Tohi mei he Vaʻá

Siʻi Kau Malanga ʻo e Puleʻangá:

Kuo fakahā mai ne pasipasi fiefia ʻa e fāmili Pētelí ʻi hono fai ha fanongonongo lolotonga ʻa e lotu pongipongi ʻi he vaʻa ʻi ʻAmeliká ʻi he ʻaho Mōnite, Fepueli 4, 2008. Naʻe pehē ai: “ʻI he fakaʻosinga uike ne toki ʻosí, naʻe aʻu mai ai ʻa e kau ʻovasia tauhi mei he ngaahi fakatahaʻanga kehekehe mei he kotoa ʻo ʻAmeliká. ʻOku nau ʻi Patterson he taimí ni ke kau ki he ʻuluaki kalasi ʻo e Ako Maʻá e Kau Mātuʻa ʻi he Fakatahaʻangá.”

ʻOku fiefia ʻa e kau akó ʻi he feohi fakatupu langa hake mo e fāmili Pētelí. ʻOku nau toe maʻu ʻa e lotu pongipongí ʻi he ʻaho taki taha, pea pehē foki ki he ako Taua Leʻo ʻa e fāmili Pētelí ʻi he efiafi Mōnité. Naʻe hā ʻa e ngaahi konga tefito ʻo e akó ʻi he ʻaho fakaʻosí ʻi he taimi naʻe fakahoko ai ʻa e ngaahi lea makehe ʻe ha mēmipa ʻo e Kōmiti Vaʻa ʻi ʻAmeliká pea ko ha mēmipa foki ia ʻo e Kulupu Pulé.

Kuo maʻu ʻa e ngaahi fakamatala lahi ʻo e houngaʻia mei he kau mātuʻa naʻa nau kau ki aí. Naʻe fakamatala ʻa e tokoua ʻe taha: “Naʻe fakalototoʻa ʻaupito ʻa e nofo uike ʻe taha ʻi he Pētelí!” Naʻe tohi ʻe ha tokotaha ʻe taha: “ʻOku ou ongoʻi ivi mālohi he taimí ni ke fakahoko hoku ngaahi fatongiá fakataha mo ha ongoʻi ʻo hono toe fakafoʻou ʻeku faivelengá.” Ko e lēsoni ʻoku lolotonga lele ai he taimi ní ʻoku kau ki ai ʻa e ngaahi tafaʻaki kehekehe ʻo e ngaahi fatongia ʻo e kau ʻovasia tauhí pea ʻe fakamafeia ai kinautolu ke nau ngāue ola lelei ange ki he ngaahi fiemaʻu ʻa e fakatahaʻangá. (Ng. 20:28) Naʻa mau loto ke fakahoko atu e ongoongo ʻo kau ki he tokonaki ko eni ʻo e toe ako lahi ange kuo fai maʻá e kau mātuʻá mei heʻetau Faiako Maʻongoʻongá.—Ai. 30:20.

Mei homou fanga tokoua,

ʻŌfisi Vaʻa ʻi Nuʻu Silá