ʻOkú Ke Mateuteu ke Faifakamoʻoni Fakatuʻupakē?

1. Ko e hā ʻa e fakatātā ʻoku fakahaaʻi ai ʻoku lava ke ola lelei ʻa e faifakamoʻoni fakatuʻupakeé?

¹ Ko e faifakamoʻoni fakatuʻupakeé ʻoku lava ke ola lelei ʻaupito. ʻOku ʻi he Tohi Tapú ʻa e fakatātā lahi fau ʻo e faifakamoʻoni fakatuʻupakē fakataha mo e ola lelei. (Sione 4:7-15) Ko e hā ʻe lava ke tau fai ke teuteu ai ki he founga faifakamoʻoni ko ení?

2. ʻE lava fēfē ke tokoni ʻa hotau valá mo e teuteú ki hono fai ha fakamoʻoní?

² Valá mo e Teuteú: Ko e tokanga lelei ki hotau valá mo e teuteú ʻi he taimi kotoa pē ʻe ʻai ai ke lava ʻo tau vahevahe tauʻatāina ʻa ʻetau tuí ki he niʻihi kehé. (1 Tim. 2:9, 10) Kapau ʻoku tau ongoʻi taʻefiemālie fekauʻaki mo hotau fōtungá, ʻoku ngalingali te tau toumoua ai mei hono fai ha fakamoʻoní. ʻI hono kehé, ko hotau fōtunga maau mo maʻá ʻiate pē ʻe lava nai ke ne langaʻi ha fieʻilo. Ko e fakatātaá, lolotonga haʻana fononga, naʻe tangutu ai ha ongo Fakamoʻoni teunga lelei ʻi he tafaʻaki ʻo ha tangata Mosilemi. ʻI hono fakatokangaʻi ʻa hona fōtungá, naʻe ʻeke ai ʻe he tangatá pe ko e ongo Kalisitiane kinaua. Naʻe iku heni ki ha fetalanoaʻaki Fakatohitapu houa ʻe tolu.

3. ʻI he muimui ki he faʻifaʻitakiʻanga ʻa Sīsuú, kuo anga-fēfē hoʻo kamata ha fetalanoaʻaki?

³ Kamata ʻo e Fetalanoaʻakí: ʻI he taimi naʻe fetaulaki ai ʻa Sīsū mo e fefine Samēlia ʻi he vaikeli ʻa Sēkopé, naʻá ne kamata ʻa e fetalanoaʻakí ʻaki ʻene kole ange pē ke ʻoange hano inu. ʻI he founga meimei tatau, te tau malava nai ke kamata ha fetalanoaʻaki ʻaki hono fai ha fakamatala nounou pe ʻi hono ʻeke pē ha fehuʻi faingofua. Neongo te tau toumoua nai ʻi he taimi ʻe niʻihi, ʻi he falala ki he tokoni ʻa Sihová, te tau lava nai ai ke “langaʻi ʻa e loto-toʻa” ke kamata ha fetalanoaʻaki.—1 Tes. 2:2, NW.

4. ʻE lava fēfē ke tau mateuteu ke faifakamoʻoni fakatuʻupakē?

⁴ Kumi ha Faingamālie: Kuo maʻu ʻe he kau malanga tokolahi ʻa e ngaahi founga ke faifakamoʻoni fakatuʻupakē ai. Vakaiʻi ho ngaahi tuʻungá, pea fakakaukau fekauʻaki mo e kakai ʻoku ngalingali te ke fetaulaki fakaʻaho mo iá. ʻAlu mo ha ʻū tohi feʻungamālie pea mo ha kiʻi Tohi Tapu. Fakatokanga meʻa, pea mahuʻingaʻia ʻi he kakai takatakai ʻiate koé. ʻI he taimi kuó ke fai ai ha fakakaukau ki he ngaahi faingamālie te ke fetaulaki nai mo ia lolotonga ʻa e ʻahó, ʻoku ngalingali te ke mateuteu ai ke fai ha fakamoʻoni lelei.—Fili. 1:12-14; 1 Pita 3:15.

5. Ko e hā ʻoku ʻikai totonu ai ke tuku pē ʻa e faifakamoʻoni fakatuʻupakeé ki ha taimi ʻe toki faingamālie ai?

⁵ ʻOku tau maʻu ʻa e ʻuhinga lelei ʻe ua ke ngāueʻaongaʻaki ai ʻa e ngaahi faingamālie ke faifakamoʻoni fakatuʻupakē ai—ko e ʻofa ki he ʻOtuá mo e ʻofa ki he kaungāʻapí. (Mt. 22:37-39) ʻI he fakakaukau atu ki he fakavavevave ʻo e ngāue fakamalangá, ko e faifakamoʻoni fakatuʻupakeé heʻikai lava ke tuku pē ki ha taimi ʻe toki faingamālie ai. ʻOku totonu ke tau mateuteu ke ngāueʻaongaʻaki ʻa e faingamālie kotoa pē ke vahevahe atu ai ʻa e ongoongo lelei ʻo e Puleʻangá ki he niʻihi kehé lolotonga ʻoku kei ʻi ai ʻa e taimí.—Loma 10:13, 14; 2 Tim. 4:2.