Fakahīkihikiʻi ʻa Sihova ʻAki ʻa e Fakamoʻoni ʻi he Founga ʻIkai Anga-Mahení
1 Ko e kau sevāniti mateaki ʻa Sihová ʻoku nau kumi ki he ngaahi faingamālie ke fakahīkihikiʻi ai ia ʻi he ʻaho taki taha. (Sāme 96:2, 3; Hep. 13:15) Ko e founga ʻe taha ʻe lava ke tau fai ai iá ko e fakamoʻoni ʻi he founga ʻikai anga-mahení. Ko e kau lotu tokolahi ʻa Sihova ʻi he ʻaho ní ʻoku nau fakamālōʻia ʻi hono fakafeʻiloaki kinautolu ʻe ha taha ki he pōpoaki ʻo e Puleʻangá fakafou ʻi he fakamoʻoni ʻi he founga ʻikai anga-mahení.
2 Ko hono fai ha fakamoʻoni ʻi he founga ʻikai anga-mahení ki ha tokotaha ʻoku faʻa fakaʻatā ai ʻa e hala ki he niʻihi kehé ke nau fanongo ki he pōpoaki ʻo e Puleʻangá. Ko e fakatātaá, ko e fetalanoaʻaki ʻa Sīsū mo ha fefine Samēlia ʻi he vaikeli ʻo Sēkopé naʻe iku ai ki he mahuʻingaʻia ʻa e tokolahi ʻi he ongoongo leleí. (Sione 4:6-30, 39-42) Lolotonga hono tuku pōpula ʻo Paula mo Sailosi ʻi Filipaí, naʻá na faifakamoʻoni ai ki he tokotaha selá, pea ko e fāmili kotoa ʻo e tangatá naʻa nau tali ʻa e moʻoní.—Ng. 16:25-34.
3 Ngaahi Faingamālie: Ko e hā ʻa e ngaahi faingamālie ʻokú ke maʻu ke fakamoʻoni ai ʻi he founga ʻikai anga-mahení? ʻOku fai ia ʻe he niʻihi ʻi he taimi fakataú, ʻalu ʻi he meʻalele maʻá e kakaí, pe ʻi he tatali ki he ngaahi ʻapoinimeni fakafaitoʻó. ʻOku malava ʻa e niʻihi kehe ke fakamoʻoni lolotonga ʻa e ngaahi taimi mālōlō ʻi he ngāué pe ko e akó. Ko hono ʻai pē ha taha ʻo ʻetau ʻū tohi faka-Tohitapú ke ʻasí te ne fakaʻaiʻai nai ai ʻa e niʻihi kehé ke nau fehuʻi fekauʻaki mo ʻetau ngaahi tuí.—1 Pita 3:15.
4 Ko Hono Kamatá: Ko ha kiʻi taʻahine anga-mā taʻu fitu naʻá ne fanongo ʻi ha fakataha ki he mahuʻinga ko ia ki he tokotaha kotoa ke malangá. Ko ia, ʻi he taimi naʻá ne ʻalu ai ʻo fai fakatau mo ʻene faʻeé, naʻá ne faʻo ʻa e polosiua ʻe ua ʻi heʻene kató. Lolotonga ʻa e femoʻuekina ʻa ʻene faʻeé ʻi he kānitá, naʻe fakaʻaliʻali ai ʻe he kiʻi taʻahiné ha polosiua ki ha fefine, ʻa ia naʻá ne tali lelei ia. ʻI hono ʻeke ange pe naʻe anga-fēfē ʻene maʻu ʻa e loto-toʻa ke fakaofiofi ki he fefiné, naʻe tali ʻe he kiʻi taʻahine anga-mā ko ení: “Naʻá ku pehē pē, Maau, Teuteu, ʻAlu! Pea naʻá ku ʻalu leva!”
5 Ke fakamoʻoni ʻi he founga ʻikai anga-mahení, ʻoku tau fiemaʻu kotoa ha laumālie hangē ko e kiʻi taʻahine ko iá. Ko e hā ʻe lava ke ne tokoniʻi kitautolú? Lotu ki ha loto-toʻa ke lea. (1 Tes. 2:2) Fakamanatu ha foʻi fehuʻi pe fakamatala ʻi ha tuʻunga-lea mahuʻinga ʻe lava ke ke ngāueʻaki ke kamataʻi ha fetalanoaʻaki. Falala leva ʻe tāpuakiʻi ʻe Sihova hoʻo ngaahi feingá.—Luke 12:11, 12.
6 Ko e fakamoʻoni ʻi he founga ʻikai anga-mahení ki he kakai ʻoku tau fetaulaki mo ia ʻi he ʻaho taki tahá ʻoku ʻoatu ai ʻa e fakahīkihiki kia Sihova pea ʻomai kia kitautolu ʻa e fiefia. ʻE tokoniʻi nai ai ha taha ke fou ʻi he hala ki he moʻui taʻengatá.