Te Ke Kamata ha Ako Tohi Tapu ʻi he Lolotonga ʻa ʻOkatopá?
1 Ko e tuʻuaki ki ʻOkatopá ko e makasini Taua Leʻo mo e ʻĀ Hake! Ke toe foki ki he mahuʻingaʻiá, ʻoku fakalotolahiʻi kitautolu ke tuʻuaki ʻa e tuleki Te Ke Fieʻilo ki he Moʻoní? pea feinga ke kamata ha ako Tohi Tapu. ʻE lava fēfē ke tau fai ia ʻi he toe ʻaʻahí?
2 Founga Hono Ngāueʻaki ʻa e Tulekí: Te tau pehē nai: “Ko e makasini naʻá ku tuku atú ʻoku fakalotolahiʻi ai ʻa e kakai mei he ngaahi puipuituʻa mo e lotu kotoa pē ke nau sivisiviʻi ʻa e Tohi Tapú. [ʻOange ki he tokotaha-ʻapí ʻa e tuleki Fieʻilo ki he Moʻoní pea fakahanga ʻene tokangá ki he ngaahi fehuʻi ʻi muʻá.] ʻOku ʻi heni ʻa e ngaahi fehuʻi fakatupunga fakakaukau ʻa ia ʻoku ʻomai ʻe he Tohi Tapú ʻa e ngaahi tali fakafiemālie ki ai. Kuó ke ʻeke nai ha niʻihi ʻo e ngaahi fehuʻi ko ení?” ʻI he hili ʻa e tali ʻa e tokotaha-ʻapí, lāulea fakataha ki he tali ʻi he tulekí ki ha taha ʻo ʻene ngaahi fehuʻí, pea lau ha konga Tohi Tapu ʻe taha ʻoku ʻasi ai. Fakamatalaʻi leva ko ha kiʻi fakatātā pē ia ʻo e meʻa ʻoku akoʻi ʻe he Tohi Tapú, pea ʻoange kiate ia ha tohi Akoʻi ʻe he Tohi Tapú. ʻE lava leva ke tau fakamatalaʻi ʻa e ʻuluaki ngaahi palakalafi ʻo ha vahe kuó ne fili mei he fakahokohoko ʻo e meʻa ʻi lotó. Pe ʻoku tau fili nai ke huke ki he peesi ʻoku maʻu ai ʻa e fakamatala lahi ange ki he kaveinga kuo tau talanoa ki ai ʻi he tulekí. ʻOku ʻi heni ʻa e ngaahi maʻuʻanga fakamatala ʻe lava nai ke tau ngāueʻaki:
● ʻOku tokanga moʻoni mai ʻa e ʻOtuá kiate kitautolu? (p. 9-11, pal. 6-10)
● ʻE toe ngata ʻa e taú mo e faingataʻá? (p. 12, pal. 12-13)
● Ko e hā ʻoku hoko kiate kitautolu ʻi he taimi ʻoku tau mate aí? (p. 59, pal. 7-8)
● ʻOku toe ʻi ai ha ʻamanaki ki he kau maté? (p. 71, pal. 13-15)
● ʻE lava fēfē ke tali ʻe he ʻOtuá ʻeku lotú? (p. 166-167, pal. 5-8)
● ʻE lava fēfē ke u maʻu ʻa e fiefia ʻi he moʻuí? (p. 9, pal. 4-5)
3 Ko hono moʻoní, kapau ʻoku ʻikai fakaʻatā ʻi he ngaahi tuʻungá ʻi he ʻuluaki toe ʻaʻahí ke tau kamata mo fakahāhā ha ako ʻi he tohi Akoʻi ʻe he Tohi Tapú, ʻoku lava maʻu pē ke tau fokotuʻutuʻu ke fai ha toe foki pea hokohoko atu ʻetau fetalanoaʻakí. Pea fakatuʻunga ʻi he mahuʻingaʻia ʻa e tokotahá, ʻe aʻu nai ʻo lava ke tau fili ke talanoa ki ha fehuʻi lahi ange mei he tulekí ʻi hono fai ha ngaahi toe ʻaʻahi ki muʻa ke tau fakahāhā ʻa e tohí. ʻOfa ke tau ngāueleleiʻaki ʻa e tuleki ʻaonga ko ení lolotonga ʻa ʻOkatopa ke kamata ha ako Tohi Tapu pea tokoniʻi ʻa e faʻahinga loto-moʻoní ke “ilo ae mooni.”—Sione 8:31, 32, PM.
[Fehuʻi ki he Ako]
1. Ko e hā ʻa e tuʻuaki ki ʻOkatopá?
2. ʻE lava fēfē nai ke tau ngāueʻaki ʻa e tuleki Fieʻilo ki he Moʻoní ke kamataʻaki ha ako Tohi Tapu ʻi hono fai ʻo ha toe ʻaʻahi ki ha taha naʻá ne tali ʻa e ongo makasiní?
3. ʻOku lava fēfē ke tau feʻunuʻaki ʻa ʻetau foungá ʻo fakatatau ki he ngaahi tuʻungá?