Puha Fehuʻi

◼ Ko e hā ʻa e ngaahi tefitoʻi moʻoni Fakatohitapu ʻoku ngāueʻaki ki hono ngāueʻaki ʻo e telefoni toʻotoʻó lolotonga ʻa e fakataha faka-Kalisitiané mo e kau ʻi he ngāue fakafaifekaú?

“Ko e Meʻa Kotoa ʻOku Ai Hano Taimi.” (Koh. 3:1): Ko e telefoni toʻotoʻó ʻokú ne ʻai e kakaí ke malava ke ʻave pōpoaki pe talanoa ki ha taha ʻi ha faʻahinga taimi pē. Neongo ia, ʻoku ʻi ai ʻa e ngaahi taimi ʻoku ʻikai fiemaʻu ʻa e Kalisitiané ke fakahohaʻasi ʻe heʻenau telefoní. Hangē ko ení, ko ʻetau ngaahi fakatahá ko ha taimi lotu ia kia Sihova, maʻu e fakahinohino fakalaumālie pea fiefia ʻi he fefakalototoʻaʻakí. (Teu. 31:12; Saame 22:22; Loma 1:11, 12) ʻE lava ke tāmateʻi ʻetau telefoní ʻi heʻetau aʻu ki aí pea toki tali ʻa e ngaahi pōpoakí he ʻosi ʻa e fakatahá? Kapau ʻoku ʻamanekina ha meʻa fakavavevave ʻo fiemaʻu ai ke tuku moʻui e telefoní, ʻoku totonu ke seti ia ke ʻoua te ne fakahohaʻasi ʻa e niʻihi kehé.

“Fai ʻa e Meʻa Kotoa Pē Maʻá e Ongoongo Leleí.” (1 Kol. 9:23): ʻI he taimi ʻe niʻihi, ʻoku ʻaonga hono ngāueʻaki ʻa e telefoni toʻotoʻó ʻi he ngāue fakafaifekaú. Ko e fakatātaá, ko e tokoua tataki kulupú te ne ngāueʻaki nai ke vakaiʻi ʻa e faʻahinga ʻi he tafaʻaki ʻe taha ʻo e feituʻu ngāué. ʻOku ngāueʻaki ʻe he kau malangá he taimi ʻe niʻihi ʻenau telefoni toʻotoʻó ke tā ki ha taha mahuʻingaʻia pe ako Tohi Tapu ki muʻa ke fai ha ʻaʻahi, tautefito kapau ʻoku mamaʻo ʻa e feituʻu ʻoku nofo aí. Kapau ʻoku ʻiate kitautolu ha telefoni, ʻoku totonu ke tau tokanga ke ʻoua te ne fakahohaʻasi kitautolu lolotonga ʻetau lea ki he tokotaha-ʻapí. (2 Kol. 6:3) Lolotonga ʻa e tatali ki he kau malangá, ʻi he ʻikai feʻaveʻaki pōpoaki pe telefoni ki ha kaumeʻá, ʻikai ʻe lelei ange ke tuku ʻetau tokangatahá ʻi he ngāue fakamalangá mo e faʻahinga ʻoku tau ngāue mo iá?

Tokaʻi ʻa e Niʻihi Kehé. (1 Kol. 10:24; Fil. 2:4): ʻOku ʻikai fiemaʻu ke tau fakataʻetaʻetokanga fekauʻaki mo e taimi ʻo e ngaahi fakataha ki he malangá mo e fakakaukau ʻe lava pē ke tau ʻoatu pōpoaki pe telefoni atu ki ha taha ke ʻilo ʻa e feituʻu ʻoku fai ki ai ʻa e malangá. ʻI heʻetau aʻu tōmuí, ʻoku faʻa toe fokotuʻutuʻu ʻa e kulupú. Ko e moʻoni, ko e taimi ʻe niʻihi ʻoku ʻikai ke tau lava ke mapuleʻi ʻa e ngaahi meʻá ʻo ʻai ai ke tau tōmui. Neongo ia, kapau ʻoku tau ʻai ke tau angaʻaki ʻa e maʻu taimí, ʻoku tau fakahāhā ʻa e tokaʻi ki he fokotuʻutuʻu ʻa Sihová, tokoua taki kulupú mo hotau kaungāmalangá.