Puha Fehuʻi
◼ Ko e hā ʻoku totonu ke tau manatuʻi ʻi hono ngāueʻaki ʻa e ngaahi telefoni selulaá mo e fanga kiʻi pipa fakaʻilekitulōniká?
Ko e ngaahi meʻangāue peheé ʻe lava ke ne ʻai kitautolu ke fetuʻutaki ai mo e niʻihi kehé ʻi ha meimei feituʻu pē nai te tau ʻi ai. Lolotonga ʻe ʻaonga nai ʻa e meʻá ni, kuo pau ke tau tokanga ke ʻoua ʻe fakaʻatā ʻa hono ngāueʻaki ʻo e ngaahi telefoni selulaá mo e pipá ʻi he ngaahi taimi ʻikai feʻungamālié ke ne toʻo ai ʻa e tokangá mei heʻetau ngāue fakafaifekaú pe ngaahi fakataha faka-Kalisitiané. ʻE lava fēfē ke hoko eni?
Fakakaukau ki he ola nai ʻe maʻú kapau ʻe tatangi ʻetau telefoni selulaá pe lea ʻetau pipá lolotonga ʻo ʻetau faifakamoʻoni ʻi he malaʻe fakafaifekaú. Ko e hā ʻe fakakaukau ki ai ʻa e tokotaha-ʻapí? Ko e hā ʻa e ola te tau tuku ki he tokotaha-ʻapí kapau te tau tuʻu ke tali ʻa e telefoní? ʻE ʻikai moʻoni te tau loto ke fai ha meʻa ke taʻofi ai ʻa e niʻihi kehé mei he fanongo ki he pōpoaki ʻo e Puleʻangá. (2 Kol. 6:3) Ko ia ai, kapau ʻoku tau toʻo holo ha telefoni selulā pe ko ha pipa, ʻoku totonu ke tau seti ia ke ʻoua te ne fakahohaʻasi kitautolu pe ko e niʻihi kehé lolotonga ʻetau kau ʻi he malaʻe fakafaifekaú.
Fēfē ʻa e taimi ʻoku tau tatali ai lolotonga ia ʻa e faifakamoʻoni ʻa e niʻihi kehé? Kapau kuo tau vaheʻi ha vahaʻa taimi ki he malaʻe ngāué, ʻikai ʻoku totonu ke tau tokanga ki he ngāue ko iá? ʻI he tokaʻi ʻetau ngāue toputapú, kātaki ʻo tokangaʻi ʻa e meʻa fakafoʻituitui pe ngaahi meʻa fakasōsiale ʻa ia ʻoku ʻikai fiemaʻú ʻi ha toe taimi kehe. (Loma 12:7) Ko e moʻoni, ʻe ʻikai fakakau ʻi he meʻá ni ʻa hono ngāueʻaki ha telefoni ke fai ai ha fakamoʻoni lahi ange pe ko e tā ke fokotuʻutuʻu ha ʻapoinimeni ke fai ai ia.
Kuo pau ke tau tokanga tautefito fekauʻaki mo hono ngāueʻaki ʻa e ngaahi telefoni selulaá lolotonga ʻa e fakaʻulí, koeʻuhi ʻoku fakahaaʻi ʻi he ngaahi fakatotolo ʻe niʻihi ko hono fai iá ʻoku fakalahi ʻaupito ai ʻa e malava ke hoko ha fakatuʻutāmakí. ʻOku totonu ke tau tauhi fefeka ha ngaahi lao pē ʻoku taʻofi ai ʻa e ngāueʻaki ʻo e ngaahi telefoni selulaá lolotonga ʻa e fakaʻulí.
ʻOku tau haʻu ki he ngaahi fakatahá, ngaahi ʻasemipilií, mo e ngaahi fakataha-lahi faka-Kalisitiané ke lotu ai kia Sihova pea ke ne akoʻi kitautolu. ʻIkai ʻoku totonu ke ueʻi kitautolu ʻe he houngaʻia ki he toputapu ʻo e ngaahi taimi ko ení ke seti ʻa e ngaahi telefoni selulaá mo e ngaahi pipá koeʻuhi ke ʻoua te nau fakahohaʻasi kitautolu pe ko e niʻihi kehé? Kapau ʻoku ʻi ai ha meʻa fakavavevave ʻoku fiemaʻu ai ʻetau tokangá he taimi pē ko iá, ʻoku totonu ke tau tokangaʻi ia ʻi tuʻa mei he feituʻu faiʻanga fakatahá. Pea ka ʻikai, ʻoku totonu ke tau fokotuʻutuʻu ke tokangaʻi ʻa e ngaahi meʻa fakafoʻituituí mo fakaemāmaní ʻi he ngaahi taimi kehe mei he taimi ko ia kuo vaheʻi ki he lotú.—1 Kol. 10:24.
ʻOfa ke fakahaaʻi maʻu pē ʻe he founga ʻo ʻetau ngāueʻaki ʻa e ngaahi telefoni selulaá pe ko ha meʻangāue fakaʻilekitulōnika kehe pē ʻa e fakaʻatuʻi ki he niʻihi kehé mo e houngaʻia loloto ki he ngaahi meʻa fakalaumālié.