Ko e Hā Te Ke Fai ʻAki Hoʻo Moʻuí?
1 ʻOku faʻa ʻeke ki he fānaú he taimi ʻe niʻihi, “ʻOkú ke fie hoko ko e hā ʻi haʻo fuʻu lahi?” ʻI he taimi naʻá ke kei tamasiʻi aí, naʻá ke pehē te ke fie hoko ko ha toketā? ko ha tufunga? ko ha ʻovasia sēketi? Pe ʻi he tuʻunga ko ha kiʻi taʻahiné, naʻá ke pehē nai te ke fie hoko ko ha neesi? ko ha faiako? ko ha misinale? Kuó ke fuʻu lahi eni he taimí ni, kuo pau ke ke ʻeke hifo ha toe fehuʻi ʻe taha, ‘Ko e hā te u fai ʻaki ʻeku moʻuí?’ ʻOkú ke mateuteu ke ke fai ha fili?
2 Ke tokoniʻi koe ke ke fai ʻa e fili lelei taha ʻe ala lavá, kuo faʻu ʻe he kautaha ʻa Sihová ʻa e DVD Young People Ask—What Will I Do With My Life? Kātaki ʻo mamata ai, pea fai ha fakakaukau fakamātoato ki he meʻa kotoa ʻoku ʻi aí, ʻo kau ai ʻa e tulamá, ngaahi fakaʻekeʻeké mo e fakamatala fakalahí. ʻOku fakahokohoko ʻa e meʻa ʻoku ʻi lotó ʻi he puha “Main Menu.”
3 Ko e Tulamá: ʻI hoʻo mamata ʻi he tulamá, fakakaukau ki he ngaahi fehuʻi ko ení: (1) Ko e hā ʻa e ngaahi tuʻunga meimei tatau ʻia Andre mo Tīmote, ʻa ia ʻoku fakamatala ki ai ʻi he Ngaahi Konga Tohi Tapu Faka-Kalisi Kalisitiané? (Ng. 16:1; 1 Tim. 4:8; 2 Tim. 1:5) (2) Naʻe anga-fēfē hono tenge ʻa André ke ne ʻi he tuʻunga māʻolunga ʻi he sipotí, pea ko hai naʻá ne tenge iá? (3) Ko hai fua naʻe fakamoʻoniʻi ʻenau hoko ko e ngaahi tākiekina lelei kia Tīmote pea mo Andre, pea ʻi he ngaahi founga fē? (2 Tim. 1:1-4; 3:14, 15) (4) Naʻe anga-fēfē hono tākiekina ʻe he akonaki ʻi he Mātiu 6:24 mo e Filipai 3:8 ʻa Andre, pea ʻoku anga-fēfē ʻene tākiekina koé?
4 Ngaahi Konga Kuo Filifili: Hili ʻa e mamata ʻi he foʻi tulamá kotoa, toe tā ʻa e ngaahi konga ko ení, pea tali ʻa e ngaahi fehuʻi ko ení. “Paula mo Tīmote”: Ko e hā ʻa e akonaki fakaʻosi ʻa Paula kia Tīmoté? (2 Tim. 4:5) “ʻOatu kia Sihova Hoʻo Lelei Tahá”: Ko e hā ʻa e faʻahinga taumuʻa fakalaumālie ʻokú ke maʻú? “Tuʻu maʻa Sihova”: ʻOku maʻu mei fē ʻa e fiefia moʻoní? “Faleʻi ʻa e Kui-Fefiné”: Ko e hā ʻoku hala ʻi he holi ke hoko ʻo ongoongoa ʻi he māmani ʻo Sētané? (Mt. 4:9) “ʻIkai ha Fakaʻiseʻisa”: Ko e hā ha meʻa ʻokú ke ʻilo ʻe lava ke tokoniʻi ai koe ke ke lavameʻa ʻi he moʻuí?—Pal. 10:22.
