“Fai ha Fakamoʻoni Fakaʻāuliliki”
1. Ko e hā ʻa e faʻifaʻitakiʻanga lelei naʻe fokotuʻu ʻe he ʻapositolo ko Paulá ʻi he ngāue fakafaifekaú?
1 “Fakahoko kakato ʻa hoʻo ngāue fakafaifekaú.” (2 Tīm. 4:5) Ko e ʻapositolo ko Paulá naʻá ne maʻu ʻa e tauʻatāina ke lea ʻi heʻene ʻoatu ʻa e ekinakí ni kia Tīmoté. Ko hono moʻoní ʻi he vahaʻa ʻo e taʻu 47 mo e 56 T.S., naʻe kakato ai ʻa e fononga fakamisinale hono tolu ʻa Paulá. Ko e tohi ʻa Ngāué naʻe toutou lave kia Paula ʻi heʻene “fai ha fakamoʻoni fakaʻāuliliki.” (Ngā. 23:11; 28:23) ʻE lava fēfē ke tau fai ia ʻi hotau ʻahó ni?
2. ʻE lava fēfē ke tau fai ha fakamoʻoni fakaʻāuliliki ʻi he malanga fale ki he falé?
2 Mei he Fale ki he Fale: ʻI ha feinga ke fetuʻutaki ki ha tokotaha-ʻapi kuo ʻikai ʻaupito ke ne fanongo ki he ongoongo leleí ʻe fiemaʻu nai ke tau ʻaʻahi ʻi ha taimi kehe ʻo e ʻahó. Ko e tangata ʻo e ʻapí ʻe ʻi ai nai ʻi he efiafí pe ko e fakaʻosinga ʻo e uiké. ʻOku totonu ke tau feinga mālohi ke lea ki ha taha ʻi he ʻapi nofoʻanga taki taha, pea toutou ʻaʻahi ki he ngaahi ʻapi-ʻoku-ʻikai-ʻi-ai-ha-tahá. Fēfē kapau ko hoʻo ngaahi feinga ke aʻu ki ha taha ʻoku ʻikai lavameʻa? Mahalo ko ha faitohi pe telefoni ʻe ʻi ai hono ola lelei.
3. Ko e hā ʻa e ngaahi faingamālie ʻokú ke maʻu ke faifakamoʻoni ʻi he feituʻu kakaí mo ʻikai ʻi he founga anga-mahení?
3 Feituʻu Kakaí mo ʻIkai ʻi he Founga Anga-Mahení: Ko e kau sevāniti ʻa Sihova he ʻaho ní ʻoku nau ʻai ke ʻiloa ʻa e “poto” moʻoní ki he faʻahinga kotoa ʻe fanongó. Ko e taimi ʻe niʻihi ʻoku hoko eni “ʻi hala” pe “ʻi he ngaahi malaʻe.” (Pal. 1:20, 21) ʻI he taimi ʻoku tau fakahoko ai ʻetau ngāue fakaʻahó, ʻoku tau fakakaukau ki ha faifakamoʻoni? ʻOku lava ke pehē ʻoku tau ‘nōfoʻi lahi ki he folofolá’? (Ngā. 18:5) Kapau ko ia ʻoku tau fakahoko leva hotau fatongiá ke “fai ha fakamoʻoni fakaʻāuliliki.”—Ngā. 10:42; 17:17; 20:20, 21, 24.
4. ʻOku anga-fēfē tokoni ʻa e lotú mo e fakalaulaulotó ki heʻetau ʻoatu ʻa e faifakamoʻoni fakaʻāulilikí?
4 Neongo ia, ʻi he taimi ʻe niʻihi koeʻuhi ko e tōnounou fakafoʻituituí pe anga-maá, ʻoku tau fakatoupīkoi nai ai mei he fai ha fakamoʻoni. Ko hono moʻoní, ʻoku mahinoʻi ʻe Sihova hotau ngātangá. (Saame 103:14) Neongo ia, ʻi he taimi ʻoku malanga hake ai ʻa e ngaahi tuʻunga peheé, ʻoku lava ke tau lotu kiate ia ki ha loto-toʻa ke lea. (Ngā. 4:29, 31) Pehē foki, ʻi he taimi ʻoku fai ai ʻa e ako fakafoʻituituí mo fakalaulauloto ʻi he Folofola ʻa e ʻOtuá, ʻe lava ke tau hangataha ki hono fakalolotoʻi ʻetau houngaʻia ki he mahuʻinga taʻehanotatau ʻo e ongoongo leleí. (Fil. 3:8) ʻE ueʻi ai heni kitautolu ke malanga faivelenga!
5. ʻE lava-fēfē ke tau kau ʻi hono fakahoko ʻa e kikite ʻa Sioelí?
5 Ko e kikite ʻa Sioelí naʻe tomuʻa tala ai ko e ki muʻa ke hoko mai ʻa e ʻaho lahi mo fakamanavahē ʻo Sihová, ko e kakai ʻa e ʻOtuá te nau “ʻalu” atu pea ʻe ʻikai ke nau tuku ha meʻa ke ne taʻofi kinautolu mei he malangá. (Sioeli 2:2, 7-9) ʻOfa ke tau kau kakato ʻi he ngāue ko eni ʻa ia ʻe-ʻikai-ke-toe-fai-ʻi-ha-taimi!