ʻOkú Ke Houngaʻia ʻi he Ngaahi Meʻa Toputapú?
1 ʻI he taimi ʻe ʻeke mai ai pe ʻoku tau houngaʻia ʻi he ngaahi meʻa toputapú, ʻoku ngalingali te tau tali vave ʻio ki ai! Ko e hā ʻa e ngaahi tokonaki toputapu ʻe niʻihi ʻa e ʻOtuá ʻoku tau houngaʻia aí?
2 He mahuʻinga ē ka ko ʻetau koloaʻaki ʻa e vahaʻangatae fakafoʻituitui ʻoku fakaʻatā ke tau maʻu mo ʻetau Tamai fakahēvaní! ʻOkú ne fakapapauʻi mai kiate kitautolu kapau te tau ‘ʻunuʻunu atu kiate ia, ʻe ʻunuʻunu mai kiate kitautolu.’ (Sem. 4:8) ʻI he ʻikai ha feilaulau huhuʻi ʻa Sīsū Kalaisí, ʻe ʻikai ha tangata te ne malava ʻo maʻu ʻa e moʻui taʻengatá. (Sione 3:16) ʻI he fakamālōʻia loto-totonú, ʻoku tau fakahāhaaʻi fakaʻaho ʻi he lotu ʻetau houngaʻia loloto ki he meʻaʻofa mahuʻinga ko ʻeni ʻa e ʻOtuá.
3 Ko e Folofola fakamānavaʻi ʻa e ʻOtuá, ʻa e Tohitapu Māʻoniʻoní, ʻoku toe toputapu mo ia kiate kitautolu, ʻo hangē ko ia ko e kautaha fakamāmani ʻa Sihová. ʻOku tau fakahā ʻa e houngaʻia totonu ki he ngaahi tokonaki ko ʻeni meia Sihová ʻi he taimi ʻoku tau moʻuiʻaki ai ʻa e ngaahi tefitoʻi moʻoni ʻo e Tohitapú, fakaivimālohiʻi ʻa e haʻi ʻo e ʻofa fakatokouá, tokanga lelei ki he fokotuʻutuʻu fakateokalatí, pea ngāue fakataha mo e faʻahinga ʻoku takimuʻá.—1 Pita 1:22.
4 Fakafou mai ʻi he tamaioʻeiki anga-tonu mo potó, ʻoku tau maʻu ai ʻa e meʻakai fakalaumālie lahi. ʻE hoko moʻoni ia ʻi he taʻú ni ʻi he Fakataha-Lahi Fakavahe “Kau Fai ki he Folofola ʻa e ʻOtuá.” Te tau maʻu ai ʻa e fakahinohino mātuʻaki mahuʻinga mo fiefia ʻi he feohi māfana ʻa ia ʻoku tau fiemaʻu fakavavevave. ʻE lava fēfē ke tau fakahaaʻi ʻa e houngaʻia fakamātoato ki he tokonaki toputapu ko ʻení?
5 ʻOua ʻe Liʻaki ʻa e Fale ʻo Sihová: Naʻe akonakiʻi ʻe Nehemaia ʻa e faʻahinga ko ia naʻa nau ngāue mālohi ke toe langa ʻa e ngaahi ʻā ʻo Selusalemá ke ʻoua ʻe ‘liʻaki ʻa e fale ʻo honau ʻOtuá.’ (Nehe. 10:39) ʻI he ʻahó ni, ko e “fale” ʻo Sihová ʻa ʻene fokotuʻutuʻu ki he lotú. Ko ʻetau ngaahi fakataha-lahi fakavahé ko e konga kinautolu ʻo e fokotuʻutuʻu ko iá. Ke ʻoua ʻe liʻaki ʻa e fokotuʻutuʻu ko ʻení, kuo pau ke tau ʻi ai ʻo maʻu ia pea tokanga vēkeveke, ʻo fakahaaʻi kia Sihova ʻoku tau mahuʻingaʻia lahi ʻi heʻene ngaahi tokonakí. (Hep. 10:24, 25) Ko e hā ʻa e ngaahi palani ʻoku totonu ke tau fai he taimí ni ke fakahaaʻi ai ʻoku tau houngaʻia kakato ʻi he meʻa toputapu ko ʻení?
6 Maʻu Kotoa ʻa e ʻAho ʻe Tolú: Ko e tokotaha kotoa pē ʻo kitautolu ʻoku totonu ke ne fokotuʻutuʻu ke ne maʻu kotoa ʻa e ʻaho ʻe tolu ʻo e fakataha-lahí. ʻOkú ke palani ke ke aʻu tōmuʻa ki ai ʻi he ʻaho taki taha pea ke nofo ai pē ʻo aʻu ki he lotu fakaʻosí ʻi he Sāpaté? Kapau ko ia, te ke maʻu ʻa e ngaahi tāpuaki lahi. Ko hono maʻu ha fakataha-lahi ʻoku ʻikai nai ke faingofua maʻu pē. Ko hono feʻunuʻaki ʻa hoʻo ngāue fakamāmaní ʻoku fiemaʻu nai ke ke tuʻumaʻu. ʻOku ʻikai nai ke faingmālie maʻu pē ʻa e fefonongaʻakí. Kae ʻoua ʻe ʻai ʻa e ngaahi meʻa ko ʻení ke ne fakalotosiʻiʻi koe mei hono maʻu ʻa e fakataha-lahí.
