Ko ha Ako ʻOkú Ne Tokoniʻi Kitautolu Ke Tau Ngāueʻaongaʻaki ʻa e ʻIló
1 ʻI heʻetau lāulea ki he fakamatala ʻoku fakahokohoko ʻi he Taimi-Tēpile Ako Fakafaifekau Fakateokalati ki he 2006, ʻoku tau feinga ke maʻu ʻaonga mei he ngaahi akonaki Fakatohitapú ʻaki ʻetau ngāueʻaki kinautolu ʻi heʻetau ngāue toputapú pea mo e moʻui fakaʻahó. ʻOku tau ʻai ko ha fakapapau ia ke tau ngāueʻaki ʻa e ngaahi meʻa ʻoku tau akó.—Sione 13:17; Fili. 4:9.
2 Ko Hono Fai ʻa e Ngaahi Poupoú: Ko e taimi-tēpile ki he taʻu ní ʻoku vaheʻi ai ha toe miniti ki he kau mai ko ia ʻa e kau fanongó ki he ngaahi meʻa mahuʻinga mei he Tohi Tapú. ʻOku ʻuhinga ení ko e tokoua ʻoku vaheʻi ke ne fakahoko ʻa e ngaahi meʻa mahuʻingá ʻoku totonu ke ne tokanga ke fakakakato ʻene kongá ʻi he miniti ʻe nima ʻo ʻikai ko e ono. Ko e faʻahinga ʻoku nau fai ʻa e ngaahi poupoú mei honau nofoʻangá ʻoku totonu ke nau toe tokanga ki heʻenau taimí. ʻAki ʻa e tomuʻa fakakaukau fakalelei, ko e tokotaha ʻoku poupoú ʻe lava ke ne fakahaaʻi ʻa e fakamatala ʻaongá ʻi he sekoni ʻe 30 pe siʻi ange ai. ʻOku fakafuofua ki he toko hongofulu ʻoku totonu ke nau malava ʻo fai ha ngaahi poupou mohu ʻuhinga lolotonga ʻa e miniti ʻe nima kuo vaheʻi ki he kau mai ʻa e kau fanongó.
3 Ngaahi Malanga ʻOku Faiako: Ko e ngaahi meʻa mahuʻinga mei he Tohi Tapú mo e malanga fakahinohinó ʻoku totonu ke fakahangataha ia ki he mahuʻinga ʻo e fakamatalá ʻi hono ngāueʻaki ki heʻetau ngāue fakafaifekaú pea mo e ngaahi tafaʻaki kehe ʻo ʻetau moʻui fakaʻahó. ʻOku totonu ki ha tokotaha malanga ke ne fai ʻa e meʻa lahi ange ʻo ʻikai ko e ueʻi pē ʻene kau fanongó ki ha holi ke fai ha ngāue. ʻOku totonu ke ne fakamahinoʻi pe ko e hā ʻa e ngāue ʻoku fiemaʻú, fakahaaʻi ʻa e founga ʻe lava ke fakahoko ai iá, pea tohoakiʻi ʻa e tokangá ki he ngaahi ʻaonga ʻo hono fai ʻa e ngāue peheé. ʻE malava nai ke ne pehē, “Ko e founga eni ʻoku tokonaki mai ai ʻe he konga tohi ko ení ʻa e tataki kiate kitautolú,” pe “Ko e founga eni ʻe lava nai ke tau ngāueʻaki ai ʻa e ngaahi vēsí ni ʻi he ngāue fakafaifekaú.” Ko e kau mātuʻa mo e kau sevāniti fakafaifekau ʻoku nau lāuʻilo ki he ngaahi tuʻunga fakalotofonuá ʻoku totonu ke nau feinga ke ngāueʻaongaʻaki ʻa e fakamatalá ki heʻene fakahangatonu taha ʻe ala lavá.
4 Ko e lave ki he ngaahi faʻifaʻitakiʻanga Fakatohitapú ʻe lava ke tautefito ʻene ola leleí ʻi hono ngāueʻaongaʻaki ʻo e ʻiló. Hili ʻa e lave ki ha faʻifaʻitakiʻanga Fakatohitapu, ʻe lava ke pehē ʻe ha tokotaha malanga, “Te ke fetaulaki nai mo ha tuʻunga meimei tatau ʻo hangē ko ení.” ʻOku totonu ke ne fakapapauʻi ʻoku fehoanaki hano ngāueʻaki pē ʻo e faʻifaʻitakiʻanga Fakatohitapú mo e potutohí, mo e Tohi Tapú fakalūkufua pea mo e meʻa kuo pulusi ʻe he “tamaioeiki agatonu mo boto.”—Mt. 24:45, PM.
5 Ko e potó ko e malava ke ngāueʻaki lavameʻa ʻa e ʻiló mo e mahinó. “Koe boto koe mea oku fugani hake.” (Pal. 4:7, PM) ʻI heʻetau hokohoko atu ke maʻu ʻa e poto ʻaonga fakafou ʻi heʻetau ngaahi ako ʻi he Ako Fakafaifekau Fakateokalatí, ʻofa ke tau toe fakatupulekina ai ʻa e pōtoʻi ʻi hono fakahoko atu ia ki he niʻihi kehé.