Polokalama ʻAho ʻAsemipilī Makehe Foʻou
ʻOku ala maʻu ʻa e fakamatala lahi ʻi he ngaahi ʻahó ni fekauʻaki mo hono tauhi hotau mafú ʻi ha tuʻunga lelei koeʻuhi ke maʻu ai ha moʻui fiefia ange mo lōloa ange. ʻOku mahuʻinga lahi angé ʻa e tuʻunga ʻo hotau lotó. He feʻungamālie leva ē ko e kaveinga ʻo e polokalama ʻaho ʻasemipilī makehe foʻou kamata ʻi Sepitema 2003: “Tauhi kia Sihova ʻAki ha Loto Kakato.” (1 Kal. 28:9, NW) Ko e hā ʻe lava ke tau fakatuʻotuʻa atu ke akó?
Ko e ʻovasia sēketí ʻe lāulea ki he kaveinga “Tokoniʻi ʻa e Niʻihi Kehé Ke Nau Tauhi kia Sihova ʻAki ha Soulu Fiefia.” ʻE fakaeʻa ʻi he ngaahi fakaʻekeʻeké ʻa e fiefia ʻoku tupu mei hono fakatupulekina ʻa e mahuʻingaʻiá mo hono fai ʻa e ngaahi ako Tohitapu mo e kakai ʻoku nau loto ke tauhi kia Sihová. Ko e faʻahinga kotoa te nau kau ki aí ʻoku ʻikai ha veiveiua te nau maʻu ʻa e fakafiemālie mo e fakalototoʻa mei he ʻuluaki malanga ʻa e tokotaha malanga ʻaʻahí, “Maluʻi Hotau Lotó ʻi ha Māmani Faingataʻa.” Ko e konga pongipongí ʻe fakaʻosiʻaki ʻa e malanga papitaisó.
ʻI he efiafí, ko e konga “Fakaaʻu Atu ha Nima Tokoni” ʻe lāulea ai ki he founga ʻe lava ke tau tokoniʻi ai ʻa e niʻihi kehé. Ko e hā ʻe lava ke fai ʻe he ngaahi mātuʻá ke maluʻiʻaki ʻa e loto ʻo ʻenau fānaú mei he ngaahi tākiekina halá pea tokoniʻi kinautolu ke nau ʻunuʻunu ofi kia Sihová? Ko e konga “Tokoniʻi Hoʻo Fānaú Ke Nau Fiefia ʻia Sihova” ʻe tokonaki mai ai ʻa e ngaahi fokotuʻu ʻaonga pea ʻe fakahāhā ai ʻa e founga ʻe lava ke fai ai ení.
ʻOku tau ngāueʻaongaʻaki ʻa e tokonaki kotoa ʻoku fai ʻe Sihova ke tauhi ʻaki hotau lotó ke moʻui lelei mo mālohí? Ko e malanga fakaʻosi ʻa e tokotaha malanga ʻaʻahí, “Tauhi Maʻu ha Loto Kakato ʻi he Tauhi kia Sihová,” ʻe fakahangataha ia ki he tafaʻaki tefito ʻe fā ʻo ʻetau polokalama ki hono tauhi hotau tuʻunga fakalaumālié. Ko e hā ʻa e lahi ʻo e taimi mo e feinga ʻoku tau līʻoa ki he lotu fakamātoató, ki hono ako ʻa e Folofola ʻa e ʻOtuá, ki he malanga faivelengá, pea ke feohi mo e kau Kalisitiane kehé? ʻE lava ke tau fakalakalaka ʻi ha taha ʻo e ngaahi tafaʻaki ko ení?
ʻOku fakaaʻu mai ʻe Sihova ʻa e fakaafe: “Fakatokagaʻi ho loto ki he akonaki, bea mo ho teliga ki he gaahi lea ae ilo.” (Pal. 23:12, PM) Palani he taimí ni ke maʻu ʻa e ʻaho ʻaonga ko eni ʻo e fakahinohino Fakatohitapú. Ko hono fai iá ʻe fakaivimālohiʻi ai koe ke ke hokohoko atu ʻa e tauhi kia Sihová fakataha mo ha loto kakato pea mo ha soulu fiefia.