “Mou leo, tuu mau i he tui, fai o gali moe tagata, mou malohi.” (1 Kol. 16:13, PM) Ko ia ai, ʻai ke tau fakapapauʻi ke maʻu ʻa e konga kotoa pē pea fiefia ʻi ha fefakalototoʻaʻaki lahi ʻi heʻetau Fakataha-Lahi Fakavahe “Kau Fanongonongo Faivelenga ʻo e Puleʻangá”!
[Puha ʻi he peesi 3]
Palani ke Maʻu Kotoa ʻa e ʻAho ʻe Tolú
■ Kole ki ha taimi ʻatā mei he ngāué.
■ Taʻofi ha nofoʻanga ʻi he kolo faiʻanga fakataha-lahí.
■ Fokotuʻutuʻu ha meʻalele ki he fakataha-lahí.