Ko ha Kōlenga Loto-Māfana ke Tokanga ki he Warning Examples for Our Day
Ko kitautolu kotoa ʻe lava ke tau ʻai ke mālohi ʻetau fakapapau ke tauhi maʻu ʻetau anga-tonú ʻaki ʻa e tokanga ki he ngaahi lēsoni kuo tau ako mei he tulama faka-Tohitapu naʻe fakahaaʻi ʻi he vitiō Warning Examples for Our Day. Ki muʻa ke sio aí, kātaki ʻo lau ʻa e Nomipa vahe 25 mo e fakamatala puipuituʻa ʻi he Insight on the Scriptures, Voliume 2, peesi 419, palakalafi 3-5. Pea tali ʻa e ngaahi fehuʻí ni: Ko hai ʻa e kau Mōapé, pea ko e hā naʻe tala ai ʻe Sihova kia Mōsese ke ʻoua ʻe tauʻi kinautolú? (Teu. 2:9) Naʻe anga-fēfē ʻa e faʻufaʻu ʻa Pēlami ke ngāueʻaki ʻa e kau Mōapé ke fakaʻauha ʻa e puleʻanga ʻo ʻIsilelí? Ko e hā ʻoku totonu ai ke ʻoua ʻe ngalo ʻia kitautolu naʻe tō ʻa e kau ʻIsileli tokolahi ʻi ha ʻahiʻahi mātuʻaki mahuʻinga ʻi he ki muʻa pē ke nau hū ki he Fonua ʻo e Talaʻofá?—1 Kol. 10:11, 12.
Lolotonga ʻa e sio ʻi he vitiō Warning Examples, fakakaukau fekauʻaki mo e tafaʻaki hoko mai ʻe fā ʻi he moʻuí kuo pau ke tau fai ha tokanga fakamātoato ki ai ʻi he ʻahó ni kapau ʻoku fiemaʻu ke fakamoʻoniʻi ʻoku tau loto-tōnunga pea maʻu ʻa e hōifua ʻa e ʻOtuá. (1) Fakakaukau: Naʻe anga-fēfē hono fakahaaʻi ʻe he kau ʻIsileli ʻe niʻihi ha fakakaukau hala kia Sihova mo ʻene ngaahi fokotuʻutuʻú? ʻI hono kehé, ko e hā ʻa e fakakaukau ʻoku totonu ke tau feinga ke tapua atú? (2) Ngaahi Feohí: Ko e hā naʻe ʻikai fiemaʻu ai ʻe Sihova ke hoko ʻa e kau ʻIsilelí ʻo kaungāmeʻa mo e kau Mōapé? (Eki. 34:12; Pal. 13:20) Ko e hā kuo pau ai ke tau fili fakapotopoto hotau ngaahi kaungāmeʻá? (3) Ngaahi ʻUlungāngá: Ko e hā ʻa e angahala mamafa naʻe taki ki ai ʻe he ngaahi feohi koví ʻa e kau ʻIsileli naʻe fakafuofua ki he toko 23,000? (1 Kol. 10:8) ʻI he ʻahó ni, ko e hā kuó ne fakataueleʻi ʻa e niʻihi ʻo e kakai ʻa e ʻOtuá ki hono fai ʻa e ʻulungaanga taʻetāú, ka ʻe lava fēfē ke tau maluʻi kitautolu? (4) Lotu: Naʻe anga-fēfē hono siviʻi ʻo e kau ʻIsilelí fekauʻaki mo e tuʻunga maʻa ʻo ʻenau lotú? Ko e hā ʻa e founga olopoto ʻo e tauhi ʻaitolí ʻe tōngofua nai ki ai ʻa e niʻihi he ʻahó ni, ka ʻe lava fēfē ke tau fakaʻehiʻehi mei ai?—Kol. 3:5.
ʻI he tulamá, naʻe anga-fēfē hono tāpuakiʻi ʻa Siamini ʻi heʻene anga-tonu fakaeʻulungāngá? Fakafou ʻi he foʻi vitiō ko ení, ko e hā ʻa e kōlenga loto-māfana ʻoku fai ʻe he Kulupu Pulé ki he kotoa ʻo e kau Kalisitiane moʻoní? Kapau ko ha ʻuluʻi fāmili koe, ko e hā ʻokú ke ongoʻi ai ʻe fakapotopoto ke toutou sio ho fāmilí ʻi he polokalama ko ení?