‘Ulo ko e Ngaahi Maamaʻanga’
1 ʻI he lotolotonga ʻo e fakapoʻuli fakalaumālie mo fakaeʻulungaanga ʻo e fokotuʻutuʻu lolotonga ʻo e ngaahi meʻá, ko e toko ono miliona nai ʻo e kau lotu ʻa e ʻOtua moʻoni ko Sihová, ʻoku nau ‘ulo ko e ngaahi maamaʻanga’ ʻi he fonua ʻe 234 ʻi māmani lahi. (Fili. 2:15) ʻOku fakatupunga ʻe he meʻá ni ke tau ʻiloa. ʻOku anga-fēfē ʻetau tapua atu ʻa e maama mahuʻinga ʻo e moʻoní ʻa ia ʻoku haʻu meia Sihová?—2 Kol. 3:18.
2 Ko ʻEtau Tōʻongá: ʻOku vave ʻa e kakaí ke fakatokangaʻi hotau ʻulungāngá. (1 Pita 2:12) Naʻe mamata ha fefine ʻe taha ki ha kaungāngāue ko ha Fakamoʻoni naʻe anga-lelei mo faʻa tokoni, pea naʻe ʻikai te ne ngāueʻaki ʻa e lea koví pe kata ʻi he ngaahi hua taʻemaʻá. ʻI he taimi naʻe feinga ai ʻa e niʻihi kehé ke fakaʻitaʻi ʻa e tokotaha Fakamoʻoní ʻaki hono ngāueʻaki ʻa e lea koví ʻi heʻene ʻi aí, naʻá ne kei anga-mokomoko ai pē kae tuʻu mālohi ki he meʻa ʻoku totonú. Ko e hā ʻa e ola ʻo e meʻá ni ki he fefiné? ʻOkú ne manatu: “Naʻe fuʻu maongo kiate au ʻa hono ʻulungāngá ʻo kamata ai ke u ʻeke ʻa e ngaahi fehuʻi fekauʻaki mo e Tohitapú. Naʻá ku kamata ako ʻa e Folofola ʻa e ʻOtuá pea papitaiso ki mui.” ʻOkú ne tānaki mai: “Ko hono ʻulungāngá naʻá ne fakalotoʻi au ke sivisiviʻi ʻa e ngaahi tui ʻa e Kau Fakamoʻoni ʻa Sihová.”
3 Ko ʻetau fakakaukau ki he tuʻunga mafaí, ko ʻetau vakai ki he ngaahi tōʻonga fakamāmaní, mo ʻetau lea leleí ʻoku fakatupunga ai ke ʻiloa ʻa e Kau Fakamoʻoni ʻa Sihová ko ha kakai ʻoku nau moʻuiʻaki ʻa e ngaahi tuʻunga māʻolunga ʻa e Tohitapú. Ko e ngaahi ngāue lelei peheé ʻe lava ke ʻoatu ai ʻa e lāngilangi kia Sihova pea tohoakiʻi mai ai ʻa e niʻihi kehé ki heʻene lotú.
4 Ko ʻEtau Ngaahi Leá: Ko e moʻoni, ko e faʻahinga ʻoku nau sio ki hotau ʻulungaanga leleí ʻe ʻikai nai te nau ʻiloʻi ʻa e ʻuhinga ʻoku tau kehe aí kae ʻoua kuo tau lea kia kinautolu fekauʻaki mo ʻetau ngaahi tuí. ʻOku ʻiloʻi ʻe he faʻahinga ʻokú ke ngāue pe ako fakataha mo iá ko e taha koe ʻo e Kau Fakamoʻoni ʻa Sihová? ʻOkú ke kumi ki ha ngaahi faingamālie ke liliu ha fetalanoaʻaki anga-maheni ke fai ai ha fakamoʻoni? Ko hoʻo fakapapaú ia ke ‘ulo atu hoʻo māmá ke hā ki he kakaí’ ʻi he taimi feʻungamālie kotoa pē?—Mt. 5:14-16.
5 Ko hono fakahoko ʻetau ngāue ko e kau toʻo-māmá ʻoku fiemaʻu ki ai ha laumālie ʻo e feilaulauʻi-kita. Ko ha fakakaukau ʻaufuatō te ne ueʻi ai kitautolu ke fakaʻehiʻehi mei he ngaahi meʻa ʻoku siʻi hono mahuʻingá koeʻuhi ke fai ʻa e meʻa lahi te tau lavá ʻi he ngāue fakahaofi-moʻui ko e malangá mo e ngaohi-ākongá.—2 Kol. 12:15.
6 ʻI heʻetau ngāué mo e leá, ʻofa ke tau hokohoko atu ʻi he ulo ko e ngaahi maamaʻangá. Kapau te tau fai pehē, ʻe ueʻi nai ai ʻa e niʻihi kehé ke nau kau fakataha mo kitautolu ʻi hono ʻave ʻa e lāngilangí kia Sihová.