Langa Fale Fakatahaʻangá—Ko ha Tafaʻaki Mahuʻinga ʻo e Ngāue Toputapú
1. Ko e hā kuo lavaʻi ʻi he langa Fale Fakatahaʻangá, ka ko e hā ʻa e meʻa ʻoku kei fiemaʻú?
1 Lolotonga ʻa e taʻu ʻe nima kuohilí, naʻe langa ai ʻa e Fale Fakatahaʻanga ʻe 16, fakaleleiʻi ʻa e 2 pea naʻe fakalahi mo fakaleleiʻi ʻa e 8, ʻi he feituʻu ngāue ʻo e vaʻa ʻi Nuʻu Silá. ʻOku tau houngaʻia moʻoni ʻi he ngāue mālohi ʻa e Ngaahi Kōmiti Langa Fakafeituʻú pea mo e faʻahinga kotoa naʻe tokoni ki aí. Lolotonga ko ha ngāue lahi fakaʻulia kuo lavaʻí, ʻoku kei toe lahi pē ʻa e meʻa ke fai ʻi he langa Fale Fakatahaʻangá. ʻE lava fēfē ke tau poupou kotoa ki he tafaʻaki mahuʻinga ko eni ʻo ʻetau ngāue toputapu kia Sihová?—Fkh. 7:15.
2. ʻE lava fēfē ke tau poupou fakahangatonu ki he ngāue langa Fale Fakatahaʻangá?
2 Loto-Lelei: Kapau ko ha tokotaha malanga ʻosi papitaiso koe, ʻoku mau fakaafeʻi atu ke ke fakafaingamālieʻi koe ke ngāue fakataha mo e Kōmiti Langa Fakafeituʻú ʻaki hono fakafonu ha foomu Kingdom Hall Volunteer Worker Questionnaire. (Sāme 110:3) Ko e faʻahinga kotoa ʻoku polé kuo pau ke nau hoko ko e kau ngāue loto-lelei pea maʻu ha laumālie ʻo e ngāue fāitaha. (Sāme 133:1) Neongo kapau ʻoku ʻikai te ke maʻu ha ngaahi pōtoʻi ʻi he langá, ʻe kei lava pē ke ke tokoni lahi ke lavaʻi ai ha ngāue langa. Te ke toe ako foki ai, ʻa ia ʻe ʻai ai ke ke ʻaonga lahi ange ʻi he kahaʻú.
3. ʻI he ngaahi founga kehe fē ʻe lava ke tau fakahā ai ʻetau poupou ki he fokotuʻutuʻu ko ení?
3 Kapau ʻoku ʻikai lava ke ke pole, ʻe lava ke ke fakahā hoʻo poupoú ʻaki hono fakalotolahiʻi ʻa e niʻihi kehe ʻa ia ʻoku nau malava ke kau ʻi he fokotuʻutuʻú. ʻE lava ke ke tokoni ʻi hono fakahoko ʻi he fakatahaʻangá ʻa e ngaahi konga ʻa e faʻahinga ʻoku ʻalú. ʻI he palani ki muʻá, ʻe lava ke fakapapauʻi ai ʻe he kau mātuʻá ʻoku tokangaʻi lelei ʻa e fakatahaʻangá ʻi he taimi ʻoku ngāue ai ʻa e niʻihi ʻi ha langa Fale Fakatahaʻangá. Ko e moʻoni, ʻoku fiefia ʻa Sihova ʻi he taimi ʻoku tau ngāue fāʻūtaha ai ke laka ki muʻa ʻa e ngaahi meʻa ʻo e Puleʻangá.—Hep. 13:16.
4. ʻE lava fēfē ke tau fakalototoʻaʻi ʻa e faʻahinga ʻoku kau ʻi he ngaahi ngāue langa Fale Fakatahaʻangá?
4 Hoko ʻo Fakalototoʻa: Ko hono langa ʻa e ngaahi faiʻanga lotú ʻoku kau ki ai ʻa e taimi lahi mo e ngāue mālohi. ʻOku lava leva ai ke mahino, ko e faʻahinga ko ia ʻoku fakaafeʻi ke nau tokoni ʻi he ngaahi ngāue langá te nau mavahe ʻi he taimi ʻe niʻihi mei heʻenau ngaahi fakatahaʻangá. ʻOfa ke tau vave ke fai ha fakaongoongolelei mo e fakalototoʻa ki he kau ngāue pole ʻi he langá, ʻa ia ʻoku nau fai ʻa e ngaahi feilaulau ke tokangaʻi ai ʻa e “ngāue” ko eni ʻoku fiemaʻú.—Ng. 6:3; Loma 14:19.
5. ʻE lava fēfē ke fakahaaʻi ʻe he kau ngāue pole ʻi he langá ʻa e mafamafatataú?
5 Mafamafatatau: Ko e malanga fekauʻaki mo e Puleʻanga ʻo e ʻOtuá ʻa ʻetau ngāue fakateokalati tefitó. (Mk. 13:10) ʻI he fakakaukau ki hení, ʻoku feinga ai ʻa e Ngaahi Kōmiti Langa Fakafeituʻú ke fakataimitēpileʻi ʻa e ngaahi langá koeʻuhi ke ʻoua naʻa mavahe ai ʻo ʻikai fiemaʻu, ʻa e kau ngāue polé mei heʻenau ngaahi fakatahaʻangá. ʻI he founga tatau, ʻoku feinga ʻa e kau ngāue pole ki he langá ke mafamafatatau ʻi hono tokangaʻi ʻa honau ngaahi fatongia lahí. ʻOku nau fai ʻa e fokotuʻutuʻu ke fakapapauʻi ʻoku tokangaʻi ʻenau ngaahi konga ʻi he fakatahaʻangá ʻi he taimi ʻoku nau mavahe aí.
6. Ko e hā ʻoku lavaʻí ʻi he taimi ʻoku ngāue fāitaha ai ʻa e faʻahinga kotoa ʻi he fakatahaʻangá ke laka ki muʻa ʻa e lotu moʻoní?
6 Naʻe fakamatalaʻi ʻe he ʻapositolo ko Paulá ʻa e ngaahi mēmipa ʻo e fakatahaʻangá ʻoku nau ngāue fāʻūtaha “moʻo langa hake ʻo e sino ʻi he ʻofa.” (Ef. 4:16) Ko ʻetau ʻofa kia Sihova pea ki he lotu moʻoní ʻoku ueʻi ai kitautolu ke tau ngāue fāitaha ke poupou ki hono malangaʻi ʻa e ongoongo leleí pea ki he langa ʻo e Fale Fakatahaʻangá.