Konga 5​—Fai ʻa e Ngaahi Ako Tohi Tapu Fakalakalaká

Fakapapauʻi ʻa e Lahi ʻo e Fakamatala ke Kāpuí

¹ ʻI heʻene faiakó, naʻe fakakaukau ʻa Sīsū ʻo fekauʻaki mo e ngaahi ngataʻanga ʻo ʻene kau ākongá, ʻo ne lea kia kinautolu “ʻo fakatatau ki heʻenau mafai ke fanongo ki ai.” (Maake 4:33; Sione 16:12) ʻI ha tuʻunga meimei tatau, ʻoku fiemaʻu ki he kau faiako ʻo e Folofola ʻa e ʻOtuá he ʻaho ní ke nau fakapapauʻi ʻa e lahi ʻo e fakamatala ʻe ʻaonga ke kāpui ʻi ha ako Tohi Tapu ʻi ha taimi tuku pau. Ko e lahi ʻo e fakamatala ʻe lava ke lāulea ki aí ʻe fakatuʻunga pē ia ʻi he malava mo e ngaahi tuʻunga fakatouʻosi ʻa e faiakó mo e tokotaha akó.

² Langa ha Tui Fefeka: ʻE fiemaʻu nai ki ha kau ako ʻe niʻihi ha konga ʻe ua pe tolu ke mahinoʻi ai ʻa e fakamatala tatau ko ia ʻoku mahinoʻi ngofua ʻe he kau ako kehe ʻi he konga ʻe tahá. ʻOku mahuʻinga ange ke tau tokoniʻi ʻa e tokotaha akó ke mahinoʻi māʻalaʻala ʻa e fakamatalá ʻi haʻatau kāpui ha fuʻu fakamatala lahi ʻi ha taimi nounou. Ko e tokotaha ako kotoa pē ʻoku nau fiemaʻu ha makatuʻunga fefeka ki heʻenau tui kuo toki maʻu ʻi he Folofola ʻa e ʻOtuá.—Pal. 4:7; Loma 12:2.

³ ʻI hoʻo fai ʻa e akó ʻi he uike kotoa pē, fakamoleki ha faʻahinga taimi pē ʻoku fiemaʻu ke tokoniʻi ai ʻa e tokotaha akó ke ne mahinoʻi mo tali ʻa e meʻa ʻokú ne lolotonga ako mei he Folofola ʻa e ʻOtuá. Fakaʻehiʻehi mei hono fakavaveʻí ʻa ia ʻe ʻikai maʻu ʻaonga ai ʻa e tokotaha akó mei he mahuʻinga kakato ʻo e ngaahi moʻoni ʻoku akoʻí. Fakamoleki ha taimi feʻunga ke fakahanga ai ʻa e tokangá ki he ngaahi poini tefitó pea lāulea ki he ngaahi konga Tohi Tapu tefitó ʻa ia ʻoku tokonaki mai ai ʻa e makatuʻunga ki he akó.—2 Tim. 3:​16, 17.

⁴ Tauhi ki he Kaveinga ʻo e Akó: Lolotonga ʻa ʻetau fiemaʻu ke fakaʻehiʻehi mei hono fakavaveʻi ʻa e akó, ʻoku tau toe fiemaʻu ke fakaʻehiʻehi mei hono afeʻi ʻa e kaveingá. Kapau ʻe ʻi ai ha tokotaha ako ʻoku hehema ke fakamoleki ha taimi lahi ʻi he talanoa ʻo fekauʻaki mo ʻene ngaahi meʻa fakafoʻituituí, ʻe fiemaʻu nai ke tau fokotuʻutuʻu ki ha fetalanoaʻaki ʻi he ngaahi meʻá ni hili ʻa e akó.—Koh. 3:1.

⁵ ʻI he tafaʻaki ʻe tahá, ko ʻetau faivelenga tonu maʻá e moʻoní ʻe lava ke ne ʻai ai ia ke hoko ko ha pole ʻa e ʻikai ke fakamatala lahi lolotonga ʻa e akó. (Sāme 145:​6, 7) Ko ha foʻi poini pe meʻa naʻe hokosia kehe ʻi ha taimi ʻe lava ke hoko ʻo ʻaonga ia ʻi ha ako, ka ʻe ʻikai ke tau fiemaʻu ʻa e ngaahi meʻá ni ke hoko ʻo fuʻu lahi mo lōloa ʻa ia ʻe taʻofi ai ʻa e tokotaha akó mei haʻane maʻu ha ʻiloʻi totonu ʻo e ngaahi tefitoʻi akonaki ʻa e Tohi Tapú.

⁶ ʻI hono kāpui ha fakamatala lahi feʻunga ʻi he konga ako kotoa peé, ʻoku tau tokoniʻi ai ʻa e kau ako Tohi Tapú ke nau “laka ʻi he maama ʻo Sihova.”—Ai. 2:5.