Ko e Kau Fakamoʻoni Kitautolu ʻi he Taimi Kotoa Pē
1. Ko e hā ʻe lava ke tau ako mei he fakamatala fekauʻaki mo e faifakamoʻoni ʻa Sīsū ki he fefine ʻi he veʻe vaitupú?
1 Naʻe lue ʻa Sīsū ʻi ha ngaahi houa. Naʻá ne helaʻia mo fieinua. ʻI he lolotonga e ʻalu ʻene kau ākongá ke fakatau mai ha meʻakaí, naʻá ne tangutu hifo ʻi ha veʻe vaitupu ʻi ha tuʻa kolo Samēlia ke mālōlō. Naʻe ʻikai ke ʻi Samēlia ʻa Sīsuú ke malanga; naʻá ne fou atu pē ai ʻi heʻene ʻalu ki Kāleli ke hoko atu ai ʻene ngāue fakafaifekaú. Ka neongo ia, naʻá ne ngāueʻaki ʻa e faingamālié ke faifakamoʻoni ai ki ha fefine naʻá ne haʻu ke ʻutu vai. (Sione 4:5-14) Ko e hā hono ʻuhingá? Naʻe ʻikai ʻaupito taʻofi ʻe Sīsū ʻa ʻene hoko ko e “Fakamoʻoni Falalaʻanga mo Moʻoni” ʻa Sihová. (Fkh. 3:14) ʻOku tau faʻifaʻitaki kia Sīsū ʻi he hoko ko e Kau Fakamoʻoni ʻa Sihova he taimi kotoa pē.—1 Pita 2:21.
2. ʻOku anga-fēfē nai haʻatau mateuteu ke faifakamoʻoni ʻi he founga ʻikai anga-mahení?
2 Mateuteu: ʻE lava ke tau mateuteu ke faifakamoʻoni ʻi he founga ʻikai anga-mahení ʻaki hono ʻave ha ʻū tohi. ʻOku toʻotoʻo ʻe he kau malanga tokolahi ha ngaahi tuleki ʻo tufa ia ki ha kau faifakatau, kau ngāue he pausá mo e niʻihi kehe ʻoku nau fetaulaki mo ia he lolotonga ʻo e ʻahó. (Koh. 11:6) Ko ha tuofefine ʻokú ne toutou folau ʻokú ne fakapapauʻi ke ne faʻo holo maʻu pē ʻi heʻene kató ha Tohi Tapu siʻisiʻi mo ha tohi Akoʻi ʻe he Tohi Tapú, pea ʻokú ne feinga ke kamata ha fetalanoaʻaki mo e faʻahinga ʻokú ne tangutu fakataha mo iá.
3. ʻE anga-fēfē nai haʻatau kamata ha fetalanoaʻaki?
3 Kamata ha Fetalanoaʻaki: ʻI he faifakamoʻoni ʻi he founga ʻikai anga-mahení, ʻoku ʻikai fiemaʻu ia ke tau ʻohake ha kaveinga Fakatohitapu ʻi he kamatá. Naʻe ʻikai ke kamata ʻaki ʻe Sīsū ʻa ʻene fetalanoaʻaki mo e fefine ʻi he veʻe vaitupú ʻaki ʻene fakahaaʻi ko e Mīsaiá ia. Naʻá ne kole ange pē kiate ia ha inu, ʻo kamataʻi ai ʻene fieʻiló. (Sione 4:7-9) Naʻe ʻilo ʻe ha tuofefine ʻe taha ko ha fakaofiofi meimei tatau naʻe malava ai ke ne kamata ha fetalanoaʻaki, ʻi hano ʻeke ange pe ʻokú ne fiefia ʻi hono kātoangaʻi ha ʻaho mālōlō. ʻI he ʻikai te ne tala ange ʻoku ʻikai te ne kau ʻi hono kātoangaʻí koeʻuhi ko e taha ia ʻo e Kau Fakamoʻoni ʻa Sihová, ʻokú ne pehē, “Kuó u fai ha fili fakafoʻituitui ke ʻoua te u kātoangaʻi ia.” Ko e tokotaha fehuʻi fieʻiló ʻokú ne faʻa ʻeke ʻa hono ʻuhingá, ʻo lava ai ki he tuofefiné ke ne faifakamoʻoni.
4. Ko e hā ʻoku ueʻi ai koe ʻe he Mātiu 28:18-20?
4 Neongo naʻe fakaʻosi ʻe Sīsū ʻa ʻene ngāue fakafaifekau faivelenga he māmaní, ʻokú ne hokohoko atu ʻa ʻene mahuʻingaʻia ʻaupito ʻi he ngāue fakamalanga ʻoku lolotonga faí ʻo hangē ko ia naʻá ne fakahokó. (Mt. 28:18-20) Ko ia ai, ʻi he hangē ko hotau Faʻifaʻitakiʻangá, ʻa Sīsū, ko e Kau Fakamoʻoni kitautolu ʻoku tau mateuteu ke talaki fakahāhā ʻetau tuí ʻi ha faʻahinga taimi pē.—Hep. 10:23.