ʻĪsiu Makehe ʻo e ʻĀ Hake! ke Tuʻuaki Lolotonga ʻa Sanuali 2008!
1 ʻOku maʻu ʻe he kakai tokolahi ʻa e ngaahi fehuʻi loto-totonu fekauʻaki mo e mahuʻinga ʻo e Tohi Tapú. Kapau naʻe tohi ia ʻe ha kau tangata, ʻe lava fēfē ke ui ia ko e Folofola ʻa e ʻOtuá? Ko e hā ʻa e ngaahi ʻuhinga ke falala ai ʻe tataki ʻe he Tohi Tapú ʻa ʻeku laká? Kapau ʻoku ou lau mo ako ʻa e Tohi Tapú, ko e hā ʻa e ngaahi ʻaonga ʻo hono vaheʻi ki ai ʻa hoku taimí mo ʻeku feingá? Ko e liliu Tohi Tapu fē ʻoku totonu ke u ngāueʻakí? Ko e niʻihi eni ʻo e ngaahi fehuʻi ʻoku tali ʻi he ʻīsiu makehe ʻo e ʻĀ Hake! ʻo Sanuali-Maʻasi ʻa ia kuo fakakaveinga “ʻE Lava Ke Ke Falala ki he Tohi Tapú?”
2 ʻOku tau loto ke tufaki lahi ʻi hotau feituʻu ngāué ʻa e ʻīsiu makehe ko eni ʻo e ʻĀ Hake! ʻO ka malava, kau ʻi he ngāue fakafaifekau fale-ki-he-falé fakataha mo e fakatahaʻangá ʻi he Tokonaki taki taha lolotonga ʻa e māhina ko Sanualí. Fakaʻaliʻali ʻa e ʻīsiu ko eni ʻo e ʻĀ Hake! ki ho ngaahi kāingá, ngaahi kaungāʻapí, kaungāngāué, kau faiakó, kaungāakó mo e ngaahi toe ʻaʻahí. ʻAve ha ngaahi tatau ʻi hoʻo ʻalu ki falekoloa pea ʻi haʻo fononga. Kuo kole ʻe he kau mātuʻá ʻa e ngaahi tatau lahi ange koeʻuhi ke maʻu ʻe he fakatahaʻangá ha tokonaki feʻunga.
3 Kamata ha Ako Tohi Tapu: Kapau te ke tufa ʻa e makasiní, ki muʻa ke fakaʻosi hoʻo talanoá, ʻe lava ke ke fakatoka ai ʻa e makatuʻunga ki ha ako Tohi Tapu. Ko e fakatātaá, ʻe lava ke ke pehē, “ʻI he taimi hoko maí, te u saiʻia ke fakahaaʻi atu ai ʻa e tali ʻa e Tohi Tapú ki he fehuʻi ko ení, ‘Ko e hā ʻa e taumuʻa ʻa e ʻOtuá ki he māmaní?’” Pea foki leva mo e tohi Akoʻi ʻe he Tohi Tapú ʻo fakahaaʻi ki he tokotaha-ʻapí ʻa e peesi 4-5, pe lāulea ki he palakalafi 1-3 ʻo e vahe 3. Ko e toe meʻa eni ʻe taha ke leaʻaki, “ʻI he taimi hoko maí, te u saiʻia ke lāulea ai ki ha kikite Fakatohitapu ʻa ia ʻoku lolotonga fakahoko he taimí ni.” ʻI hoʻo foki ki aí, fakahaaʻi ki he tokotaha-ʻapí ʻa e vahe 9 ʻo e tohí pea fetalanoaʻaki ʻi he palakalafi 1-3. Pe te ke tala ange pē ki he tokotaha-ʻapí: “ʻOku ʻiloʻi ʻe he tokolahi ʻoku faingataʻa ke mahinoʻi ʻa e meʻa ʻoku nau lau ʻi he Tohi Tapú. ʻI he taimi hoko maí, te u saiʻia ke fakahaaʻi atu ai ʻa e founga ʻe lava ke ke mahinoʻi lelei ange ai ʻa hoʻo Tohi Tapú.” ʻI he toe ʻaʻahí, fakahaaʻi ange ʻa e tohi Akoʻi ʻe he Tohi Tapú, pea fakahāhaaʻi ha ako.
4 Ko e Tohi Tapú pē ʻoku ʻi ai “ae gaahi tohi maonioni,” ʻa ia ʻoku malava ke ne ʻai kitautolu ke tau ‘boto ki he fakamouí.’ (2 Tim. 3:15, PM) Ko ia ai, ko kitautolu kotoa te tau saiʻia ke kau faivelenga ʻi hono tufaki ʻo e ʻīsiu makehe ko eni ʻo e ʻĀ Hake! ke tokoniʻi ʻa e kakaí ke nau fakatupulekina ʻa e falala ki he Tohi Tapú!