Meʻa ke Leaʻaki Fekauʻaki mo e Ngaahi Makasiní
Ko e Taua Leʻo Sanuali-Maʻasi
“Ko e kakai ʻi he māmaní ʻoku kehekehe ʻenau fakakaukau fekauʻaki mo Mele, ko e faʻē ʻa Sīsuú. Ko e hā hoʻo fakakaukaú? [Tuku ke ne tali.] ʻOku fakahā mai ʻe he Tohi Tapú ʻoku maʻu ʻe Mele ha ngafa makehe ʻi he hisitōliá. [Lau ʻa e Luke 1:30-32.] ʻOku fakamatala ʻa e makasini ko ení ki he meʻa ʻe lava ke tau ako mei heʻene faʻifaʻitakiʻangá.”
ʻĀ Hake! Sanuali-Maʻasi
“Ko e ʻInitanetí ko ha meʻangāue ʻaonga, ka ʻokú ne toe ʻomai ha fakatuʻutāmaki makehe ki he fānaú. ʻOkú ke fakakaukau ʻe malava fēfē ke tau maluʻi kinautolu? [Tuku ke ne tali.] Kātaki ʻo fakatokangaʻi ʻa e fakakaukau ko ení. [Lau pea fakamatalaʻi ʻa e Palovepi 18:1.] Ko e taha eni ʻo e tefitoʻi moʻoni Fakatohitapu ʻe ono ʻoku fakamatalaʻi ʻi he kupú ni ke tokoni ki he ngaahi mātuʻá ke maluʻi ʻenau fānaú.” Fakaʻaliʻali ʻa e kupu ʻoku kamata ʻi he peesi 8.
Ko e Taua Leʻo Sanuali-Maʻasi
“ʻOkú ke fakakaukau kapau ʻe ngāueʻaki ʻe he ngaahi husepānití mo e ngaahi uaifí ʻa e akonaki Fakatohitapu ko ení, ʻe ʻai ai ke mālohi ʻa e haʻi ʻo e nofo malí? [Lau ʻa e Siope 31:1. Tuku leva ke ne tali.] ʻOku fakamatalaʻi ʻe he kupu ko ení ʻa e ngaahi tefitoʻi moʻoni Fakatohitapu ʻa ia ʻe lava ke tokoni ki he ongo meʻa malí ke tauhi maʻu e tukupā ki heʻena nofo malí.” Fakaeʻa ʻa e kupu ʻoku kamata ʻi he peesi 18.
ʻĀ Hake! Sanuali-Maʻasi
“ʻOku maʻu ʻe he kakai ʻo e ngaahi lotu kehekehe ʻa e fakakaukau fepakipaki ʻo fekauʻaki mo e natula totonu ʻo e ʻOtuá. Ka naʻe anga-fēfē hono fakamatalaʻi ʻe Sīsū ʻa e ʻOtuá? Fakatokangaʻi ange ʻene ngaahi lea ʻi he Sione 4:24. [Lau.] ʻI ha peesi pē ʻe ua, ʻoku ʻomai ai ʻe he kupu ko ení ʻa e vakai ʻa e Tohi Tapú ki he fehuʻi, ‘Ko e hā ʻa e natula ʻo e ʻOtuá?’” Fakaʻaliʻali ʻa e kupu ʻi he peesi 16 mo e 17.