Polokalama ʻAho ʻAsemipilī Makehe Foʻou
Kapau ʻoku tau sio pe fanongo ki ha fakaʻilonga fakatokanga kae ʻikai ke ngāue ki ai, ʻe lava ke hoko ʻo fakatupu ʻauha ʻa e ngaahi olá. ʻOku toe mahuʻinga ange ke ngāue ki he fakahinohino fakalaumālie ʻoku tokonaki mai ʻe Sihová. ʻE fakamamafaʻi eni ʻi he polokalama ʻaho ʻasemipilī makehe foʻou ki he taʻu fakangāue ka hoko maí. Ko e kaveingá ko e “Tokanga ki he Anga Hoʻomou Fanongo.”—Luke 8:18.
ʻI heʻene malanga ʻuluakí, ʻe lāulea ai ʻa e tokotaha malanga ʻaʻahí ki he anga ʻo e kaunga kia kitautolu ʻi he ʻaho ní ʻa e akonaki ʻi he ngaahi vahe kamata ʻo e tohi fakamānavaʻi ʻa Paula ki he kau Hepeluú. ʻI he malanga fakaʻosí, ko e “Tokanga Hokohoko ki he Fakahinohino Fakaʻotuá,” te ne tokoniʻi ʻa e tokotaha kotoa ke sivisiviʻi pe ʻoku nau fanongo moʻoni kia Sihova, ko hono ʻAló pea mo e “tamaioeiki agatonu mo boto.”—Mt. 24:45, PM.
Ko e ngaahi konga lahi ʻo e polokalamá ʻe ʻaonga tautefito ia ki he ngaahi fāmilí. Ko e “Ngaahi Fāmili ʻOku Fanongo ʻo ʻIkai Fakahohaʻasi ki he Folofola ʻa e ʻOtuá” ʻe tokoniʻi ai kitautolu ke taʻofi ʻa e ngaahi meʻa ʻo e māmaní mei heʻene kāsia ʻa hotau tuʻunga fakalaumālié. ʻE kau ai ʻa e ngaahi fakaʻekeʻeke ʻo e faʻahinga kuo nau fai ʻa e ngaahi liliu koeʻuhi ke fakamuʻomuʻa ʻa e ngaahi meʻa fakalaumālié. Ko e “Founga ʻo Hono Fakaivia ʻo ʻEtau Kau Talavoú ʻe he Fanongo Tokanga ki he Folofola ʻa e ʻOtuá” ʻe kau ai ʻa e ngaahi fakaʻekeʻeke ʻo e kau talavou kuo nau tuʻu maʻá e moʻoní ʻi he ʻapiakó, ʻi honau ngaahi toʻumeʻá, pe ʻi he ngāue fakafaifekaú. Ko e “Fānau Iiki ʻOku Fanongo ki he ʻOtuá pea Akó” ʻe tokoniʻi ai kitautolu ke ʻoua ʻe fakasiʻia ʻa e malava fakaeako ʻa e fānaú. Ko e ngaahi fakaʻekeʻeke ʻo e fānaú mo ʻenau ngaahi mātuʻá ʻe tokoniʻi ai kitautolu ke sio ki he lelei ʻoku hoko mai ʻi hono akoʻi ʻa e fānaú mei he valevalé ki he ngaahi founga ʻa Sihová.
Lolotonga ʻoku hanga ʻe Sētane ʻo “kākāʻi ʻa mamani kātoa,” ʻoku fakahaaʻi ʻe Sihova ki heʻene kau sevāniti faitōnungá ʻa e hala ʻoku totonu ke nau ʻaʻeva aí. (Fkh. 12:9; Ai. 30:21) Ko e fanongo tokanga ki heʻene akonakí pea ngāueʻaki ia ʻi he talangofua ʻi heʻetau moʻuí ʻoku ʻai ai kitautolu ke tau poto, ʻomai kia kitautolu ʻa e fiefia pea iku atu ai ki he moʻui taʻengata.—Pal. 8:32-35.