Polokalama ʻAho ʻAsemipilī Makehe Foʻou
Ko e matá ko ha tisaini fakaofo ia. (Sāme 139:14) Ka neongo ia, ʻe lava ke huʻufataha ʻene sió ki he meʻa ʻe taha pē ʻi he taimi. ʻOku moʻoni fakatouʻosi ia ʻi heʻene tuʻu totonú mo e fakaefakatātaá. Ke hā mahino mo huʻufataha ʻetau vakai fakalaumālié, kuo pau ke tau fakahangataha ʻa ʻetau tokangá ki hono fai ʻa e finangalo ʻo e ʻOtuá. ʻI he vakai ki he ngaahi fakahohaʻa fakautuutu ʻo e māmani ʻa Sētané, he feʻungamālie ē ko e teu ke fakatupulekina ʻe he polokalama ʻaho ʻasemipilī makehe ki he taʻu fakangāue ʻo e 2006 ʻa e kaveinga “Tauhi Ho Matá ke Huʻufataha”!—Mt. 6:22.
ʻE lava fēfē ke tau fakahoko ʻa e meʻa ke maʻu ai ʻa e ngaahi tāpuaki meia Sihová? (Pal. 10:22) Ko e fehuʻi ko ʻení ʻe lāulea ki ai ʻi he konga “Utu e Ngaahi Tāpuaki ʻi he Tauhi ha Mata Huʻufatahá.” ʻE fakamamafaʻi ʻe he ngaahi fakaʻekeʻeké ʻa e founga ʻe lava ke tau maʻu ʻaonga ai mei hono ngāueʻaki ʻa e ngaahi tefitoʻi moʻoni Fakatohitapú. Ko e ʻuluaki malanga ʻe fai ʻe he tokotaha malanga ʻaʻahí, “Ko Hono Tauhi ha Mata Huʻufataha ʻi ha Māmani Fulikivanu,” ʻe fakatokanga mai ai kiate kitautolu fekauʻaki mo e ngaahi meʻa ʻe lava ke ne fakafihiʻi ʻetau moʻuí mo fakafulutāmakiaʻi māmālie hotau tuʻunga fakalaumālié. Te tau toe ako foki ai ki he meʻa ʻoku kau ki hono fili ko ia “ʻa e ngafa ʻoku lelei.”—Luke 10:42.
ʻE lava fēfē ke fakalototoʻaʻi ʻe he ngaahi mātuʻá mo e niʻihi kehé ʻa e kau talavou Kalisitiané ke hangataha ki he ngaahi ngāue fakalaumālié? Ko e ongo konga, “Ngaahi Mātuʻa ʻOku Nau Fakataumuʻa Totonu ʻEnau Ngaahi Ngahaú” mo e “Toʻutupu ʻOku Nau Kakapa Atu ki ha Ngaahi Taumuʻa Fakalaumālié” ʻe kau ai ʻa e ngaahi fakamatala mei he ngaahi mātuʻa mo e kau talavou ʻi he fehuʻi mahuʻinga ko ʻení. (Sāme 127:4) Ko e malanga fakaʻosí ʻa ia ʻe fai ʻe he tokotaha malanga ʻaʻahí ʻe lāulea ai ki he founga ʻe lava ke tau laka ki muʻa fakataha ai mo e kautaha ʻa Sihová ʻi he tuʻunga fakatāutahá, ko e ngaahi fāmilí pea mo e tuʻunga ko e fakatahaʻangá.
Neongo pe ko ʻetau toki maheni foʻou eni mo e moʻoní pe kuo tau ʻosi tauhi ʻe kitautolu ʻa Sihova ʻi he ngaahi hongofuluʻi taʻu, ʻoku mātuʻaki mahuʻinga ke tau ‘tauhi hotau matá ke huʻufataha.’ Ko e polokalama ʻaho ʻasemipilī makehé te ne tokoniʻi kitautolu ke tau fai ʻa e meʻa tofu pē ko iá.