Fakatupulekina e Mahuʻingaʻiá ʻAki ha Tukuʻanga Makasini Pau
1. ʻE lava fēfē ke tau ngāueʻaki ha tukuʻanga makasini pau ke fakatupulekinaʻaki ha mahuʻingaʻia?
1 Ko e tokolahi ʻo e kakai ʻoku tau fetaulaki mo ia ʻi he ngāue fakafaifekaú ʻoku nau talitali lelei ʻa ʻetau ngaahi ʻaʻahí pea nau tali fiefia ʻa ʻetau ngaahi tohí ka ʻoku nau toumoua ke loto-lelei ki ha ako Tohi Tapu tuʻumaʻu. Ko e founga ʻe taha ke fakatupulekina ai ʻa ʻenau mahuʻingaʻiá ʻoku fakafou ia ʻi ha tukuʻanga makasini pau. ʻI hoʻo tufa ʻa e ngaahi makasiní, ʻai ha lēkooti ʻo e hingoa mo e tuʻasila ʻo e tokotahá, ko e ʻaho ʻo e ʻaʻahí, ko e ngaahi ʻīsiu naʻe talí, pea mo e konga Tohi Tapu naʻe fai ki ai ʻa e lāuleá, fakataha mo ha meʻa pē naʻá ke fakatokangaʻi ʻa ia ʻe fakahaaʻi nai ai ʻa e ngaahi mahuʻingaʻia ʻa e tokotahá. ʻI he aʻutaki mai pē ʻa e ʻīsiu foʻou taki taha ʻo e ngaahi makasiní, kumi leva ha ngaahi poini ʻa ia ʻe fakamānako ki he faʻahinga ʻi hoʻo tukuʻanga makasiní, peá ke fakaʻaliʻali ia ʻi he taimi ʻe fai ai hoʻo ʻaʻahí. (1 Kol. 9:19-23) ʻE ʻi ai ʻa e taimi ʻe langaʻi nai ai ʻenau mahuʻingaʻiá ʻe ha meʻa te nau lau ʻi heʻetau ngaahi pepá pea fakatupunga ai kinautolu ke nau fiemaʻu ke ako lahi ange.
2. Ko e hā ʻoku fiemaʻu fakavavevave ai ki he kakaí ke nau kumi kia Sihova he taimi ní, pea ko e hā ʻa e toe meʻa lahi ange ʻe lava ke tau fai ke tokoniʻi ai kinautolú?
2 Kae kehe, ʻoku tau fakatokangaʻi ko e tokolahi taha ʻo e kakaí heʻikai te nau hoko ko ha kau sevāniti ʻa Sihova ʻi hono lau ʻiate kinautolu pē ʻa e ngaahi makasiní. Koeʻuhi ʻoku fiemaʻu fakavavevave ki he kakaí ke nau kumi kia Sihova he taimí ni, ko e hā ʻa e toe meʻa lahi ange ʻe lava ke tau fai ke tokoniʻi ai kinautolú? (Sef. 2:2, 3; Fkh. 14:6, 7) ʻE lava ke tau fakatupulekina ʻenau mahuʻingaʻiá ʻaki hono vahevahe atu ha konga Tohi Tapu kuo filifili lelei ʻi he taimi taki taha te tau ʻave ai ʻa e ngaahi makasiní.
3. (a) ʻE lava fēfē ke tau teuteu ha hokohoko ʻo ha fetalanoaʻaki konga Tohi Tapu ʻe taha? (e) Ko e hā ʻa e ngaahi kaveinga ʻoku hohaʻa lahi taha ki ai ʻa e kakai ʻi ho feituʻú?
3 Fetalanoaʻaki Konga Tohi Tapu ʻe Taha: Fakakaukau ʻo kau ki he faʻahinga ʻi hoʻo tukuʻanga makasini paú, pea teuteuʻi ha hokohoko ʻo ha fetalanoaʻaki konga Tohi Tapu ʻe taha ki he fiemaʻu pau ʻa e tokotaha taki taha. (Fili. 2:4) Ko e fakatātaá, kapau ʻoku ʻi ai ha taha kuo toki mole atu ki muí ni hano ʻofaʻanga ʻi he maté, te ke ngāueʻaki nai ha ngaahi toe ʻaʻahi ke lāulea ai ki he meʻa ʻoku leaʻaki ʻe he Tohi Tapú ʻo kau ki he tuʻunga ʻo e kau maté pea mo e ʻamanaki ʻo e toetuʻú. Ko e fakamatala ʻi he tohi Reasoning ʻi he ongo kaveinga tefito ko e “Mate” mo e “Toetuʻu” ʻe lava ke ngāueʻaki ia ke teuteuʻiʻaki ʻa e ngaahi fetalanoaʻaki konga Tohi Tapu ʻe taha ko ení. Ko e ngaahi fetalanoaʻaki lahi ange ʻi he ngaahi kaveinga felāveʻi mo iá, hangē ko e founga ʻe toʻo fakaʻaufuli atu ai ʻa e mahamahakí, taʻumotuʻá mo e maté, ʻe fakanatula pē nai ai ʻa e hoko atu ki aí. Ko e taumuʻá ke kumi ha kaveinga ʻe mahuʻingaʻia ai ʻa e tokotahá pea fakahaaʻi hokohoko ange kiate ia ʻa e meʻa ʻoku leaʻaki ʻe he Tohi Tapú ʻo kau ki aí.
4. Ko e hā ʻoku mahuʻinga ai ke tokoniʻi ʻa e niʻihi kehé ke nau maʻu e mahinó ʻi heʻetau ngāueʻaki ʻa e Tohi Tapú, pea ʻe lava fēfē ke tau fai pehē?
4 Tokoniʻi ke Mahino: Neongo ʻoku faʻa lelei tahá pē ke tauhi ke faingofua mo nounou ʻa e ngaahi fetalanoaʻaki peheé, ʻoku fiemaʻu ʻa e meʻa lahi ange ʻi hono lau ʻataʻatā pē ʻa e konga Tohi Tapu kuo filí. Kuo fakakuihi ʻe Sētane ʻa e ʻatamai ʻo e kakaí mei he ongoongo leleí. (2 Kol. 4:3, 4) Naʻa mo e faʻahinga ʻoku nau maheni mo e Tohi Tapú ʻoku nau fiemaʻu ʻa e tokoni ke nau mahinoʻi ia. (Ng. 8:30, 31) Ko ia ai, vaheʻi ha taimi ke fakamatalaʻi ai mo fakatātaaʻi ʻa e konga tohí, ʻo hangē pē ko haʻo fai ia ʻi ha malanga ʻi he Ako Fakafaifekau Fakateokalatí. (Ng. 17:3) Fakapapauʻi ʻoku sio ʻa e tokotahá ki he ʻaonga mahuʻinga ʻo e Folofola ʻa e ʻOtuá ʻi heʻene moʻuí tonu.
5. ʻE lava fēfē ke hoko ha ʻaʻahi tukuʻanga makasini pau ko ha ako Tohi Tapu?
5 Kapau ʻoku fiefia ʻa e tokotahá ʻi he meʻa ʻokú ne akó, fakalahi māmālie ʻa e fetalanoaʻakí ke kau ai ha konga Tohi Tapu ʻe ua pe tolu ʻi he ʻaʻahi taki taha. Kumi ki ha faingamālie ke fakaʻaliʻali ai ʻa e polosiua Fiemaʻu pe ko e tohi ʻIlo. ʻI he founga ko ení, ʻe faai atu pē nai ai ʻo hoko ha ʻaʻahi tukuʻanga makasini pau ko ha ako Tohi Tapu.