Konga 9—Fai ʻa e Ngaahi Ako Tohi Tapu Fakalakalaká
Teuʻi ʻa e Kau Akó ke Faifakamoʻoni ʻIkai ʻi he Founga Anga-Mahení
1 ʻI he taimi naʻe ʻiloʻi ai ʻe ʻAnitelū mo Filipe ko Sīsū ʻa e Mīsaia naʻe talaʻofaʻaki maí, naʻe ʻikai te na fakamaʻumaʻu ʻena tala ki he niʻihi kehé ʻa e ongoongo fakafiefiá. (Sione 1:40-45) ʻOku pehē pē ʻi he ʻahó ni, ʻi he kamata ke ngāueʻi ʻe he kau ako Tohi Tapú ʻa ʻenau tui ki he meʻa ʻoku nau akó, ʻoku ueʻi ai kinautolu ke nau lea ʻo fekauʻaki mo ia. (2 Kol. 4:13) ʻE lava fēfē ke tau fakalototoʻaʻi kinautolu ke nau faifakamoʻoni ʻikai ʻi he founga anga-mahení pea teuʻi kinautolu ke nau fai ola lelei iá?
2 Te ke ʻeke pē nai ki he tokotaha akó pe kuó ne ʻosi lea ki he niʻihi kehé ʻo fekauʻaki mo e meʻa kuó ne ako mei he Tohi Tapú. Mahalo pē ʻoku ʻi ai ha ngaahi kaungāmeʻa pē mēmipa he fāmilí ʻa ia ʻe lava ke ne fakaafeʻi ke kau ʻi he akó. ʻEke angé pe kuo ʻi ai ha taha ʻi hono kaungāngāué, kaungāakó pe ko ha toe ngaahi maheni kehe kuo nau fakahāhā ha mahuʻingaʻia. ʻI he founga ko ení ʻe lava ai ke ne kamata ke fai ha fakamoʻoni. Tokoniʻi ia ke ne mahinoʻi ʻa e fiemaʻu ke ngāueʻaki ʻa e ʻiloʻiló pea ke hoko ʻo anga-fakaʻapaʻapa pea anga-ʻofa ʻi heʻene lea ki he niʻihi kehé ʻo fekauʻaki mo Sihova ko e ʻOtuá pea mo ʻene ngaahi taumuʻá.—Kol. 4:6; 2 Tim. 2:24, 25.
3 Ko Hono Vahevahe Atu ʻEnau Tuí: ʻOku mātuʻaki mahuʻinga ke akoʻi ʻa e kau ako Tohi Tapú ke nau ngāueʻaki ʻa e Folofola ʻa e ʻOtuá ʻi he taimi ʻoku nau vahevahe atu ai ʻenau ngaahi tuí. ʻI ha ngaahi poini kuo filifili lolotonga ʻa e akó, ʻeke ange ki he tokotaha akó: “ʻE anga-fēfē haʻo ngāueʻaki ʻa e Tohi Tapú ke fakamatalaʻi ʻa e moʻoni ko ení ki ho fāmilí?” pe “Ko e hā ʻa e konga Tohi Tapu te ke ngāueʻaki ke fakamoʻoniʻi eni ki ha kaumeʻá?” Fakatokangaʻi ʻa e anga ʻo ʻene talí, pea fakahaaʻi ange ʻa e founga ke fakatuʻunga ai ʻa ʻene faiakó ʻi he Tohi Tapú. (2 Tim. 2:15) ʻI hoʻo fai peheé, te ke teuʻi ai ʻa e tokotaha akó ke faifakamoʻoni fakatouʻosi ʻi he founga ʻikai anga-mahení, pea ʻi he taimi te ne taau aí, ʻi he ngāue fakamalanga fokotuʻutuʻu lelei fakataha mo e fakatahaʻangá.
4 ʻOku fakapotopoto ke teuʻi ʻa e kau ako Tohi Tapú ke nau fehangahangai mo e fakafepakí. (Mt. 10:36; Luke 8:13; 2 Tim. 3:12) ʻI he taimi ʻoku langaʻi hake ai ʻe he niʻihi kehé ʻa e ngaahi fehuʻí pe fai ha ngaahi fakamatala ʻo fekauʻaki mo e Kau Fakamoʻoni ʻa Sihová, ʻe fakaava nai ai heni ha hala ki he kau akó ke nau fai ha fakamoʻoni. ʻE lava ke teuʻi kinautolu ʻe he polosiua ko e Kau Fakamoʻoni ʻa Sihová—Ko Hai Kinautolu? Ko e Hā ʻOku Nau Tui ki Aí? ke nau “mateuteu maʻu pē ke fai ha taukapo.” (1 Pita 3:15, NW) ʻOku tokonaki mai ai ʻa e fakamatala totonu ʻe lava ke ngāueʻaki ʻe he faʻahinga foʻoú ke tokoniʻiʻaki ʻa e kaungāmeʻa mo e ngaahi mēmipa ʻo e fāmilí ʻoku nau fakataumuʻa leleí ke nau mahinoʻi ʻa ʻetau ngaahi tuí mo e ngaahi ngāue makatuʻunga Fakatohitapú.