7 Fakakaukau ki he Faʻifaʻitakiʻanga Lelei ʻAupito ko ʻEní: ʻI heʻenau ʻalu ki ha fakataha-lahi fakavahe ʻi he taʻu kuo ʻosí, ko ha kulupu ʻo e fanga tokouá ʻi ha fonua ʻAfilika ʻa ia ʻoku ʻi ai ʻa e taʻemanonga ʻi he sōsaietí naʻa nau fetaulaki ai mo ha kulupu fakakautau. Naʻe ʻeke ange ki he fanga tokouá: “Ko hai kimoutolu, pea ko hoʻomou ʻalú ki fē?” Naʻa nau tali ange: “Ko kimautolú ko e Kau Fakamoʻoni ʻa Sihova, pea ko ʻemau ʻalú ke maʻu ʻa e fakataha-lahi fakavahé.” Naʻe pehē ange ʻe ha sōtia ʻe taha: “Ko kimoutolu Kau Fakamoʻoni ʻa Sihová ʻoku ʻikai te mou manavahē ʻi ha faʻahinga meʻa. Mou ō, pea te mou malava ke fakahoko hoʻomou fakataha-lahí ʻo ʻikai ha palopalema. Kae kehe, mou tokanga he te mou fetaulaki mo e kau sōtia tokolahi. Luelue maʻu pē ʻi he loto-mālie ʻo e halá! Kapau te mou sio ki ha kakai tokolahi ʻoku nau fakatahataha, mou hokohoko atu pē hoʻomou lué ʻi he loto-mālie ʻo e halá!” Naʻa nau fai pehē pea naʻa nau aʻu lelei ki he fakataha-lahí. Naʻe fakapaleʻi ʻa e fanga tokoua ko ʻení koeʻuhí he naʻa nau fakahāhaaʻi ʻenau houngaʻia ki he ngaahi meʻa toputapú.
8 Hangē ko hotau fanga tokoua ʻi ʻAfiliká, ʻoku tau toe fehangahangai mo e ngaahi pole. Ka, ʻoku ʻikai ha toe veiveiua, ʻoku lava ke tau faʻifaʻitaki ki heʻenau tuí pea ke fakapapau ke maʻu ʻa e kotoa ʻo e ngaahi konga ʻo ʻetau fakataha-lahi fakavahé. Kapau ʻoku fiemaʻu ha ngaahi fakatonutonu, hanga kia Sihova ki ha tataki, ʻo ʻiloʻi te ne tāpuakiʻi ʻetau ngaahi feinga ke maʻu ʻa e kotoa ʻo e polokalamá.
9 Utu ʻa e Ngaahi Tāpuakí: ʻOku tau holi ki he Folofola ʻa e ʻOtuá, ʻo ʻiloʻi ʻi he fakafou mai aí te tau tupulaki nai ai ki he fakamoʻuí. (1 Pita 2:2) Ko ʻetau maʻu ʻa e fakataha-lahi fakavahé pea fanongo ki he polokalamá te ne tokoniʻi ai ʻa e tokotaha taki taha ʻo kitautolu ke langa hake ʻa e tui mālohi ange ki he Folofola ko iá pea ʻe malava lelei ange ai ke matuʻuaki ʻa e ngaahi ʻoho ʻa Sētané. ʻI he fai peheé, te tau fakahaaʻi ai kia Sihova pea mo e kotoa ʻo e kau mamatá ʻoku tau houngaʻia kakato ʻi he ngaahi meʻa toputapú pea “ʻoku ʻikai ko e haʻa holomui . . . ka ko e haʻa tui ai pe ke maʻu mai hota laumalie.”—Hep. 10:39; 12:16; Pal. 27:11.
10 ʻOku lava ke tau fakatuʻotuʻa atu ki hono fakaava ʻe Sihova ʻa e ngaahi matapā ʻo hēvaní pea huaʻi hifo kiate kitautolu ʻa e ʻuha lahi ʻo e ngaahi tāpuaki fakalaumālié. (Mal. 3:10) ʻAi ia ko hoʻo taumuʻá ke ke ʻi he Fakataha-Lahi Fakavahe “Kau Fai ki he Folofola ʻa e ʻOtuá” mei he kamataʻanga pē ʻo e polokalamá ʻi he pongipongi Falaité ki he lotu tukú mo e “ʻEmení!” ʻi he efiafi Sāpaté. Te ke fiefia ʻi hoʻo fai iá!