5 Fakaʻekeʻeke: ʻI hoʻo mamata ʻi he ngaahi konga taki taha ko ení, ko e hā ʻokú ke sio ai ʻe lava ke ke fai ke ʻoatu ai hoʻo lelei tahá kia Sihová? (1) “Līʻoa ki he Ngaahi Ngāue Muná pe ki he ʻOtuá?” (1 Sione 2:17); (2) “Ako ke Fiefia ʻi Hoʻo Ngāue Fakafaifekaú” (Sāme 27:14); mo e (3) “Ko ha Matapā ʻOku ʻAtā ki he Ngāue.”—Mt. 6:33.
6 Sio ki he Kuohilí: ʻE lava ke ke tali? (1) Ko e hā ʻa e ngaahi ngāue naʻe tuli ki ai ʻa e tokouá mo e tuofefiné, pea ko e hā hono ʻuhingá? (2) Naʻá na lavameʻa fēfē? (3) Ko e hā ʻa e liliuʻanga taki taha ʻi heʻena moʻuí? (2 Kol. 5:15) (4) Ko e hā ʻa e ngaahi ngāue fakateokalati naʻá ne fetongi ʻena ngāue ki muʻá, pea ko e hā naʻá na ongoʻi ai heʻikai lava ke na tuli fakatouʻosi ki aí? (5) Kuo ʻi ai nai haʻana teitei fakaʻiseʻisa ʻi hono liliu ʻena taumuʻa ʻi he moʻuí? (6) Ko e hā naʻá na leaʻaki naʻe tautefito ʻene ʻai koe ke ke fakakaukau ʻo kau ki he meʻa ʻoku totonu ke ke fai ʻaki hoʻo moʻuí?
7 Ngaahi Fakaʻekeʻeke Fakalahi: ʻI he ngaahi fakaʻekeʻeke taki taha ko ení, ko e hā ʻa e meʻa kuó ke ako ʻe lava ke ke fai ka ke kau kakato ange ai ʻi he ngāue ʻa Sihová? (1) “Ko e Mahuʻinga ʻo e Ako Fakafoʻituituí,” (2) “Founga Faifakamoʻoni Kehe,” (3) “Ngāue Pēteli,” (4) “Akoʻanga Fakamisinale ko Kiliatí” mo e (5) “Akoʻanga Ako Fakafaifekau.” Lāulea ki he “Index to Published Information on Related Subjects,” pea toe lau ha meʻa lahi ange ʻo kau ki he meʻa ʻokú ke mahuʻingaʻia taha aí.
8 Sai, kuó ke fakapapauʻi ʻa e meʻa te ke fai ʻaki hoʻo moʻuí? Naʻe ekinaki ʻa Paula kia Tīmote: “Ke ke mamafa ki he ngaahi meʻa ko ia; ke ke ngaue ki he ngaahi meʻa ko ia; koeʻuhi ke ha ki he kakai kotoa hoʻo laka ki muʻa.” (1 Tim. 4:15) ʻOku mau ekinaki atu kiate koe ke ke fai ʻa e meʻa tatau ki he meʻa kuó ke sio mo fanongo ai ʻi he DVD ko ení. Kole kia Sihova ke ne tokoniʻi koe ke ke fai ha fili fakapotopoto ʻa ia te ke maʻu ai ʻa e fiefia mo e ongoʻi lavameʻa ʻi he moʻuí ʻi he taimí ni pea pehē foki ki ha kahaʻu lelei mo fakafiefia.
[Puha ʻi he peesi 6]
MAIN MENU
Play Drama
Scenes (konga ʻe 11)
Interviews
Play All
Sections (konga ʻe 3)
Looking Back
Supplementary Material
Supplementary Interviews
Index to Published Information on Related Subjects
Subtitles
Hearing Impaired
None
Ke mamata ʻi he ngaahi konga kehekehe ʻi he DVD, ngāueʻaki ʻa e meʻa lomi Next ▶, ◀ Back, mo e Main Menu.